بلوچ اسٹوڈنٹس ایکشن کمیٹی ءِ کارانی سرا کَسانیں چمشانکے
ادارہ
(دلگوش!اے گپ زانگ بہ بیت کہ اے بلوچ اسٹوڈنٹس ایکشن کمیٹی ءِ گل ءِ کارانی سرجمیں رپورٹ نہ اِنت بگندے تنہا زنڈزنڈیں کارانی سرا گونڈیں چمشانک اِنت۔چُش کہ ایندگہ کارانی تہا بلوچستان ءِ بازیں ہندء ُ دمگانی نتہا نوکیں زون ء ُ یونٹ مزنیں کساسےءَ جوڈ کنگ بوتگء ُگل ءِ دُرستیں زون آں بلوچ ورناہانی وانگ ء ُ زانگ ءِ ھاترا اسٹیڈی سرکل یکشل ءَ برجاہ داشتگ اَنت ء ُ آئی ءِ ھمبرائیءَ تعلیمی ادارہانی جیڑہانی سرا مزنیں کساسےءَ پریس کانفرنس، زھرشانی ء ُ روانک برجم دارگ بوتگ ء ُ بلوچستان ءِ وانگی جیڑہانی سرا بلوچستان ءِ سرکارءِ نمائندہ ء ُ آ دگہ سیاسی ء ُ چاگردی مہلوک ءَ گوں گپ ء ُ گال ء ُ مجلس ھم ھوار اَنت۔)1نومبر سال 2018ءَ بلوچ اسٹوڈنس ایکشن کمیٹی ءِ اولی کونسل سیشن بیادِ یوسف عزیز مگسی ء ُبنامِ مبارک کازی ء ُ عبدالرحمن براھوی،ڈگری کالج سریاب شال ءَ برجم دارگ بوت۔بلوچ اسٹوڈنٹس ایکشن کمیٹی ءِ اولی کونسل سیشن ءِ تہءَ گل ءِ بنجاھی کماش ڈاکٹر نواب بلوچ، کمک کماش غنی بلوچ،مزن کار گشاد سلمان بلوچ، کمک کار گشاد ھاجی ھیدر ء ُ شِنگ کار تسمیہ بلوچ گچین کنگ بوت اَنت ء ُ وھاب بلوچ، جانباز بلوچ، شبیر بلوچ، ڈاکٹر صبیحہ بلوچ، مرتضی بلوچء ُ سیف بلوچ بنجاھی ورکنگ کمیٹیءِ باسک گچین کنگ بوت اَنت۔ بلوچ اسٹوڈنٹس ایکشن کمیٹیءِ کونسل سیشنءِ بنیاتی مول ء ُمرادگَل ءَ را یک ادارھی دروشمے ءَ دیما آرگ ء ُ بلوچ ورناآں یک مھکمیں ادارھے ءِ تہءَ یکجاہ کنگ ء ُآھانی تہءَ بلوچ سیاستء ُ راجدپترءَ ھوار دگنیا ءِ ایندگہ لبزانکاں گوں نزیک کنگ ءِ جھد کنگ اِنت۔
کونسل سیشنءِ دومی روچ بہ زان کہ 2 نومبر ءَ سوگندی دیوان ٹھینگ بوت کہ اے دیوانءِ تہ ءَ بلوچی ءِ نامی اِیں شائر واجہ مبارک کازی، پروفیسر ڈاکٹر منظور بلوچ، پروفیسر عزیز بگٹی،ڈاکٹر دین مھمد بزدار، رحیم مہر،اے آر داد،ڈاکٹر ابابگر ء ُ بساک ءِ گوستگیں کماش رشید کریم ءَ بھر زرتگ اَت کہ اشاں نودربرانی کرد ماں سیاست ءِ تہ ءَ ء ُبلوچ نودربرانی سیاسی بودء ُباش ءِ سرا گپ ء ُتران کُت۔
گوشتانک دیوکاں تران کنان ءَ بلوچ اسٹوڈنٹس ایکشن کمیٹی ءِ سنگت ء ُ نوکیں کابینہ پہ سوبمندی ءَ سرجم بوتگیں کونسل سیشن ءِ واستہ مبارک باتی دات، سوگندی دیوان ءِ تہءَ گوشتانک دیوکاں بلوچ اسٹوڈنٹس ایکشن کمیٹی ءِ گوستانک ء ُ بساک ءِ کارانی سرا کسانیں چمشانکے دات ء ُ دیوان ءَ بلوچ سیاست ء ُ بلوچ لبزانک ءَ ھوار دگہ بازیں علمی ء ُ لبزانکی بنگپانی سرا تران کُت۔
٭اولی بنجائی کمیٹی دیوان۔
کونسل سیشن ءِ سوگندی دیوان ءِ یک روچےءَ پد سئے نومبر دوھزار نوزدہ ءَ گل ءِ اولی کابینہ ءِ دیوان بنجاھی کماش ڈاکٹر نواب بلوچ ءِ پاگواجھی ءَ ماں شال ءَ برجم دارگ بوت، دیوان ءَ بلوچستان ءِ تہءَ ورناآنی وانگی بازیں جیڑہ ء ُ جنجالانی سرا گپ ء ُ گال کنگ بوت ء ُ دیوان ءَ اے گپ ھم کنگ بوت کہ بلوچ نودربرانی جھگیریں گَل بلوچ اسٹوڈنٹس ایکشن کمیٹی بلوچستان ءَ ھوار پاکستان ءِ اِیندگہ ھر ھما دَمگاں روت اِنت کہ اودا بلوچ نودربر وانگ ءَ اَنت، تا کہ بساک سرجمیں پاکستان ءِ تہءَ بلوچ ورناآنی جھگیری ءَ جوانیں رنگے ءَ کُت بہ کنت۔ گل ءَ را اِیندگہ دمگاں فعال کنگءَ ھوار بساک وتی پیسرءِ برجاھیں ”بلوچستان کتاب کاروان“ ءَ ھم بلوچستان ءِ اِیندگہ دمگاں سر کنگءِ جھدءَ کنت ء ُ کتاب کلچر ءَ لس مھلوکءِ تہءَ شنگ ء ُ تالان کنگءِ جھدءَ کنت دانکہ بلوچستان ءِ ورنا ء ُ نودربر گوں کتاب ءَ نزدیک بہ بنت۔ ء ُ اے پیسلہ ھم زورگ بوت کہ بساک وتی سیاسی نکانانی تاکے ”نوشت“ءِ نام ءَ، وتی جندءِ ماتی زبان بلوچی ء ُ براھوئیءِ تہءَ ھمک سئے ماہءِ سراشنگ کنت، اے تاکءِ مول ء ُ مراد ھمیش اِنت کہ ما بلوچ ورنا ء ُ نودربرانءَ گِہ ءَ چہ گھتریں سیاسی نکان سر بکن اِیں ء ُ آھانءَ سیاسی زانت ء ُ سرپدی بدے اِیں۔ اے شور ء ُ سلاھاں ھوار گل ءِ وانگی مراگشانی دیم ءَ برگ ءِ ھاترا گل وھد وھدانی سرا مراگش اڑ دنت۔ گوں ھمے پیسلہ آں گل ءِ اولی کابینہ ءِ دیوان آسر کنگ بیت۔
٭دومی بنجاھی کمیٹی دیوان۔
چار ماہ ءَ داں بساک ءِ لیڈرشپ وتی اولی دیوان ءِ زرتگیں پیسلہ آنی سرا کار کنت ء ُ چار ماہ ءَ پد دومی بنجاھی کمیٹی ءِ دیوان گل ءِ بنجاھی کماش ڈاکٹر نواب بلوچ ءِ پاگواجھی ءَ 23 مارچ 2019 ءَ ماں شال ءَ برجم دارگ بیت۔ اِے دیوان ءَ گَلءِ کمک کماش غنی بلوچ چہ وتی زاتی دزگٹی آنی سوب ءَ چہ کمک کماشیءِ اُگدہءَ دز کش بیت ء ُ آئیءِ جاگہ ءَبنجاھی کمیٹی ءِ گیشتریں رائے آنی بنیات ءَ ورکنگ باڑی ءِ باسک ڈاکٹر صبیحہ بلوچ پہ کمک کماشیءِ اگدہءَ گچین کنگ بیت ء ُ بنجاھی شِنگکار تسمیہ بلوچ گل ءِ رھبندءِ پادمال کنگءِ سوَب ءَ چہ شنگ کاریءِ اگدہءَ کشّگ بیت ء ُ بنجاھی گیشتریں اگدہ دارانی رائے آنی بنیات ءَ ورکنگ باڑی ءِ باسک شبیر بلوچ بنجاھی شنگکاری ءِ ھاترا پہ گچین کنگ بیت۔ اِے پیسلہ آں ھوار گل ءِ پیسریگیں زرتگیں پیسلہ آنی سرا بوتگیں گوستگیں کارانی سرا چمشانک دیگ بیت اِنت ء ُ دیم ءِ چار ماھی کارانی واستہ پروگرام ٹھینگ بیت۔
٭سیمی بنجائی کمیٹی دیوان۔
23 اگست 2019 ءَ بلوچ اسٹوڈنٹس ایکشن کمیٹی ءِ سیمی بنجاھی دیوان گَلءِ کماش ڈاکٹر نواب ءِ پاگواجھی ءَ برجم دارگ بیت،دیوان ءَ نودربر سیاست ءِ ھوالہ ءَ ء ُ بلوچ نودربرانی مروچی اِیں وانگی لوٹانی ھساب ءَ بازیں پیسلہ یے زورگ بیت۔ اے دیوانءَ اے شور ء ُ سلاہ ھم بیت کہ نودربر سیاستءِ سرا ملکی گیر کانودی ء ُ زوراں سریءَ جتگ اِیں بندشانی ھلاس کنگ ءِ واستہ گل وتی وس ء ُ واک ءِ ھساب ءَ کار کنت ء ُ بلوچستان ءِ تہءَ سیاست کہ نودربرانی بنیاتی ھک اِنت آئی ءِ بھال کنگ ءِ ھاترا جھد کنگ بیت۔
٭اولی سیمینار۔
13 دسمبر 2018 ءَ بلوچ اسٹوڈنٹس ایکشن کمیٹیءِ نیمگءَ چہ ماں شال بولان میڈیکل کالج ءَ Geographical Importance of Balochistan بنگپ ءِ سرا یک سیمینار ے اڈ دیگ بیت اِنت کہ آئی ءِ ھاسیں مھمان گوستگیں سینیٹر ء ُ انوگیں ایم پی اے ثناء بلوچ ء ُ بلوچی لبزانکار واجہ دین مھمد بزدار بلوچ بنت۔
اے مراگش ءَ تران کنان ءَ گوشتانک دیوک گُش اَنت کہ دگنیا ءِ کجام کہ راجے اَست اِنت آئی ءِ یک زمینے بیت ء ُ ھما راج دگنیا ءِ تہءَ یک مزنیں تاکت ء ُ توانے داشت کنت کہ آئیءِ یک جوانیں سیمسر ے بہ بیت، اگاں مروچی بلوچستان ءِ سیمسرانی سرا گپ کنگ بہ بیت گڈا بلوچ زمین پہ جھانی سیاست ء ُ تاکتانی واستہ یک مزنیں ارزشتے داراِیت پمیشکہ مروچی سرجمیں دگنیا ءِ چم بلوچستان ءَ سک اَنت۔ بگندئے سویت یونین ءِ پرشگ ءَ چہ پیسر مستریں کوشست ھمے بوتگ کہ من بلوچستان ءِ گرم آپ ءَ سر بوت بہ کن آں، سیمینار ءَ مزنیں کساسے ءَ بلوچ ورنا ء ُ نودربراں بھر زرتگ اَت۔
٭دومی سیمینار۔
چہ گلءِ بنجاہءِ نیمگءَ 9 فروری 2019 ءَ History of Students Politics in Liyari ءِ بنگپءِ سرا لیاری ءَ گل ءِ بنجاھی کارگشاد سلمان بلوچ ءِ پاگواجھی ءَ یک سیمینارے برجم دارگ بوت۔ دیوان ءِ ھاسیں مھمان عبدالرحیم ظفر، نادل شاہ عادل، اختر بلوچ، ھنیپ دلمراد، اصغر دشتی اِتنت۔ گشتانک دیوکاں دیوان ءِ تہ ءَ لیاری ءِ راجدپتر سیاست ء ُ لبزانکءِ سرا چمشانک دات ء ُ وتی نبشتہ کُتگیں نبشتانک ونت اَنت۔ بلوچ اسٹوڈنٹس ایکشن کمیٹی ءِ اے دیوان ءِ مول ء ُ مراد لیاری ءِ نودربر سیاستءِ دپترء ُ آئیءِ گوستانک ءِ اندیم بوتگیں سیاسی کردانی سرا گپ ء ُ گال کنگ اَت۔ انچوش کہ شستءِ دھکءَ بلوچ نودربر سیاستءِ تہءَ یک مھکمیں دابے ءَ بلوچ سیاسی ورنا آں ماں لیاری ءِ تہءَ سیاسی کارانی تہءَ ردوم زرتگ، دیوانءَ ھمے گوستانکءِ سرا گپ ء ُ گال کنگ بوت۔ گوشتانک دیوکاں وتی نبشتانک آنی تہءَ اے ھم گشت کہ بلوچستان ءِ تہ ءَ چست بوتگیں ھمک جنز سیاسی بہ بیت یا کہ لبزانکی آئیءِ اسر ماں لیاری ءَ الم کپتگ اَنت ء ُ بازیں سیاسی ء ُ لبزانکی جنزانی بنزہ ھم لیاری گوشگ بیت۔ لیاری بلوچ لبزانک ءِ دلبند زانگ بیت اِنت۔
بلے مروچی نہ وشیں جاور ء ُ وش نیتکانی اڈ داتگیں بلوچ ھلاپ پالیسیانی سوب ءَ لیاری ءِ ورنا ء ُ نودربراں ھوار لیاری ءِ مھلوک ماں گینگ وار ء ُ دگہ بازیں سِلیں کارانی تہءَ کپتگ اَنت۔ نودربر سیاستءِ ھوالہ ءَ لیاری ءِ گوستءِ ارزشت ءَ چہ کس انکارکت نہ کنت۔لیاری ءِ تہءَ نہ تھنا لیاری ءِ جند ءِ ورنا رُستگ اَنت بگندئے لیاری ءِ زمین سرجمیں بلوچستان ءِ دگہ دمگانی نودربرانی واستہ لوگے ءِ ڈولءَ بوتگ۔ گوستءَ وھدے کہ لیاری یک جوانیں رنگے ءَ سیاسی ء ُ لبزانکی ردادیمروئی کنگ ءَ بیت گڈا اشیءِ تہءَ بلوچستانءِ لس مھلوک ھوار بیت ء ُ بلوچ راجدوستی ءِ پگر ء ُ سوچ ورنا آنی تہءَ زندگ بوان بیت،ھمے سوبءَ لیاری ءِ تہءَ یک مھکمیں شور بندی ءَ گوں سِلاہءِ کلچر آرگ بیت دانکہ بلوچ راجدوستیءِ سوچ ء ُ پگر لیاری ءِ زمین ء ُ اِودئے مھلوک ءِ زھن ءَ چہ ھلاس کنگ بہ بیت۔
٭سیمی سیمینار۔
بلوچ اسٹوڈنٹس ایکشن کمیٹی 21 فروری 2019 ءَ international mother language day ءِ بنگپءِ سرا یک سیمینارے ماں خضدار ءَ اڈ دنت۔اِے دیوان ءِ ھاسیں مھمان لیاقت سنی بلوچ بیت ء ُ بلوچ اسٹوڈنٹس ایکشن کمیٹی ءِ کماش ڈاکٹر نواب بلوچ ء ُ بساک ءِ گوستگیں کماش رشید کریم بلوچ اِے دیوان ساڑی بنت۔ گوشتانک دیوک دگنیا ءِ تہءَ ماتی زبان ءِ ارزشت ء ُ وتی جند ءِ ماتی زبان بلوچی ء ُ براھوئی آنی تہءِ کمی ء ُ گیشی آنی سرا گپ ء ُ تران کن اَنت۔ بلوچ اسٹوڈنٹس ایکشن کمیٹی ءِ اِے رنگیں مراگشانی اڈ دیگ ءِ مول ء ُ مراد بلوچ ورنا ء ُ مھلوک ءِ تہءَ ماتی زبانانی ارزشت ءِ باروءَ سرپدی دیگ اِنت۔ اگاں دگنیا ءِ کجام کہ راجے وتی ماتی زبان ءِ ارزشت ءَ مہ زانت گڈاآ راج کدی ھم دیمروئی کُت نہ کنت ء ُ وھد ءِ ھواری ءَ اے رنگیں راج راجدپتر ءِ تہءَ گار ء ُ گمسار بنت۔
٭چارمی سیمینار۔
بلوچ اسٹوڈنٹس ایکشن کمیٹی 21 فروری 2019 ءَ International Mother language Day ءِ سرھال ءِ سرایک سیمینار ے ماں ڈی جی خان ءَ اڈ دنت، سیمینار ءِ ھاسیں مھمان بلوچی زبان ءِ مزن نامیں شائر ء ُ نبشتہ کار اللہ بکش بزادر ء ُ اِیندگہ مزن نامیں شائر ء ُ لبزانکاراں ھوار ایدگہ لس مھلوکءَ سیمینار ءَ بھر زرتگ ء ُ وتی زبانانی ارزشت ءِ سرا گپ ء ُ تران کُتگ۔ گوشتانک دیوکاں گشتانک دیانءَ گشتگ اَت کہ زبان راجے ءِ زندگ بوئگ ءَ مانزمان اِنت، زبان یک راجےءِ مردمانءَ یکجائیءِ سکینءَ دنت، آھانی میان ءَ نزدیک ء ُ سیادی جوڑ کنت، آھانءَ ھوار کنت، یک راجے ءَ کہ زبان مہ بیت گُڈا آمردمانی میان ءَ دوری جوڑ بیت اِنت، ناتپاکی پیداک بیت۔
٭پنچمی سیمینار۔
بلوچ اسٹوڈنٹس ایکشن کمیٹی 26 فروری 2019 ءَ ماں کراچی ءَ Role & Importance of social media & language for social development ءِ سرھال ءِ سرا یک ورک شاپ ءِ اڈداتگ۔اے سرھال ءِ سرا تران کنوک جرنلسٹ ء ُاردو آزمانکار ء ُ لبزانکار عابد میر بلوچ، سیاسی کارکن وقاص عالم انگاریہء ُ مجاھد بلوچ بنت۔ دیوان ءِ گوشتانک دیوک رسانکدر ءِ ارزشت ء ُ رسانکءِ ڈیولپمنٹ ءِ سرا جوانیں رنگے ءَ گوں گپ ء ُ تران کن اَنت ء ُ مروچی ایں ٹیکنالوجیءِ دور ءَ رسانکدر ءِ ارزشت سرا ھبر ء ُ ھال کن اَنت،مروچی پاکستان وڑیں ملکےءَ کہ ادا الیکٹرانک ء ُ فرنٹ میڈیاءَ ھما نیستی ءِ ھسابءَ اِنت۔ اے وھدءَ پہ ادئے لس مھلوکءِ واستہ رسانکدر یکیں وسیلہ اِنت کہ ادا ھر یک مردمے گوں آجوئی ءَ وتی گپاں دگنیا ءِ دیم ءَ ایر کُت کنت۔
٭ششمی سیمینار۔
چار مارچ 2019 ءَ ماں کراچی ءَ بلوچ اسٹوڈنٹس ایکشن کمیٹیءَ Role of Balochi Literature in the existence and progress of Baloch Cuture ءِ بنگپ ءِ سرا یک سیمینار ے اڈ دات۔ دیوان ءِ ھاسیں مھمان براھوئی لبزانک ءِ مزن نامیں نبشتہ کار، شائر ء ُ بلوچستان مزن شھدربرجاہ ءَ براھوئی ڈیپارٹمنٹ ءِ سر کماش پروفیسر منظور بلوچ اَت ء ُ آئیءَ ھوار بلوچی زبان ءِ نبشتہ کار ء ُ شائر سنگت رپیک بلوچ، ڈاکٹر رمضان بامری، شرف شاد ء ُ ڈاکٹر رکمان گل پلاری دیوانءَ بھر زرتگ اَت۔ گوشتانک دیوکاں بلوچی ء ُ براھوئی زبان ء ُ آھانی ارزشت ءِ سرا گپ ء ُ ھبر کُت ء ُ ھمے گوشت کہ یک راجے ءِ زندگ بوئگ ءِ واستہ آئیءِ زبان ءِ زندگ بوئگ یک مزنیں ارزشتے داراِیت اگاں یک راجے ءِ زبان گار ء ُ بیگواہ بہ بیت گڈا آ راج ھم روچے نہ روچے گار ء ُ بیگواہ بیت۔
٭ھپتمی سیمینار۔
5جولائی 2019ءَ بلوچ اسٹوڈنٹس ایکشن کمیٹی ڈی جی کان زون ءِ نیمگا چہ کیرئر کونسلنگ ءِ سرا ڈی جی خان ءَ یک سیمینار ے اڈ دیگ بیت، سیمینار ءِ تہءَ ڈی جی خان زون ءِ پاگواجہ ء ُ اِیندگہ زمہ داراں ھوار بازیں استاد ء ُ ایجوکیشنلسٹ بھر زور اَنت ء ُ دیوان ءَ بھر زوروکیں ورنا آنءَ سوج ء ُ سر کن اَنت کہ کیرئر کونسلنگ یک نودربر ے ءِ واستہ چینکس ارزشت داراِیت ء ُ اے چیزیک ورنایے ءِ واستہ چینکس ارزشت داراِیت کہ آ یک ڈیپارٹمنٹ یے ءِ تہءَ روگ ءَ چہ پیسر بزانت کہ من اِے پڑ ءَ روگ ءَ آں،اِشیءِ باندات چے اِنت ء ُ منءَ پرچیءَ اِے نیمگ ءَ روگ ء ُ وانگی اِنت۔ گوشتانک دیوکاں دیمترا تران کنان ءَ گوشت کہ دانکہ ورناآنی کیرئر کونسلنگ مہ بیت آ سرپد نہ بنت کہ آھاں چے وانگی اِنت ء ُ مروچی پاکستان ءِ وانگجاھا نی جاور مئے شُما دیم ءَ اَنت۔
٭ھشتمی سیمینار۔
12 دسمبر 2019 ءَ بلوچ اسٹوڈنٹس ایکشن کمیٹی ءِ بنجاہءِ نیمگا سیمینارے شال پریس کلب ءَ برجم دارگ بیت اِنت۔سیمینار ءِ بنگپ ” نودربرء سیاست ء ُاَستیں جیڑہ”۔ھمے بنگپ ءِ سرا بی این پی ءِ بنجاھی کمیٹی ءِ باسک ھاجی لشکری رئیسانی، نیشنل پارٹیءِ بنجاھی کمک کار گشاد جان مھمد بلیدئی، اے این پی ءِ سوبائی کارمستر اصغرخان اچکزئی،پروفیسر ڈاکٹر منظور بلوچ، بی ایس او ءِ گوستگیں کماش آصف بلوچ، این ڈی پی مرکزی ڈپٹی آرگنائزر شاہ زیب بلوچ ء ُ بلوچ اسٹوڈنٹس ایکشن کمیٹی ءِ بنجاھی کمک کماش ڈاکٹر صبیحہ بلوچ سیمینار ءَ تران کن اَنت۔سیمینار ءِ تہ ءَ گشتانک دیوکاں چاگرد ءِ دیمروئی ء ُ پگری ردوم ءِ تہءَ نودربر سیاستءِ ارزشت ءِ سراگپ ء ُ تران کنان ءَ گوشت کہ بلوچ وانگی اکادمی آں سیاست ءَ چہ دورکنگءِ سوب اِنت کہ مروچی بلوچستانءِ مزن شھدربرجاہءَ ھوارایندگہ ادارھاں بلوچ نودربر وڑوڑیں جیڑھانی تہءَ مانگیشتگ اَنت،بلوچ نودربرانی تہءَ سیاسی بودءِ ھلاس کنگءِ مھکمیں کوشستے کنگ بوئگءَ اِنت،بازیں وھدگیراعلانیہ نودربرانی سرا سیاسی بندش جنگ بوتگ ء ُبازیں وھدءَ اعلانیہ بندش جنگ بوتگ، اشیءَ ابید ایندگہ کسان کسانیں جیڑہ بزانکہ،فیس،ھاسٹل،یونیفارم ء ُایند گہ جیڑھانی تہءَ نودربر دور داتگ اَنت،ھمے سوب اَنت کہ وانگجاہ مزنیں ھدےءَ داں اوشت ءِ آماچ بوتگ اَنت۔ ء ُ وانگی اکادمی آں تہءَ سیاستءِ دوریءِ سوب اِنت کہ نودربر وتی وانگی جیڑھانی سرا ھچ پیمیں پیسلہ زورگءَ نہ اَنت۔ء ُadministrations وتی ھسابءَ ھمک کارءَ دیما برگءَ اَنت، ھمے سوب انت کہ یونیورسٹی اسکینڈل وڈیں شرمناکیں جیڑہ دیما آھگ ءَ اَنت ء ُ آ دگہ مالی کرپشن آں ھوار نودربرا نی ھاترا زرتگیں پیسلہ آ نی تہءَ کہ نودربرا نی ھچ وڈیں رول نیست اِنت،اے دابیں کرداں چہ زانگ بیت کہ سیاستءَ چہ دور بوئگءَ وانگی ادارھاں ھوارایندگہ ادارہ ھم اوشت ءِ آماچ بوتگ اَنت ء ُ کنگ بوئگءَ اَنت۔ ھمے مراگش ءِ دومی بھرءَ یک ٹیبل ڈسکَشن یے بوت، پہ ٹیبل ڈسکشن ءَ ڈاکٹر منظور بلوچ ڈاکٹر دین مھمد بزدار، ثنا بلوچ ساڑی اِتنت ء ُ موڈیریٹر ءِ زمہ واری غنی بلوچ اَت۔ ھمے ٹیبل ڈسکشن ءِ تہءَ اسٹوڈنٹس پولیٹکس ءِ بازیں تک ء ُ پھناتی سرا گپ ء ُ تران کنگ بوت۔
منت وار۔
( اے نبشتانک بلوچ اسٹوڈنٹس ایکشن کمیٹی ءِ تاک “ نوشت “ ءِ بہر اِنت )
Baloch Students Action Committee is a Student political organization that aims to work for the betterment of Education in Balochistan and politicizing the youth
