بلوچستان کتاب کاروان
ادارہ
بلوچ اسٹوڈنٹس ایکشن کمیٹی ءِ بُنکی لوٹ ھمے بوتگ کہ وانگی اکادمی آنی تہءَ نودربرانی جیڑہ ء ُجنجال گیش ء ُ گیوار کنگ بہ بنت ء ُ نودربرانی واستہ یک انچیں پلیٹ پارمے ٹھینگ بہ بیت کہ اودءَ بلوچ نودربرانی علمی، زانشتی ء ُ ساچشتی بودناکی دیماآرگ بہ بنت۔بساکءَ پہ ھمے پگری ردوم ء ُ وتی کَش ء ُگور ءِ چاگردی ء ُ سیاسی پیچیدگیانی ھاترا ورنا ء ُ نودربرانی تہءَ زانگ، پھمگ ء ُ راجدپتری سنچ ودی کنگ ءِ جھدءَ جتا جتائیں مراگشانی بنگیج کتگ۔ لبزانکی ء ُ دودمانی،سیاسی ء ُ چاگردی ء ُ علمی ء ُ زانشتی مراگشاں ھوار وتی چاگردانی تہءَ کتاب ءِ شنگ ء ُ تالانی ء ُ بھر ء ُ بانگی ءِ ھاترا جد ء ُ جھد کتگ۔ بساک ءِ بنیات ءَ چہ ھمے لوٹ بوتگ کہ نودربرانی تہءَ کتاب دوستی ءِ مھر ودّینگ بہ بیت، چیءَ کہ یک راجے وھدے کہ گوں کتاباں مھر ء ُدوستی بہ کنت آ راج ءَ جھان ءِ ھچ پیمیں تاگت دیمروئی ءِ کنگ ءَ چہ داشت کت نہ کنت۔ چوشکہ مروچی بلوچ چاگرد علمی بنیات ءَ نزور اِنت، کتاب ءَ گوں سک باز کمیں مردمانی نزدیکی اَست اِنت،کتاب وانگ ء ُ زانگ ءِ سوچ ء ُ پگر مئے مردمانی میان ءَ سک باز کم اِنت ھمے ھاترا بساکءِ مراگشانی تہءَ درستاں چہ مستریں بھر ”بلوچستان کتاب کاروان“ بوتگ ء ُ ھست اِنت۔
اِدا اے گپ ءِ گشّینگ ھم الم اِنت کہ ھمے وھد ءَ بلوچ اسٹوڈنٹس ایکشن کمیٹی ءَ ”بلوچستان کتاب کاروان“ ءِ مراگش کہ بندات کت، اے وھد ءَ بلوچستانءِ تہ ءَ کتاب ءِ سرا گپ کنگ زند ء ُ مرگ ءِ نیامءَ اوشتگ ء ُ گپ کنگ اَت۔اے نگیگ ء ُ نہ وش اِیں جاور انی تہءَ کتاب ھر کجا گش ئے چو بندیگءَ بندی ءِ آماچ اَت، کتاب برگ ء ُ سوچگ بوئگ ءَ اِتنت، کتابءِ دوست داروک ء ُ وانوک زندانی کنگ بوئگ ءَ اِتنت۔ھمے وھد ء ُ ھمے جاورھالانی تہءَ بلوچ اسٹوڈنٹس ایکشن کمیٹی ءِ سنگتاں وتی کمٹمنٹ ء ُ نظریات ءِ بنیات ءَ ”بلوچستان کتاب کاروان“ ءِ پُر مڑاھیں مراگشءِ بندات کت ء ُ داں روچ ءِ مروچیءَ ھمے مراگش گوں سوبمندی ءَ برجاہ داشتگ۔
بلوچستان ءَ مروچی ھم پہ کتاب وانگ ءِ ھاترا جاور جوان نہ اَنت،بلے ھمے نگیگیں جاور انی تہءَ کتاب وانگ ءِ ماھول جوڑ کنگ، کتاب دوستی ءَ زندگ دارگ ء ُ بلوچستان ءِ کُنڈ کُنڈ ءَ داں مھلوکءَ را کتاب دستءَ دیگ ء ُ ھمے جاورانی تہءَ پہ کتابءِ شنگء ُ تالانی ءِ ھاترا سپر کنگ چینکس جنجال بوتگ یا کہ است اِنت ایشیءَ بساکءِ کتاب دوستیں ورنا مار اِت کن اَنت۔ بلے انچوش کہ بساک ءِ سنگتاں اِے گپ پیسرءَ چہ زانتگ کہ اے سپر ءِ تہءَ جیڑہ ء ُ جنجال ء ُ بزگی ء ُ کواری الم اَست اِنت، ء ُ دومی اے ورنا آنی دلاں اے کتابءِ شنگ ء ُ تالانیءِ تُنّ یے انچیں کہ اشیءِ دیمءَ ھچ پیمیں اڑانداں ھچ وھدءَ مانایے نہ بوتگ۔ پمیشکہ کتاب دوستیں ورنا آنی اے جھد مدام برجاہ بوتگء ُ وتی وس ء ُ واکاں گوں انگت برجاہ اِنت۔
ما وتی اے مراگش ءِ تہءَ چینکس سوبمند بوتگ اِیں۔؟ چینکس کمی ء ُ کوتاھی بوتگ، اِے پیسلہءَ بلوچ راج ء ُ وانندگیں بلوچ ورنابِہ کن اَنت۔ ما پہ راجی بودناکی ء ُ زانشت ءِ ھاترا وتی برجاھیں سپر ءَ مدام ھمے ڈولءَ برجاہ داراِیں ء ُ جھد کن اِیں کہ روچ پہ روچ اِے جھد ءِ تہءَ گیشتریں شری بیار اِیں۔چیءَ کہ مروچی اِیں وھد ء ُ ھالتانی لوٹ ھمیش اِنت کہ ما داں بلوچ چاگرد ءِ تہءَ کتاب دوستی ءِ کلچر ءِ کمکءَ مہ کن اِیں، ما یک جوانیں ء ُ سوبمندیں چاگردے ءِ جوڑ کنگ ءَ سوبمند بوت نہ کن اِیں۔ء ُ اِے بلوچ راجدپتر ءِ تہءَ اولی رند اِنت کہ بلوچستان ءِ تہءَ اِے پیمیں کتاب کاروان برجم دارگ بوتگ۔ ء ُ مارا اِے گپ ءِ سرا بیسہ اِنت کہ بساک ءِ کتاب کاروان ءِ مراگش ءِ بَر بلوچ چاگرد ءِ تہءَ روچے نہ روچے الم رنگ کار اَنت۔
”بلوچستان کتاب کاروان“ ءِ بندات سال2017 ءَ چیئرمین رشید کریم بلوچءِ سروکی ءَ بندات کنگ بیت۔بلوچ اسٹوڈنٹس اسیکشن کمیٹی ءِ سنگت ھمے پیسلہ ءَ کن اَت کہ”بلوچستان کتاب کاروان“ ءِ نام ءَ بلوچستان ءَ کتاب کلچر ءِ دیمروئی دیگ ءِ واستہ بلوچستان ءِ مزنیں شھر شال، ء ُ آئیءَ ھواراِیندگہ مزنیں ھند ء ُ دمگاں مزنیں بک پیئر اڑ دیگ بہ بیت۔
بلوچستان کتاب کاروان ءِ اولی پیز
21 فروری 2017 ءَ شالءِ دمَگ سریاب مِل ءَ یک بک پیئرے جنگ بیت۔مارچ 2017ءَ مستونگ، کلات،ھاران، بسیمہء ُ نوشکیءَ ھم بک پیئر جنگ بیت، چہ اش ء ُ پد پدا مدام ھمے رنگ ءَ شال ءِ وانگی اکادمی آنی تہءَ وھد وھدانی سرا بک پیئر اڑ دیگ بیت۔
بلوچستان کتاب کاروان ءِ اولی پیز ءَ شال، مستونگ، کلات، خاران، بسیمہ ء ُ نوشکی ھوار بنت۔ پہ گَل ء ُ گَل ءِ لیڈرشپ ءَ اے یک مزنیں وشی ءِ ھبرے بیت کہ لس مھلوک ءِ مزنیں کساسے آھانی کتاباں زوراِیت ء ُ بلوچ اسٹوڈنٹس ایکشن کمیٹی ءِ اِے مراگشانءَ ساڑا اِیت ء ُ ھاس بلوچ ورناء ُ نودربر اے بُک پئیرآں باز دوست داراَنت۔ راجءِ لس مھلوک ء ُ ھاس ورنا آنی یک مزنیں کچ ء ُ کساسے ءَ اِے مراگشانی تہءَ بھر زورگ ء ُ کتاب کاروان مراگش ءِ ساڑاھگ، گل ءِ سنگتانءَ اِے گپءِ سکین ءَ دنت کہ بلوچ چاگرد ءِ تہءِ مردم کتاب ءَ دوست اَنت ء ُ آھانی گوراکتاب ءَ ارزشت است اِنت۔
بساک وتی بُک پئیرانی تہءَ گیشاں چہ گیش ھمے جھدءَ کنت کہ کتابانی نھاد ءَ کم ءَ چہ کم بہ کنت،دانکہ یک نودربرے ءِ واستہ یک کتابے ءِ زورگ آئی وس ء ُ واک ءَ چہ ڈن مہ بیت،ھمے ھاترا بساک ءِ سنگت کتابانی نھاد ءَ کتاب ءِ بنیاتی نھاد ءِ نیم نھاد ءَ بھا کن اَنت، دانکہ بلوچ ورنا ء ُ نودربراں ھوار بلوچ راج کمءَ چہ کمیں نھادے ءَ وتی واستہ کتاب زرت بہ کنت۔ اِدا اے گپءِ گشّینگ ھم الم اِنت کہ بلوچستان کتاب کاروان ءِ مول ء ُ مرادانی تہءَ ھچ ڈولیں مالی پائیدگ ھوار نہ بوتگ اَنت ء ُ بساک ءَ چہ اے کاروان ءَ ھچ وڑیں مالی پائیدگ نہ رستگ،اَلبت بلوچستان کتاب کاروان ٹیم ءِ سنگتاں وتی جندءِ زر ء ُ مال پہ اے کاروان ءَ ھرچ الم کتگ اَنت۔
بلوچستان کتاب کاروان ءِ دومی پیز
1،2 نومبر 2019 ءَ بلوچ اسٹوڈنس ایکشن کمیٹی بازیں جھلی ء ُ برزی آں چہ گوزگ ءَ پد وتی اولی کونسل سیشن ءَ برجم داراِیت ء ُ آسر کنت۔ کونسل سیشن ءَ رند سنگتانی مجلس ءَ ھمے پیسلہ زورگ بیت کہ کتاب کاروان ءِ دومی پیز بندات کنگ بہ بیت۔یک رندے پدا بساک وتی کتاب کاروان ءِ مراگش ءَ بندات کنت۔ بلوچستان ءِ ھند ھند ءَ بلوچ مھلوک ءَ کتاب دیگ ء ُ وتی چاگرد ءِ تہ ءَ کتاب وانگ ءِ کلچر ءَ دیما برگ ءَ ھواریک برے پدابلوچستانءِ ھند ء ُ دمگانی تہءَ علمی بنگپانی سرا مراگش اڈ دیگ ء ُ نودربرانی تہ ءَ وانگ ء ُ زانگءِ تران ء ُ باوستی ماھولے جوڑ کنگءِ جد ء ُ جھدءَ بندات کنت۔
21 ء ُ22 ستمبر 2019ءَ لیاری لٹریچر فیسٹول LLF وھدے ”بے نظیر بھٹو یونیورسٹی لیاری کراچی“ ءَ برجم دارگ بیت۔ ھمے فیسٹیول ءَ بلوچ اسٹوڈنٹس ایکشن کمیٹی ءِ ”بلوچستان کتاب کاروان“ ءِ دومی پیز بندات بیتء ُ کتاب کاروان ءِ سپر ءَ برجم داراِیت۔ بلوچ اسٹوڈنٹس ایکشن کمیٹی ءِ سنگتاں کتاب کاروان ءِ سوبمندیں مراگش ءَ گوں اے فیسٹول ءَ یک علمی ماھولے جوڑ کت۔ بلوچ ءِ سیاسی ء ُ لبزانکی دلبند لیاری ءَ بلوچستان ءِ راجدپتر،بلوچ سیاست، بلوچ لبزانکء ُ فلسفہءَ ھوار دگنیا ءِ اِیندگہ علمی کتاب بُک پئیرے ءَ ایر کت اَنت ء ُ کتاب ماں نیم نھادے ءَ لیاری ءِ ورنا آں ھوار اِیندگہ کراچی ءِ لس مھلوک ءَ سر کت اَنت۔
ھمے کتاب کاروان ءِ درچ ءَ برجم دارگ ء ُ اِیشی ءَ گیش مزن ء ُ پراہ ء ُ شاھیگان کنگ، بساک ءِ مستریں مول ء ُ مراد بوتگ،چیءَ کہ گل ءَ اِے گپ ءِ مارشت بوتگ کہ علم ء ُ کتاب دو اَنچیں چیز اَنت کہ آ یک روچی نہ اَنت،بگندئے دانکہ اِے جھان اَست اِنت،آھانی ارزشت ء ُ کدر ھمے وڑا بیت اِنت،روچ پہ روچ کتاب ءِ ارزشت گیش بوت کنت، بلے کجام وھد ءَ یک چاگردےءِ تہءَ کہ کتاب ءِ ارزشت ءِ ھلاس بوت گڈابہ زان کہ آچاگرد دیمروئی کنگ ءِ بدل ءَ پشت ءَ روت ء ُ آراج ھم ھمے رنگ ءَ دیمروئی کنگ ءِ بدل ءَ نزور بوان بیت۔ مروچی اگاں یورپ ء ُ یورپی ملکاں دیمروئی کُتگ گُڈا اودءَ بنیاتی سوب علم ءِ زندگ بوئگ بوتگ۔ فلسفہ ء ُ سائنس یورپ ءِ دیمروئی ءِ بُنکی سوب اَنت۔
ھمے کتاب کاروانءِ سپر ءَ برجم دارگ ءِ ھاترا 6، 7 نومبر 2019 ءَ خضدار ءَ انجیئرنگ یونیورسٹی ء ُ جھلاوان میڈیکل کالج ءَ دو روچی بک پیئرے اڑ دیگ بیت ء ُ اے وانگی اکادمی آنی تہ ءَ نودربر گوں راجدپتری، چاگردیء ُ سیاسی کتاباں گوں ھمگرنچ بنت۔ خضدار کہ یک زمانگے ءَ بلوچ سیاست ء ُ علم ء ُ لبزانک ءِ بن ھشت زانگ بوتگ،بلے مروچی اودءَ کتاب ءِ دست ءَ کنگ یک ترسے جوڑ بوتگ،ھمے اوشت ءِ پروشگ ءِ ھاترا بساک ءَ یک رندے پدا خضدار ءَ کتاب کاروان پروگرام ءِ ردا یک بُک پئیرے اڑدات، بُک پئیر ءِ تہءَ نہ ایوک ءَ خضدار ءِ علمی ء ُ لبزانکی مردماں بھر زرت بگندئے آھاں ھوار خضدار ءِ ورنا ء ُ نودربرانی یک مزنیں کساسےءَ اِے بُک پئیر ءَ بھرزرت ء ُ پہ وت ءَ کتاب زرت۔
اے کتاب کاروان ءِ سپر بلوچ اسٹوڈنٹس ایکشن کمیٹی ءِ نیمگ ءَ چہ یک نہ اوشتوکیں سپرے ء ُ سنگتانی جھد مدام ھمیش اِنت کہ ما بلوچستان ءِ ھمک کُنڈ ءَ وھد وھدانی سرابلوچ نودربر ء ُ بلوچ لس مھلوکءَ کتاب سر بِہ کن اِیں،دانکہ بلوچ ءِ گوں کتاب ءَ یک اَنچیں مھر ء ُ سنگتی یے جوڑ بہ بیت کہ ھچ رنگیں تاکت ء ُ زورآور بلوچ ءَ چہ کتاب ءَ جتا کت مہ کنت۔
ھمے برجاھیں سپر ءِ ردا بلوچ اسٹوڈنٹس ایکشن کمیٹی ءَ 10،11، 2019 ءَ بلوچستان ءِ دمَگ شال ءَ ڈگری کالج سریاب ءَ دگہ یک بُک پئیرے اڑ دات ء ُ اِے بُک پئیرءِ تہءَ ھم گوں کمیں نھادے ءَ کتاب بھا کت اَنت، اِے بُک پئیرءِ تہءَ ھم سریاب ءَ چہ مزنیں کساسے ءَ بلوچ ورناء ُ اودءِ کالج ءِ نودربراں بھر زرت ء ُ یک مزنیں کچے ءَ بازیں کتابے بھا بوت، پیسرگیں پیم ءَ اِے رندا ھم لبزانک،سیاست، معشیت ء ُ دگہ علمی کتاباں اے بُک پئیرسمبہ ئینتگ اَت۔
ھمے سپر ءَ دیمءَ برانءَ بلوچ اسٹوڈنٹس ایکشن کمیٹی 11، 12،13 نومبر 2019 ءَ تربت عطا شاد ڈگری کالج ءَ،یک بُک پئیرے برجم داراِیت۔اے بُک پئیرءِ تہءَ لبزانک، نیکراہ، فلسفہ،سیاستء ُ راجدپترءَ ھوار وانگی تکءَ دگنیا ءِ گچینی ء ُ جوان جوانیں کتاب ایر کنگ بوتگ اَتء ُ پیسرگیں پیم ءَ اے کتابانی نھاد ھم نیم نھاد کنگ بوتگ اَت دانکہ بلوچ ورنا، نودربر ء ُ لس مھلوک پہ وت ءَ کتاب زرت کت بہ کنت۔ ھمے رنگ ءَ عطا شاد ڈگری کالج ءَ داں سئے روچ ءَ اے مراگش ءِ آسری ءَ پد تربت یونیورسٹی ءَ ھم بلوچ اسٹوڈنٹس ایکشن کمیٹیءَ یک بُک پئیرے اڑ دات ء ُ اودءَ ھم یک مزنیں کساسے ءَ بلوچ ورنا ء ُ نودربراں ھوار استاد ء ُ اِیندگہ تکاں چہ سیادی داروکیں مردماں بھر زرت ء ُ بلوچ اسٹوڈنٹس ایکشن کمیٹی ءِ کتاب کاروان گوں مھراں ساڑات۔ یقینا اے مراگش پہ بساکءَ یک مزنیں سوبمندی یے۔
بلوچستان ءِ اِے ھند ء ُ دمگاں ھوار دگہ بازیں اَنچیں ھند ء ُ دمَگ اَست اَنت کہ آ نیمگاں ھچ رنگیں سیاسی ء ُ لبزانکی گلاں دلگوش گور نہ کُتگ ء ُ یک مزنیں مھلوکے اَنچو سرپد بوتگ کہ اے ھند چہ بلوچستانءَ سستگ اَنت، ھمے کمی ءِ مارگ ءَ پد بلوچ اسٹوڈنٹس ایکشن کمیٹی ءَ اِے پیسلہ زرتگ کہ زوتاں چہ زوت بلوچستانءِ ھمک دمگاں بُک پئیراڑ دیگ بیت ء ُ بلوچ ورنا ء ُ نودربراں ھوار بلوچ لس مھلوکءَ،بلوچ راجدپتر ء ُ سیاست ءَ ھوار دگنیا ءِ راجدپتر ء ُ اِیندگہ دنیاءِ جوان جوانیں وانگی سر کنگ بنت۔
ھمے پیسلہ ءَ رند بلوچ اسٹوڈنٹس ایکشن کمیٹی وتی برجاہ داشتگیں کتاب کاروان ءِ درچ ءَ دیم بران ءَ18 ء ُ19 دسمبر ءَ صحبت پور ءَ یک کلچرل فیسٹیول یےء ُ 30 دسمبر ءَ روجھان مزاری راجن پور ءَ بک پیئر اڑ دنت ء ُ کمءَ چہ کمیں نھادیءَ اودءِ وانوک ء ُ مھلوکءَ جتا جتائیں بنگپانی سرا کتاب سر کنت۔
بلوچ اسٹوڈنٹس ایکشن کمیٹی ءِ کتاب کاروان ءِ مول ء ُ مراد تھناکتاب ءِ سر کنگ نہ اِنت بگندئے آئیءَ ھوار بلوچءِ پد منتگیں چاگردءَ را علم ء ُزانتءِ نیمگءَ آرگ اِنت۔ بلوچ ورنا آنی میان ءَ یک نزدیکی ءِ جوڑ کنگ اِنت،چیءَ کہ دانکہ بلوچ ورنا وتی راجدپتر سیاست ء ُ لبزانک ءَ سرپد نہ بنت بلوچ چاگرد ءِ تہءَ بدلی آورت نہ کن اَنت، یک چاگردے ءِ مٹ کنگ ءِ واستہ المی اِنت کہ چاگرد ءَ گوں بندوکیں ورنا ء ُ نودربر گوں کتاباں نزدیکی بکن اَنت۔ اگاں مئے ورنا ء ُ نودربر گوں کتاباں دوستی بہ کن اَنت گُڈا آ بلوچ ءِ میان ءَ نزدیکی پیداک کُت کن اَنت ء ُ بلوچ ءِ اڑ ء ُ جنجالاں سرپد بوت کن اَنت۔مروچی ھم بلوچ اسٹوڈنٹس ایکشن کمیٹی ءِ ”بلوچستان کتاب کاروان“ ءِ مراگش یکشلہ برجاہ اِنت ء ُ بلوچستان ءِ وانگی اکادمی آں ھوار بلوچستان ءِ بازیں ھند ء ُ دمگاں مراگش اڑ دیگ بوئگءَ اِنت۔مار ءَ ا ُمیت اِیں کہ بلوچ اسٹوڈنٹس ایکشن کمیٹی ءِ پگری سنگت اے کاروانءَ ھمے پیم برجاہ دار اَنت ء ُ ایشیءَ را گیش دیمروئی دینت۔
دلگوش: اے نبشتانک بلوچ اسٹوڈنٹس ایکشن کمیٹی ءِ تاک “ نوشت “ ءِ تہا چھاپ بوتگ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
