دگنیاءِ درستیں راجانی تہا وڑے نہ وڈے بزگی ءُ لاچاری درست بنت ۔ آ بزگی سیاسی، چاگردی ، تعلیمی،جنسی، نفسیاتی،مالی ءُدگہ بازیں رنگے بوت کن اَنت۔ءُ انچشیں جیڑگانی درانگاز ءُ آیانی سوب ءِ درگیجگ ءُگیشینگ ءِ واستہ چاگرد ءِ یا راج ءِ لہتیں کلاس ءِ مردم مُدام چست ءُ ایر کن انت کہ کجام نہ کجام وڑا اے پیمیں جیڑگ ءُ جنجال ھلاس بہ بنت یا ایشانی ھلاس بوھگ ءِ سبب در بیا اَنت۔
اگاں چہ ہمے کُلیں راجانی تہا بلوچ راج ءَ کمو ھُورت ھُورت ءَ بیچاریں گڈا بلوچ ءِ جیڑہ ھم جتائیں جیڑہے نہ انت۔ پدا ھمے دُرستیں جیڑہانی تہا اگاں نفسیاتی جیڑہانی سرا کمو چمشانکے بدئیں گڈا اے وت یک مزنیں جیڑہے بیت کہ ایشی ءِ تہا پدا آ دگہ درُستیں اڑ ءُ جنجال مان اَنت۔
بوت کنت پیشیگیں وھد ءِ پیریں کماش ءُ بلوّک آں مُلا ءُ حکیم ءُ پیر ءُ مرشد آں چشیں جیڑہ جن ءُ جاتوگی، وھم ءُ وسواسی جیڑہ گشتگ اَنت ءُ آیانی تہا بازیں مردماں چشیں نفیسیاتی نادراہ وڑ وڑیں شگان ءُ بھتام جتگ اَنت۔ بلے انوگیں وھد ءُ جاور ، جیڑہ ءُ جنجال ، زمینی آب ءُ ہوا ءُ انسانی فکر درست چہ وھدیگیں چیزاں جتا انت ۔ انو اگاں یک انسانے بیمار بیت گڈا روت داکترے کرا، زیارت ءِ سرا وتی وھد ءَ زوال نہ کنت۔
بلے انکس سرپدی ءَ رند ھم مئے بلوچ قوم وتی چپ ءُ چاگردی نفسیاتی جیڑہانی آماچیں مردمانی جیڑگاں پہم ات نکنت۔ اگاں ما کسانیں چمشانکے بدئیں داں گیشتر ی نیم بلوچ راج یک انچاہیں ترسے آماچ اِنت کہ مزنیں ھدے ءَ نفسیاتی مریض جوڈ بوتگ ۔ دومی نیمگا راج ءِ ورنا نشہ ءِ تہا کپتگ کہ ایشانی ذہن زیادیں نشہ آں ھراب کُرتگ اَنت۔
انچش کہ ما درست سرپد یں کہ کُلیں بلوچستان ءَ نفسیاتی اسپتال نیست اِنت اگاں یک مردمے نفسیاتی مرض ءَ دوچار بہ یبت گڈا مئے پدمنتگیں چاگرد آ نادراہ ءَ وڈ وڈیں جیڑہاں بندوک کنت۔ پرچہ کہ مئے راج چہ علم ءُ زانت ءَ باز دور اِنت۔ نفسیاتی نادراہ زیادہ تر جنی گنوک گشگ بنت۔ بلے قوم اے چیزءَ سر پد بوت نکنت کہ جن مردم ءَ گنوک نہ کنت نہ کہ آئی ذہنی توازن ءَ ھراب کنت۔ نہ کہ ھر چیز گوں وھم ءَ بندوک اِنت۔ بلکیں ھمے ذہنی جیڑہ ءِ سوب ءَ وھم انسان ءِ سرا کیت اِنت۔
اگہ ما جنین ءُ مردین ءِ میان ءَ اے نفسیاتی مسئلہاں بیچاریں داں زانگ بیت کہ مئے بلوچ چاگرد ءَ جنین آدم گیشتر ذہنی نادراہ جوڈ بنت۔ جنینانی نادرا بوھگ ءِ بازیں سبب بوت کن اَنت۔ چشکہ گسِ ءِ توک ءَ مرد ءُ جنین ءِ جنسی نا وشی، آہانی یک ءُ دومیگ ءِ سرا بیسہ نہ کنگ۔ پدا ما یک انچشیں چاگردے ءِ واھندیں کہ اودا جنین آدم مردین آدم ءِ پادانی چیرے ھاک زانگ بیت۔ ہمے غیر اخلاقی زندگی ءِ وڑ ءُ پیم جنین آدم ءَ را مدام ایرگیج کنت اوں ھمے ایرگیج ءِ سوب ءَ جنین ءِ ذہن ءِ سرا وڑ وڑیں حیال جاگہ کن اَنت۔
پدا دومی نیمگا اے ذہنی جیڑہ انچشیں جیڑہ اَنت کہ اگہ یک گِسے ءِ توکہ یک مردمے چشیں مسلہانی آماچ بہ یبت گڈا بزاں سرجمیں گس اے آچ ءَ سوچیت۔ انچش کہ ایڈزءِ بیماری اِنت ھمے وڈا گس ءِ تہا اگاں ماس یا پس چشیں مسلہاں گوں دوچار بہ یبت گڈا چک (جین چک) زیادہتر گوں اے چیزاں متاثر بنت۔
ھیر اے سرکارءِ کار اِنت کہ ادا اسپتال پچ بکنت دانکے ذہنی بیمار وتی علاج ءَ بکن اَنت۔ انچشیں پروگرام ءُ کیمپین بندات بکنت کہ مردم اے وڈیں اڈ ءُ جنجالاں سرپدی بزور اَنت بلے افسوس ءِ گپ اِنت کہ مئے کرا چوشیں ہچ رنگیں کار نہ بوتگ ءُ نہ دور دور ءَ گندگ ءَ کیت اِنت۔
” ذہنی نادراہیانی لہتے نشانی”
ھردیں کہ گندیں یک مردمے ءِ واب ھراب بوت یا زیادہ وپت یا کہ کم وپت گڈا بزاں جیڑہے الم ءَ است اِنت۔
بلے لہتیں چیز دماگ ءَ دارگی اِنت کہ اے المی نہ اِنت کہ یک روچے بلکیں واب نہ کپت یا کہ لوگ ءِ توکہ مسئلہے بوت، ناراضگی یے بوت اے دگہ چیز اَنت پرچا کہ اے وڑیں وھدءَ انسان وتی حیالاں کنٹرول کُرت کنت۔بلے وھدے کہ مسئلہ ذہنی بنت گڈا انسان ءِ سوچ ءُ فکر آئی ءِ دست ءَ چہ ڈن بنت۔ دومی اش کہ ذہنی مسئلہ یکشلہ برجاہ بنت نہ کہ یک روچے ءَ رند پدا گار بنت بلکیں اے ھفتگ ءُ ماہ آں ھمیں داب ءَ وتارا دار اَنت۔
بیمارءِ ورگ ءِ توکا پرک گندگ ءَ کیت اِنت۔ ورگ باز کم وارت بلیں انچشیں بیماری است کہ اودا مردم وارگ سک باز وارت۔
بیمار چہ وتی چاگرد ءُ سنگتاں جتا بیت۔گیشتر وھد تہنائی ءَ گوازینت ۔ آئی ءَ تہنائی باز وش بیت ۔ چہ مردمانی مُچی ءَ آئی ءَ بیم کیت۔
ھر وھدا وانگ وانگ بیت اچ چیزءَ گوں دلچسپی نزوریت۔
وتی جندءِ چُک ،براس ءُ گھارانی حیالداری ءَ کُرت نکنت نہ آئی ءَ اے وڈیں سُدّے بیت۔
باز مردم زاہ ءُ بد کنت۔ باز مردم جنّت۔ ھر وھدا زہرئَ پر بنت۔مردمانی سرءَ چیزانی سرءَ آئی ءَ سک زہر کیت۔
بازیں مردم تچیت کُکار کنت۔
مردم کہ ذہنی نادراہ بوھگ ءَ لگیت گڈا جان ءِ شودگ ءَ یل کنت پرچہ کہ باز مردم ءَ چہ آپ ءَ باز دیرءَ بیم کیت۔
ھرچ وھد ءَگوشت کہ پِلاں مردم من ءَ کُشیت پِلانی منی باروا گپ کنت منی سرءَ زہر اش کیت۔
وھدے چشیں نشانی داں باز وھدءَ یک مردمے ءِ تہا گندگ ءَ اتک اَنت گڈا بزاں کہ ذہنی جیڑگآن گوں دوچار انت۔
انچش کہ ما سرپد بوتیں کہ اے وڈیں مسئلہ ذہنی نادراہے ءَ زاھر کن انت۔ گڈا نوں بلوچ قوم ءَ المی اِنت کہ ملا ءُ میاہانی ٹک ءُ ٹاک ءِ بدل ءَ شر تر ہمیش بیت کہ چشیں مردماں ذہنی نادراہی ءِ داکتراں پیش بہ دارانت ءُ گوں آہاں شریں وڈے ءَ نندو نیاد بکن اَنت۔ گوںچشیں نادراہاں بہ کند انت ءُ آیانی گپاں گوش بہ دارانت۔ نا کہ ایشاں زاہ ءُ بد بکن اَنت نہ کہ ایشاں وھمی بگوشنت۔ پرچہ اے وڑیں مردم وتی مارشتاں کنٹرول کُرت نہ کن انت نئے کہ آہانی دست ءَ بیت ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
