زمانہ ٹی اندا نشان ئے ننا۔۔۔براہوئی،بلوچی زبان ئے ننا
گشتانک.. ڈاکٹر منظور بلوچ | پٹ ءُپولکار.. الطاف مینگل
اے گشتانک پروفیسر ڈاکٹر منظور بلوچ ءَ بلوچ اسٹوڈنٹس ایکشن کمیٹی ءِ اولی کونسل سیشن ءِ سوگندی دیوان ءَ داتگ۔ اے گشتانک ءِ دُرستیں گپ ء ُ ھبر پروفیسر ڈاکٹر منظور بلوچ ءِ جندے ھیال ء ُ لیکہ اَنت اے گشنتانک ءِ ہچ گپ ء ُ ھبر ءِ ذمہ وار ادارہ نہ اِنت۔
من بلوچ اسٹوڈنٹس اکشن کمیٹی ءِ کؤنسل سیشن ء ُ نوک گچین بوتگیں کُلیں سنگتاں مراد باتی دیاں ء ُ اے اُمیت کن آں کہ آ اے نزوراِیں وھد ء ُ جاوراں پہ وتی راج ءِ آکبت ءِ گِھتری ءَ ھر ھما گامگیجاں زور اَنت کہ آ اے وھد ءَ مئے راج ءِ گھتری ء ُ وشی ءَ گوں بندوک بنت۔
من شمئے کُلّانی منت وار آں۔۔۔۔!
پہ من اے ارزان نہ اِنت کہ مروچیگ اِیں اے مراگش ءَ گوں ھم تران بہ باں چیءَ کہ اے مراگش ءَ بلوچ راج ءِ وانندگ ء ُ زانتکاریں مردم ھوار اَنت ء ُ من اے واجھانی گوں دل ءِ جھلانکی ءَ شرپءَ کن آں۔ مراگش ءَ واجہ ازیز بُگٹی، واجہ مبارک کازی، ڈاکٹر دین مھمد بزدار، واجہ اے آر داد، واجہ سلیم کُرد ء ُ واجہ سدّیک بلوچ نندوک ء ُ ساڑی اَنت۔ بلئے چوشکہ شما منءَ را اے شرپ ء ُ زمہ واری داتگ کہ مراگش ءَ گوں ھم تران بہ باں پمیشکہ لھتیں دانک گوش آں۔
من اے سرپد باں کہ مروچی ما ھما چار راہ ءَ اوشتوک اِیں یا ھما جاہ ءَ کہ وھد ءَ مارا سر کتگ ء ُ ھما سکّی ء ُ جنجالانی کہ ما دیمپان اِیں، اے رِد ءَ بلوچ اکشن کمیٹی ءِ کہ نوکیں کابینہ اَتکگ پہ آھاں اے یک پُلانی گرنچے نہ اِنت،بگندئے اے زندءِ یک کُچّلیں چکّاسے۔ مروچی ما گوں اَنچیں جاوراں زندگی کنگ ءَ اِیں کہ گریوگ وتی جاگہ ءَ،گِلگ کنگ ءِ موکل اوں نیست اِنت۔ ما گریوگ لوٹ اِیں، کوکار ء ُ جاک کنگ لوٹ اِیں بلئے مارا ایشی ءِ اوں موکل نیست اِنت۔لھتیں وھداں چہ پیسر یک کسے ءِ زانگولیں جونے دست کپتگ اَت۔ آئی ءِ ناکو آئی ءِ جون ءِ دیم ءَ نشتگ ء ُ گریوگ ءَ اَت، پدا آ ھم دزگیر کنگ ء ُ بیگواہ کنگ بوت کہ تو وتی برازتک ءِ مرگ ءَ پرچی ءَ پُرسیگ ءِے۔؟ من وتی دوست ء ُ ھمبلانی مرگ ءَ گراِیت اوں نہ کن آں۔ ما اے روچاں اوں گندگ ءَ اِیں۔
اے زی اِیں روچ ءِ گپے، مارا ء ُ شمارا کُلاں شر یات اِنت کہ وھدے ھُزدار(خضدار) ءَ مردمے کُشگ بوت،چہ تُرس ء ُ بیم ءَ کس پہ آئی ءِ ھال پُرسی ءَ اوں ساڑی نہ بوت۔ما اے روچاں اوں گندگ ءَ اِیں۔ ھما ھلک ء ُ میتگ کہ اود ءَ گیس، تیل، سُھر، تانبا ء ُ یورینیم ھست اِنت اودءَ مئے ھال ایش اِنت کہ ما (یکے دومیءِ)ھال پُرسی یے اوں کُرت نہ کن اِیں۔ پہ وتی دوست ء ُ ھمبلاں گریت اوں نہ کن اِیں۔ پہ بیگواھیں مردماں زھرشانی ء ُ پہ آھاں توارے اوں چِست کُرت نہ کن اِیں۔
چے ایشی ءَ زند گوش اَنت۔؟ ما زندگیں چاگردے ءِ بھر اِیں۔؟ ما ھک ء ُ دل زندگ اِیں یا کہ پَل پٹان ءَ مرگ ءِ آماچ بوان اِیں۔؟ کئے بِہ زانت۔۔۔!مروچی مئے مڑّی پہ مئے ساہ ءَ وبال جوڑ بوتگ اَنت۔ مروچی بلوچستان ءِ کارشونی ءِ جاور (اسٹریٹجک پوزیشن)، مروچی آئی ءِ بندن (بندرگاہ)، آئی ءِ تیاب، آئی ءِ زِر، آئی ءِ مڑّی، دراہ پہ بلوچاں یک تُرس ء ُ بیمناکیں ندارگے پدّر کنگ ءَ اَنت کہ گوستگیں دور ء ُ باریگاں بلوچاں چوشیں درور نہ دیستگ۔ راج جنجالانی آماچ بنت، راجانی ھستی ء ُ وجود ءَ تُرسناک بیت بلئے اگاں یک راجے زندگ اِنت گُڑا آ وتی زندگ ء ُ ھست بوئگ ءِ منّاک ءَ اوں دنت۔
وھدے کہ جھلاوان ءَ انگریز سرکار ءِ ھلاپ ءَ سلاہ بندیں جُھد برجاہ اَت،ھمے نیام ءَ سیوی (سبی) ءَ مئے سرداراں انگریزانی اَسپ مھار کُت اَنت۔ وھدے کہ شائراں آھانی کِرد ء ُ راز پاشک کت اَنت،گُڑا آ درانڈیھ کنگ بوت اَنت۔ آ سرداراں اے سرپدی نیست اَت کہ یک اَنچیں دور ء ُ باریگے کیت کہ آھانی وتی پُسّگ پہ آھانی اے کرد ءَ اجالت بنت۔ آھانی کتگیں سِلّ اِیں کارپداں پہ وت ءَ لج ء ُ بے ننگی یے لیک اَنت ء ُ گوش اَنت کہ مئے پت ء ُ پیرک بے آپ ء ُ رُزوا بوتگ اَنت کہ آھاں انگریزانی اَسپانی مھار دست ءَ بوتگ اَنت۔ اگاں آ زمانگ ءَ اے بارو ءَ گپ نہ بوتگ بلئے مروچی اے بارو ءَ گپ یکشلہ برجاہ اِنت۔
مروچی ءَ چہ پنجاہ سال ءَ پد مئے پدّریچ ء ُ اوبادگ پہ ما چے گوش اَنت۔؟ کہ وھدے بلوچستان ءَ آس ء ُ ھون شلگ ءَ اَت، مردماں گپ ءِ اوں موہ نیست اَت، مئے سیاسی گَل، مئے نامی اِیں کوّاس، نامی اِیں اُستاد چے کِرد پیلو کنگ ءَ اِت اَنت۔مروچیگیں ڈول ءَ کہ ما نندوک اِیں پنجاہ ء ُ شست سال ءَ پد ھمے داب ءَ گُشتانکی دیوانے بیت، چیزے مردم کیت ء ُ تران کن اَنت ء ُ گوش اَنت کہ بلوچستان ءِ ھمک گِس ء ُ لوگ بُن اَت۔ وھدے کہ اورماڑہ ءَ بگر داں گوادرءَ آبادی مٹ کنگ بوئگ ءَ اَت گڑا بلوچستان نیشنل پارٹی شش نُکات ءِ ڈُھل ءَ جنگ ءَ اَت۔ نیشنل پارٹی پہ اے گپ ءَ واہ ء ُ زار ءَ اَت کہ مئے ھلاپ ءَ کیس کنگ بوئگ ءَ اِنت۔
پہ اے ھاترءَ کہ تئی کِرد سرجم بوتگ ء ُ نوں تئی ھچ پکار نہ اِنت۔ وھدے کہ پکار نہ بَہ ئے گُڑا ھال ھمیش بیت کہ مروچی نیشنل پارٹی ئیگ اِنت۔ اگاں مئے سرداراں اَسپ مھار کُت اَنت،گُڑا ڈاکٹر مالک ءَ گوں جرنیلاں نشت پندل ساز اِت ء ُ مئے جُھد ءِ راہ اڑانگیگ کت۔ بلوچستان نیشنل پارٹی گوں وتی شش اِیں نُکاتاں مھلوک ءَ رد دیگ لوٹ اِیت کہ لٹ مہ پُرش اِیت ء ُ مار اوں بِہ مر یت۔ یک نیمگے ھما گَلانی بھر اَنت کہ آھاں ما پہ وت ءَ بگاوت لیک اِیں،چوکہ امران ھان(عمران خان) ءَ۔
گوستگیں روچاں من یک نبشتانکے وانگ ءَ اِت آں، اود ءَ نبشتہ اَت کہ اے گپ تچک اَت کہ ستمبر ءِ گُڑسر ءَ سرکارءَ آسپ زرداری دزگیر کنگی اِنت۔ اگست ءِ گُڑّی روچاں آئی ءِ نیادے گوں یک مزن نامیں مردے ءَ بوت ء ُ چہ آئی ءَ پد آھاں وتی سداراتی امیت وار دیم ءَ آؤرت۔ اگاں پیپلز پارٹی ءِ سدارتی امیت وار مہ بوت اِیں، گُڑا اے گپ ءِ گمان ھست اَت کہ اپوزیشن ءِ امیت وار ءَ باج بِہ بُرت اِیں، بلئے آسپ زرداری ءَ چہ وتی دزگیری ءَ رکّگ ءِ ھاتر ءَ وتی اُمیت وار نیام ءَ آؤرت ء ُ اوشتارینت۔ اپوزیشن ءِ امیت وار بے سوب بوت ء ُ آرپ الوی(عارف علوی) سدر جوڑ بوت۔ من اے گپ ءِ منوگر آں کہ آسپ زرداری ءَ چہ وتی دزگیری ءَ رکّگ ءِ ھاتر ءَ ساز ء ُ بازے کت۔
بلئے واجہ اکتر مینگل تو کُجام ساز ء ُ باز کتگ کہ تئی اے چاریں سِیٹانی برورد ءَ سرجمیں سرکار ٹکّ اِتگ۔ آئی ءَ وَ نپ رست ء ُ سوبین بوت بلئے تئی نپ چے اِنت۔؟ ء ُ تو اے سرجمیں ھُنر ء ُ ھیلہ آں سرپد نہ بوئگ ءَ ئے۔؟ یا تئی اے گوشگ اِنت کہ نیشنل اکشن پلان پیلو کنگ بہ بیت ء ُ اے تئی شش اِیں نُکاتاں ھوار اِنت۔ یا تئی شش نُکات ودّ اِتگ اَنت نُھ نُکات ءَ سر اَنت ء ُ آھانی تہءَ اے اوں ھوار اِنت کہ نوشکی ءَ بگر داں تپتان ءِ دگ دو(۲) راہ کنگ بہ بیت۔ مئے جیڑہ ھمیش اِنت کہ نوشکی ءِ دَگ دو راہ کنگ بہ بیت۔؟ پہ اے ھاتر ءَ کہ ھمے لُٹ ء ُ پُل کہ برجاہ اِنت گیش بہ بیت۔ جُست کنوک نیست۔۔۔! بلوچستان اسمبلی ءَ یک مردمے کہ وش گپے ء ُ چرپ زُبانی ءِ ھُنر ءَ بلد اِنت بلوچ نودربر آئی ءَ را یک مزنیں کواس ء ُ زانتکارے سرپد بنت۔ چے سناء بلوچ ءِ وش گپی بلوچ ءِ جیڑہ ء ُ جنجلانی درمان اِنت۔؟ دگہ مردماں گپ ءِ اوں موکل نیست اِنت بلئے سناء بلوچ ءِ ڈولیں مردماں ھچ گِر ء ُ نر پِر نیست۔
انچوشکہ واجہ ڈاکٹر بُزدار ءَ گوشت ”کُجام مال ء ُ مڑّی۔؟“ پہ تو نوں چے پشت کپتگ۔ شالکوٹ چہ ترا سِستگ، کراچی تئی شھر اَت چہ تو سِستگ، بندن اوں تئی دست ءَ نہ اِنت، اود ءِ نندوکیں جانشو ء ُ ماھیگیر باندا در کنگ بنت، اورماڑہ تئی نہ اِنت، ھرچی کے ھلک ء ُ میتگ ھست اَنت اود ءَ دری مردم جاہ دیگ بوئگ ءَ اَنت، ڈگارانی ڈگار درامداں دیگ بوئگ ءَ اَنت، اے کہ تیاب دپی شاھراہ (کوسٹل ھائی وے) جوڑ کنگ بوتگ شمئے چماں پدّر اِنت کہ مروچی کراچی ءِ نندوک اود ءَ ترگ ء ُ سئیل ءَ کاینت۔ بانداتی اِیں روچ ءَ تئی نام ء ُ نشان اوں گار بیت۔
مئے جیڑہ ھمینچو پشت کپتگ کہ ما چار مردم پارلیمان ءَ دیم بہ دئیں ء ُ آھاں زردار ء ُ مالدار جوڑ بہ کن اِیں۔! راجدوستی ء ُ راج شناسی ھمیش پشت کپتگ کہ ما گوں ھما مردماں ھوار بہ کپ اِیں کہ چہ آھاں بلوچ راج ءِ ھستی ء ُ وجود ءَ ھتر اِنت۔ مئے نمیرانیں مردماں پمیشکہ وتی ساہ ندر کُرتگ اَنت کہ ما پارلیمان ءِ بھر بِہ بَہ اِیں۔؟ما اے درگت ءَ سدک اِیں ء ُ ھمک ھما مردم کہ پارلیمان ءِ پلہ مرزی ءَ کن اَنت آ اوں سرپد اَنت کہ بلوچستان اسمبلی ءِ لوٹ سیاھگاں (کرارداد) اسلاآباد ءَ یک سکشن آپیسرے چار اِیت ء ُ نواب اسلم رئیسانی اوں اے گپ ءِ منوگر اِنت۔ شمئے بستار ھمیش اِنت۔ ماں اسلام آباد ءَ سردار رِند دیوان ءِ نیام ءَ چہ کُرسی ءَ پاد کنگ بیت۔ اے نواب ء ُ سرداراں اسلام آباد ءِ دیوان ءَ ھچ بستار نیست اِنت بلئے ھمے مردم وھدے کہ بلوچستان ءَ سر بنت گڑا پہ بزگریں بلوچاں پراَون (فرعون) جوڑ بنت۔ پہ وتی جند ءِ راج ء ُ الس ءَ زوراک بنت۔ چوشیں گھگیر ء ُ کُنگر نہ گواہ اِیت کہ ایشانی دیم ءَ بہ دار اِیت۔ چوشیں مردم اوں ما دیستگ کہ آھاں کُٹمی (قبائلی) جنگ ءِ نام ءَ ھزارانی کساس ءَ مردم کُشتگ اَنت۔ سراوان ء ُ جھلاوان ءِ سراداراں لوٹ اِت کہ آھانی نیام ءَ سلاہ ء ُ میڑ بہ بیت آھاں اے گپ نہ من اِت۔ بلئے وھدے کہ یک جرنیلے ءَ اتک ء ُ گوشت کہ مروچی ءَ پد جنگ بند گُڑا یک ء ُ ٹک ء ُ ھمے ڈول بوت۔
کُجا شُت بلوچیت۔۔۔؟کُجا شُت ننگ۔۔۔؟کُجا شُت تئی کول کہ من کُٹمی (قبائلی) مردمے آں۔ما یک گوتاچی (ریس) یے ءِ بھر اِیں۔ ھمک مردم ءِ جھد ء ُ کوشست ھمیش اِنت کہ وتی واجہ ءَ وشان بہ کنت۔ وتی وپاداری ءَ پیش بہ دار اِیت کہ واجہ چہ من وش بہ بیت۔ ھما چاگرد ءَ کہ یک کسان سنداِیں واکدارے (نرسنگ اردلی) کمشنرے مٹ بہ کنت ء ُ دگہ جاھے روان بہ دنت اود ءَ انساپ ء ُ ھک ءِ اُمیت دارگ۔۔۔!! اے چونیں گپّے۔۔۔؟ مروچی گوں شؤربندی ءَ کار برجاہ اِنت کہ چے ڈول مئے چاگرد گَرک ء ُ گار کنگ بہ بیت۔یک جاھےءَ مئے آبادی کم کنگ بوئگ ءَ اِنت۔ یک جاھےءَ مئے مردم کرپٹ کنگ ءَ بوئگ ءَ اَنت۔ یک جاھےءَ مئے ھمک ھما رھشون ء ُ سروک کہ پہ راج ءَ ھدوک اَنت کُشگ ء ُ بیگواہ کنگ بوئگ ءَ اَنت، چیءَ کہ آ ایشانی بھر جوڑ بوئگ ءَ پہ ساڑی نہ اَنت۔
پہ اے ھاتر ءَ کہ بلوچ راج ءِ کرّا چوشیں مردم پشت مہ کپ اِیت کہ آ مئے چاگرد ءَ توان بہ کن اَنت۔ مئے سرڈگار ءَ انسانی مڑّی (ھیومن ریسورس) ءِ کمی اِنت ء ُ اے کمی گیش بہ بیت ء ُ چاگرد ءِ توان کنگ ء ُ منزلے نیمگ ءَ برگ بلوچ راج ءِ وس ء ُ واک ءَ چہ ڈن بہ بیت۔
وھدے کہ مردمے کُشگ یا بیگواہ کنگ بیت ما اے گپ ءَ جن اِیں کہ واجہ سیاسی مردمے بوتگ یا کہ واجہ ءِ گوں پِلاں سیاسی گَل ءَ سیادی بوتگ ء ُ ما آئی ءِ کُشگ ء ُ بیگواھی ءَ سیاست لیک اِیں۔ بلئے اے ڈول ھجبر نہ اِنت۔ ما گند اِیں اگاں کسے شالکوٹ ءَ روزگار ءَ اِنت یا کسے ٹرانسپورٹے ءَ کار ءَ اِنت یا دگہ کسے کُجام ھم کارے ءَ گوں ھمگرنچ اِنت آ اوں برگ ء ُ کُشگ بوئگ ءَ اِنت۔ اُستاد ء ُ زانتکار اوں کُشگ بنت۔
پہ درور واجہ سبا دشتیاری۔۔۔۔۔ پرچیءَ۔۔۔۔؟پمیشکہ کہ بلوچانی کرّا لائک ء ُ زانتکاریں مردم پشت مہ کپ اِیت۔ اے بزگر ء ُ نیزگار اَنت ھمے ڈول ءَ زندگ بہ بنت ء ُ ھجبر ازگار مہ بنت۔مروچی گوں شؤربندی ءَ مئے ورنا دیم ءَ آرگ بوتگ اَنت ء ُ آھاں راجدوست پیش دارگ بوئگ ءَ اِنت ء ُ آھاں وڑ وڑ ءَ دلبڑّی دیگ بوئگ ءَ اِنت۔ آھاں کار گرگ ءَ اَنت ء ُ راج ءَ باور کنائینگ لوٹ اَنت، گوش ئے مئے دُراھیں جیڑہ ء ُ جنجالانی درمان ھمیشاں گون اَنت۔ بلئے بُن ء ُ اسل ءَ اے سرکار ءِ مردم اَنت۔
یک کسے ءَ جوان گشتگ اَت ”پاکستان ءِ کہ اے پانزدہ ء ُ بیست ھزار سیاسی مردم گندگ بنت ایش بُندر ءَ ھما کہ بُن ء ُ اسلیں ھکمران اَنت ھماھانی کاردار اَنت۔ دل اش لوٹ اِیت ایشان ءَ کرسیانی سرا نادین اَنت ء ُ دل اِش لوٹ اِیت چہ اُگدھاں زبھر اش کن اَنت۔“ ایشاں گوں چے گلگ کن ئے کہ اے وت کاردار اَنت۔ پدّریں گپے، اے ھما کاراں کن اَنت کہ ایشان ءَ گوشگ ء ُ زر دیگ بہ بیت۔
یک جاھےءَ سورت ھان مری نبشتہ کنت”پنجاھُمی دھک ءِ گپ اِنت کہ چہ سوئی ء ُ ڈیرابُگٹی ءَ لھتیں وڑیرہ اسلام آباد ءَ رو اَنت ء ُ اے گوش اَنت چوشکہ مئے راج ءِ کرّا گیس نیست اِنت پمیشکہ ھدا ءِ داتگیں اے نیامت مارا اوں دیگ بہ بیت گوں۔ اود ءِ بیوروکریسی پدّر اَت کہ آھانی تب اوں چو پراَون (فرعون) ءَ اِنت وت ما وت ءَ شؤر کن اَنت ء ُ گوش اَنت کہ اگاں ما سوئی ء ُ ڈیرا بُگٹی ءَ گیس پُجارینت، اے جاھل ء ُ ناوانندگ اَنت، اے وتی لوگ ء ُ گِساں سوچ اَنت۔“
بلئے آ چہ اے گپ ءَ ششمکار اِت اَنت کہ یک روچے کیت اے گوں زانت وتی لوگاں سوچ اَنت ء ُ مروچی وتی لوگاں سوچگ ءَ اَنت۔
مروچی پاکستان ءِ ھکمران اے گپ ءِ منوگر اَنت ء ُ جوانی ءَ سرپد اَنت کہ پاکستان ءَ چہ تالبان ءَ تُرس(خطر) نیست، چہ نیکراھی (مزہبی) ءِ گَلاں ترس نیست، چہ پی ٹی ایم ءَ اوں ھچ ڈولیں ترس نیست۔ اگاں پاکستان ءَ ترسے ھست گڑا آ چہ بلوچ ءَ اِنت۔ چہ ھما بلوچاں کہ تو آھان ءَ جٹّ ءِ نام دات، چہ ھما بلوچاں کہ تو گوشت ایشاں دود ء ُ ربیدگ نیست۔ اے جنگلی مردم اَنت ھچ نہ زان اَنت۔ بلئے مروچی بلوچ راج یک بہ سما ء ُ سرپدیں جنگے کنگ ءَ اِنت۔
منی شھر ءِ چہ ھما مردماں، چہ ھما پی ایچ ڈی ء ُ واننددگاں وَ ھما مردم شرتر اَنت کہ آھانی لوگ ء ُ گِسانی سرا ارش کنگ بوئگ ءَ اِنت۔ منی پی ایچ ڈی کنوک گوں وش ء ُ وشھالی وتی ماڑی ءَ نشتگ ء ُ آئی ءَ ھچ رنگیں جنجال نیست۔ آئی ءِ گوش ءَ مورے اوں نہ وارت۔ ء ُ پدا ھما مردم کہ آھاں ما جاھل ء ُ نا وانندگ لیک اِیں آھانی لوگانی سرا پرچیءَ ٹوپ گواری اِنت۔؟ ایشی ءِ بزانت ھمیش نہ اِنت کہ آ گیش سرپد اَنت۔؟ آھانی کرّا رسمی زانت نیست اِنت بلئے گوں وتی کرد ء ُ کاراں گیش زانتکار اَنت۔ زانت ء ُ سرپدی راجانی جنجالاں گیشوار کنت۔ مروچی یونیورسٹی باز اَنت، کالجانی کَچ گیشتر اِنت، اسکولانی کچ سک باز اِنت بلئے انگت بے زانتی ء ُ ناوانندھی ءِ کَچ ء ُ کساس گیش تراِتگ۔
مارا کجام دابیں زانت ء ُ سرپدی دیگ بوئگ اِنت۔؟ اے درگت ءَ ما دنیگہ نہ جیڑ اِتگ۔ مارا اے سرپد کنگ بوئگ ءَ اِنت کہ مارا پوزیشن گرگی اِنت۔ زانت ء ُ سرپدی ایوک یک گوتاچی یے جوڑ کنگ بوتگ کہ چریشی ءَ ما رسمی زانت وَ دربر اِیں بلئے انسان ھجبر جوڑ نہ بَہ اِیں۔ اے وانگ ء ُ زانگ ءِ پُشدر ءَ ھنچیں گُلام ء ُ تابیدار جوڑ کنگ لوٹ اَنت کہ آ جُست کت مہ کن اَنت۔ ء ُ وھدے کہ جُست کت نہ کن اَنت آ دو تل ء ُ دو پوست(مُناپک) جوڑ بنت۔ وھدے کہ یک چاگردے ءَ دو تلی ء ُ دو پوستی بہ بیت، تابیداری بہ بیت، وتواھی (خودغرضی) بہ بیت آھانی ھال ھمیش بیت کہ مروچی ما گندگ ءَ اِیں۔
لاڑ میکالے وھدے کہ وانگی ء ُ زانگی رھبندے پہ ھندوستان ءَ رد ء ُ بند دنت،آئی ءِ بُنکی مول ء ُ مراد ھمیش بیت کہ ھندوستان ءَ گیشاں چہ گیش کلرک جوڑ کنگ بہ بیت بلئے مروچیگیں وانگی ء ُ زانگی رھبند ء ُ اے زانت انسان ءَ را کلرکے اوں جوڑ کت نہ کنت۔ وھدے چہ یک چاگردے ءَ کہ آئی ءِ دود پچ گرگ بہ بنت، آئی ءِ مُول ء ُ مراد پچ گرگ بہ بنت، چہ وتی جندئے لبزانک ءَ زبھر کنگ بہ بیت، آئی ءِ شائری پُلگ بہ بیت ء ُ ایوک ءَ زر ء ُ کلدار ءِ نیمگ ءَ سردیگ بہ بیت کہ تئی دود زَر ء ُ مال، تئی لیکہ زَر ء ُ مال، گُڑا اے داب ءَ چاگرد ھما رُزوائی آنی آماچ بنت کہ مروچی ما آماچ اِیں۔ راج ءِ ھمک ورنا ء ُ کماش زر ء ُ تماہ ءِ رند پداں کپتگ۔ بلوچ بیوروکریسی پہ اے چیز ءَ دلاپ اِنت کہ شریں اگدھے بہ رس اِیت ء ُ من زر ء ُ مال بہ کٹّ آں۔ ما وتی پُسگاں اے واستہ وانین اِیں کہ ڈاکٹر ء ُ انجینئر جوڑ بہ بنت ء ُ لُٹ ء ُ پُل کرت بہ کن اَنت ء ُ ماڑیانی واھند بہ بنت۔ چہ وانگ ءَ مئے مول ء ُ مراد ھمیش اِنت کہ مارا اَنچیں روزگارے بہ رس اِیت کہ چہ نپ ء ُ سیتاں سرریچ بہ بیت۔ ما ھجبر اے واستہ وانگ ءَ نہ اِیں کہ جوانیں انسان جوڑ بِہ بَہ اِیں، جوانیں زندے بہ گوازین اِیں۔
مروچی جھان ءِ ایدگہ مُلک ء ُ راجانی درور مئے دیم ءَ اَنت کہ آھانی کرّا وتی گوستانک ھست اِنت، آھانی کرّا لبزانکی مردم ھست، تامر، زیمر ء ُ تماشاجاہ (تیھیٹر) ھست اَنت بلئے ما بہ چار اِیں کہ مئے گورا چے ھست اِنت۔؟ سد ھیپ اِنت کہ مئے گورا ھچ نیست اِنت کہ چہ آھاں جھان مروچی آشکار اِنت۔ما مروچی اوں وتی شائران ءَ لوڑی گوش اِیں۔۔! ما مروچی اوں وتی ساچشتکاران ءَ لوڑی گوش اِیں۔۔! اے تژن یک درامدے ءِ نہ اَنت مئے وتی بلوچ چاگرد ئیگ اَنت۔ما مُدام وتی ردی ء ُ نزوریانی سَوب ڈنّی مردم لیک اِتگ اَنت بلئے ما ھجبر اے جُھد نہ کُرتگ کہ وت بلوچ راج ءِ تہءَ کُجام ردی ء ُ ھرابی ھست اَنت کہ آھانی سَوب ءَ مروچی مئے یک تبکہ یے جنجالانی آماچ اِنت۔ اے گپ ءَ اوں یات بہ کن اِت کہ داں کہ مئے کرّا مزن ء ُ ٹوھیں لبزانکے نہ بیت ما سوبین نہ بَہ ایں، چیءَ کہ پہ راج ء ُ چاگردے ءِ دیمروئی ءَ لبزانک ھژدری اِنت۔
منی یک اوگان سنگتے ءَ یک رندے یک جوانیں کسّہ یے آرت ء ُ گوشت ”گنی ھان کہ ھدامرزی اِیں باچاھان ءِ چُک اِنت آئی ءَ دائم اے پنت دات کہ تاں وھدے اوگانانی کرّا ماں آھانی وتی زُوان ءَ یک مزنیں کساسے ءَ ردانک مہ بیت آ سوبین نہ بنت ء ُ دیمروئی نہ کن اَنت۔ آ وھد ءَ ما سرپد نہ بوت اِیں کہ اے گپ ءِ پشدر چے اِنت بلئے مروچی اے گپ گیش اِتگ کہ ردانک پرچیءَ الم اِنت۔“
نوں ما بہ جیڑ اِیں ء ُ بہ چار اِیں کہ بلوچ راج سرپد بوتگ کہ راجانی جُھدانی تہءَ لبزانک یک چونیں مزنیں ارزشتے دار اِیت۔ مروچی ما جنگول ء ُ کُنگر جوڑ کنگ ءَ اِیں، پہ آھاں ھرچ ء ُ درچ اوں کنگ ءَ اِیں بلئے ما اے گپ جیڑ اِتگ کہ پہ لبزانک ءَ اوں ھرچ ء ُ درچ کنگ بہ بیت۔؟ لبزانکی مردم جوڑ کنگ بہ بیت۔؟ اگاں مئے راج ءِ تہءَ نیست گُڑا چہ ڈن ءَ آرگ بہ بیت۔ اے پڑ ما ھُورک کُرتگ۔
بلئے مروچی بلوچ ایکشن کمیٹی ءِ اے مراگش ءِ نامدات دگہ کسّہ یے کار اَنت۔ پہ درور بَہ نام واجہ یوسپ ازیز مگسی کہ سیاست ءِ چیدگ اِنت، بَہ نام واجہ مبارک کازی کہ شائری ءِ چیدگ اِنت، بَہ نام ڈاکٹر عبدالرھمان براہوئی کہ پولکاری ءِ چیدگ اِنت۔ اے دُراہ ایوک ءَ چیدگ اَنت یا ما ماراِتگ ء ُ اے آسر ءَ سر اِیں کہ بلوچ راج ءَ سیاست ءَ ھوار جوانیں زانتکار ء ُ پولکار اوں پکار اِنت۔ چیءَ کہ ابیدئے ایشاں سیاست ءِ کار سرجم نہ بیت۔
دلیپ کُمار ھندوستان ءِ تامرکاری ءِ مستریں ازمکار لیکگ بیت ء ُ زندگیں نامے۔ یک رندے ھندوستان ءِ انگریزے چہ دلیپ کُمار ءَ گوں تُرس ء ُ لرز پُرس اِیت ”واجہ دلیپ ازمکاری ءِ پڑ ءَ تئی سُوبمندی ءِ راز چے اِنت۔؟“ آ دمان ءَ پسّو دنت کہ منی ازمکاری ءِ راز شائری اِنت۔
مروچی ما شائری ءَ سرپد بَہ اِیں۔؟ ما شائرانی ارزشت ءَ زان اِیں۔؟ھما اتاء شاد (عطاء شاد)کہ آئی مارا یک مزنیں مڑّی یے دات، مئے وتی مردماں آئی ءَ لوڑی، دَرزادہ ء ُ گُلام ءِ نام نہ دات۔؟ ما مُدام وتی مردم ء ُ ساچشتکار تژن جَتگ اَنت، برے گُلام، برے لوڑی گوشتگ اَنت ء ُ دلپروش کُرتگ اَنت۔ ما ھچبراے ماراِتگ کہ مارا شائرانی اوں پکار اِنت۔؟ ما میر اَلی دوست، گلام اَلی مسوری بُگٹی، نواب نوروزھان ء ُ دگراں چہ کُج ءَ زان اِیں۔؟ ردانک کاراں ایشانی درگت ءَ ھچ نبشتہ نہ کتگ۔ بلئے مئے شائراں نبیس اِتگ ء ُ وھدے اے شئیر کہ پمّا سر بنت مارا راجدوستی ء ُ راج پجاری ءِ پنت ءَ دَینت۔ اگاں شائری مہ بوت اِیں گُڑا مروچی اے مراگش ءَ نندوک اِیں راجدوست اوں نہ بوتگ اِت اَنت۔
بلوچ راجی جنگ مروچی ھما سیمسراں سر اِنت یا ھما تک ء ُ پھناتاں ھوار اَنت کہ اے جنگ تب زانتی (نفسیاتی) گوشگ بیت۔ سال دو ھزار ءَ بگر داں مروچی بلوچ ءِ راجی پجّار ءِ جنگ تب زانتی دورءَ پُترتگ۔ زوراک ء ُ ھاکماں اے تُرس اِنت کہ اگاں بلوچ ورنا وانندگ بوت اَنت، آھانی دستاں کتاب بوت اَنت،گُڑا آ گیش مارا جنجالانی دیمپان کن اَنت۔ پمیشکہ برے گوں یک پندلے ءَ مارا رَد دیگ ءِ جھد کنگ بوتگ۔ برے نیکراہ ءِ نام ءَ، برے زوان ءِ نام ءَ بلئے یات بہ دار اِت کہ یک نوکیں کارڑے اوں جریدگ اِنت کہ آئی ءَ راجماندوستی (سوشل ازم) گوش اَنت۔ آ راجدوستی ءَ گوں راجماندوستی ءَ ڈیک دیگ لوٹ اَنت۔ بلوچاں چہ مزاھمت ءَ کشّگ ء ُ راجماندوستی ءِ نیمگ ءَ آرگ لوٹ اَنت ء ُ اے کار گوں شؤربندی ءَ بوئگ ءَ اِنت۔ اِستان (ریاست) ءَ مردم جوڑ کُرتگ کہ آھاں ھمے کار دیگ بوتگ۔ کہ اے راجماندوستی ءِ واز ءَ بہ کن اَنت ء ُ راجدوستی ءَ بد بِہ لیک اَنت۔ پہ درور راجدوستی ھچّے نہ اِنت، راجدوستی ءِ ھچ شؤربندی نیست اِنت، راجدوستی ءِ کرّا روزیگی شوربندی نیست۔
مارکس ازم ء ُ لینن ازم اے پنت ءَ دینت کہ یک راجے کہ پہ وتی ھک ء ُ وتی پجّار ءَ پہ مزاھمت بہ کنت گڑا ھمک ھاکمیں تبکہ ء ُ گوں آھاں سیادی داروکیں راجماندوست آ راج ءِ کمک ءَ بہ کن اَنت۔ اے چے داب اِیں راجماندوست اَنت کہ مئے راجی جُھد ءَ رد گوش اَنت، مئے جُھد ءِ تہءَ نزوری شوھاز اَنت۔ چہ ادا ایش پدّر بیت کہ اے ھما مردمانی کاراں ارزان کنگ ءَ اَنت کہ آ اے جُنز ء ُ آشوب ءِ نہ وش ء ُ بدواہ اَنت۔ شاھکار بِہ بَہ اِت چیءَ کہ اے تچکیں گپے کہ بلوچ راجدوستی ءَ اے وھد ءَ تُرس چہ وت ساچیں راجدوست ء ُ چہ راجماندوستان اِنت ء ُ پدا اے مردم راجماندوست نہ اَنت بگندئے سوب مٹّوک اَنت۔ اے لوٹ اَنت کہ بلوچ راج راجدوستی ء ُ وتی راجی جھد ءَ ببا بہ دنت راجماندوستی ءَ پیلو بہ کنت۔ بلئے راجدوستی یک ابرمی جزبگے کہ آئی ءِ سیادی گوں زمین ء ُ ھاک ءَ اِنت۔ ھما زمین کہ اود ءَ ما جہہ منند اِیں، ھما جاہ ء ُ ڈگار کہ اود ءَ مئے ادیرگ اَنت۔ گوں اے زمین ء ُ ھاک ءَ مھر نمیران اِنت ء ُ کس چہ مارا اے مھر ءَ پُل اِت نہ کنت۔ زمین ءَ گوں سیادی ء ُ بندوک بوئگ ءِ مھر راجدوستی اِنت۔
اگاں گوستانک ءَ ما چمشانکے بہ داِیں گُڑا گوستگیں باریگ ءِ دو پُر اَیبیں پرزگ مروچی اوں جھان ءَ ھما رنگ ساڑی اَنت۔ چہ آھاں یکے زاتی ملکت اِنت ء ُ دومی سیاسی وت واجھی (استبداد) اِنت۔ مروچی یورپی ملکاں سیاسی وت واجھی پشت نہ کپتگ بلئے زاتی ملکت ءِ نالت مروچی اوں ساڑی اِنت۔ ھما کہ راجماندوست اَنت آھانی کرّا زاتی ملکت ءِ نام ء ُ توار نیست اِنت بلئے سیاسی وت واجھی ءِ نالت انگت ساڑی اِنت۔ داں وھدے اے نالت جھان ءَ مان اَنت انسانیت پَل پٹان ءَ مر اِیت۔ راجماندوستاں یک برے وتی نزوری در آرگی اَنت۔اے راجماندوست آشوب ءِ گپ ءَ کن اَنت، اِزمانی دیواناں (آرٹس کؤنسلاں) گُشتانک ء ُ مراگش اڑ دینت، مُلک ءِ کُنڑ کُنڑاں تاکبند شنگ ء ُ تالان کن اَنت بلئے کسّے ایشان ءَ گُر ء ُ نھرے اوں نہ کنت۔ ھمک مردم کہ وتی ھک ءِ گپ ءَ کنت بیگواہ کنگ بیت بلئے اے مردم آشوب ءِ منوگر اَنت ء ُ گوں آجوئی ءَ گرد اَنت۔
ایوک ءَ یک راجماندوستے کہ آئی ءَ من زان آں، کراچی یونیورسٹی ءِ ڈاکٹر ریاز اِنت کہ دو رند ءَ بیگواہ کنگ بیت۔ ایشی ءَ ابید دگہ ھچ چوشیں درور نیست۔ راجدار سرپد بوتگ کہ اگاں بلوچ راج نیکراھی ءِ نام ءَ رَد دیگ نہ بیت گُڑا آ راجماندوستی ءِ نام ءَ رَد دیگ بیت ء ُ اے راجماندوست راجدار ءِ جھگیر اَنت۔ اے نشتگ اَنت ء ُ نزوری شوھازگ ءَ اَنت کہ شمئے کرّا شؤربندی نیست اِنت، اے ڈول بہ کن اِت آ ڈول بہ کن اِت ما شمارا کمک کنگ لوٹ اِیں ء ُ ایندگہ۔اگاں آ کمک کنگ لوٹ اَنت، گُڑا بیا اَنت مزاھمتی جُنز ءَ ھوار بہ بنت بلئے مزاھمت ءِ گپ ءَ ھجبر نہ کن اَنت چیءَ کہ آھانی کار ھمیش اِنت کہ بلوچ چہ مزاھمت ء ُ راجی جھد ءَ گِستا بہ بنت۔ مروچی اے دراھیں مردم پاشک بوتگ اَنت ء ُ بلوچ راج یک پہ یک ءَ ایشانی ھُنراں سرپد اِنت۔ پہ واجہ سنا ءِ ریپینگ ءَ بلوچ وتی راجی جھد ءَ ببا نہ دنت۔
من سرپد باں کہ بلوچ اکشن کمیٹی ءِ ورنا آنی مستریں زمہ واری ایش بیت کہ آ راجدوستی ءِ بیرک ءَ دست بہ گر اَنت ء ُ آئی ءَ گوں راجماندوستی ءَ پولنگ مہ کن اَنت۔ زَگریں مارکسسٹ ء ُ سوشلسٹ مارا سر ء ُ چمّان اَنت۔ مارا گوں آھاں ھچ ڈولیں اڑ ء ُ کُڑے نیست اِنت۔ بلئے پاکستان ءَ اَستیں راجماندوست ء ُ مارکسسٹ سوب پٹّوک اَنت۔ پاکستان ءِ کُنڑ کُنڑ ءَ تاکبند ء ُ ماھتاک شنگ ء ُ تالان کن اَنت ء ُ آھانی سرا جارتاک (ایڈز) پوج ءِ جنوک اَنت۔ اے مردم ء ُ ایشانی کرد پاشک بوتگ اَنت۔
آ باپ ءِ رنگ ءَ گل جوڑ کت کن اَنت،گُڑا لیکہ ءِ درور آھانی کرّا راجماندوست اَنت۔ راجماندوستانی کمک ءَ بلوچاں چہ راجدوستی ءَ گِستہ کنگ لوٹ اَنت۔ بلئے اگاں بلوچ ءِ دست ءَ کتاب بوت، گوں وتی جُھد ءَ مئے سیادی بوت گُڑا ما ھجبر رنگراھاں گار نہ بَہ اِیں ء ُ مئے کِشک دائم ءَ سھرا بیت۔ من اے سرپد باں کہ مارا گار بوئگی نہ اِنت۔پرچاکہ جاور الم ءَ نگیگ ء ُ نازرک اَنت بلئے اگاں ما وتی داتگیں کُربانیاں چہ شمشکار بوئگ نہ لوٹ اِیں،گُڑا مارا گوں کتاباں مھر کنگ لوٹ اِیت ء ُ وانوک جوڑ بوئگی اِنت۔ وتی مال ء ُ مڈّی پہ بلوچ راج ءِ رژنائیں باندات ءَ ندر ء ُ کولیگ کنگ لوٹ اَنت ء ُ اگاں ما چوشیں کردے پیلو مہ کن اِیں گُڑا مئے کرّا ڈگریانی اَمبار بیت بلئے وانندگانی کَچ سک کم بیت۔
اے ڈول گوشگ بیت کہ بلوچ زانتکار، ندکار، شائر ء ُ زوانزانت اَنت بلئے انچوش کہ من پیسرترءَ گیشّینتگ اَت کہ پہ بلوچ ءَ کار ایوک ءَ شائراں کُرتگ ء ُ آھانی درشان داب اوں شائری بوتگ۔ ایشاں کہ ما زانتکار لیک اِیں ء ُ اگاں پہ دل زانتکار ء ُ ندکار اَنت گُڑا چتور اے سرکار ءِ ایوارڈاں دست گر اَنت۔ پرچی ءَ سرکار ءِ ستا ء ُ توسیپ ءَ وتی ستا ء ُ توسیپ لیک اَنت۔؟مروچی لبزانک پہ اے ھاتر ءَ نبشتہ نہ بوئگ ءَ اِنت کہ مارا ایوارڈ بہ رس اِیت۔؟ مارا زر ء ُ مال بہ رس اِیت۔؟ما اے درگت ءَ جیڑاتگ کہ سرکار ءِ بستار چے اِنت کہ زانتکارانی بودشت ء ُ زانشت ءَ کساس کُرت بہ کنت۔؟ سرکار ءِ کرّا چوشیں ماپ اوں نہ گواھیت کہ اے آسر ءَ سر بہ بیت کہ کئے لائک ء ُ کئے نالائک اِنت۔۔!
ایوارڈ چہ اُلس ءَ رس اِیت۔ ایوارڑ چہ ھما مردماں رس اِیت کہ آھاں ایشی ءِ سرپدی ھست۔ اے چونیں زانتکار اَنت کہ بلوچ راج ءَ چہ دلپروشی ءَ درکنگ ءِ جاہ ءَ دلپروشی ءِ نیمگ ءَ چگل دیگ ءَ اَنت۔
اولی جھانی جنگ بوت ء ُ پدا دومی جھانی جنگ بوت ء ُ اے جنگانی سَوب شش کروڑ مردم جَنگ ء ُ کُشگ بوت۔ مردم مونجا بوت اَنت ء ُ جھان ءَ اے اولی بر اَت کہ مردم چہ سائنس ء ُ راجدوستی ءَ گِستہ روان اِت اَنت پرچا کہ آھاں اے ماراِتگ اَت کہ نہ مارا سائنس رکّ اِینت کنت ء ُ نئیکہ راجدوستی۔ ھمے نیام ءَ سارتر ءِ ھستانکی (وجودیت) ءِ شون مردماں چہ کولنجی (ڈپریشن) ءَ در کنت۔بلئے ما چماں شانک بِہ داِیں ء ُ بہ چار اِیں کہ آ کُجام زانتکار اِنت کہ بئیت چو سارتر ءَ مارا اوں انچیں شونے بہ دنت کہ مئے ارواہ آسودگ بہ بنت۔ اگاں چوشیں زانتکار نیست گُڑا منی نزا اے مردماں زانتکار گوشگ گوں زانتکاراں نہ انساپی یے۔ انچوش کہ ریڈیکلانی نیام ءَ سوب پٹوک ھست ھمے رنگ ءَ زانتکارانی نیام ءَ سُوب پٹوک اوں ھست انت۔
مروچی شست سال ءِ جھد ءَ پد ما انگت ھما جاہ ءَ اوشتوک اِیں کہ چہ اود ءَ بُنگیج زُرتگ اَت۔ مارا جیڑگی اِنت ء ُ اے شست اِیں سالانی سکی ء ُ سوری دلگوش کنگ لوٹ اَنت۔ ڈنّی مردمانی ساز اِتگیں پندلاں ھوار وتی ردی ء ُ نزوری اوں شوھازگ لوٹ اَنت۔ نہ ایوک ءَ شوھازگ ء ُ درگیجگ لوٹ اَنت بگندئے گوں تمردی ء ُ بے رھمی ءَ آھانی سرا نگد کنگی اِنت۔ مروچی بلوچ راج کہ اے جنجال ء ُ جاوارانی کہ آماچ اِنت آھانی زمہ وار کئے اِنت۔؟بلوچ راج کُربانی دیگ ءَ اِنت، درد ءِ سر اِنت بلئے انگت آئی ءِ زندگ بوئگ ءِ واھگ مُجاں اندیم اِنت، ایشی ءِ سَوب چے کُجام مردمان اِنت۔؟ما وتی بدواہ درنہ گیپتگ اَنت ء ُ نئیکہ ما وتی دوزواھاں پجّہ کار اِیں۔
میر ابدالکریم کرد ھما اولی سروک اِنت کہ آئی گَلکاری ءِ راہ پیش داشتگ، چُنت مردم ھست اِنت کہ آئی ءَ زان اَنت۔؟ چُنت مردم اَنت کہ نورا مینگل، الی دوست، گُلام ھسین بُگٹی، ارباب ھان کھوسو ء ُ پیز بلوچ ءَ زان اَنت ء ُ آھانی کرد ءِ درگت ءَ سرپد اَنت۔؟ما وتی یَلیں ورنا، سروک ء ُ کماش شمشتگ اَنت ء ُ مارا ھما یات اَنت کہ آھانی کرد بد بوتگ۔ ما ھما مردماں زانتکار لیک اِیں کہ آھاں بلوچ ءِ دود ء ُ ربیدگ، بلوچ ءِ سرداری داب ءِ جاہ ءَ زوراک ءِ کارداری ءَ را شرتر ء ُ گِھتر لیک اِتگ۔ مارا ھُرتی ءَ گوں چارگ لوٹ اِیت کہ ردی چہ کُج ءَ بوت، مئے نزوری چے اَت اَنت، مئے گدّار کئے اَت اَنت۔؟ اے درائیں جُستانی پسّو شوھازگی اِنت۔گوش اَنت وھدے کہ یک راجے ءِ سیاسی رھشون بے زانگ بنت گُڑا آ راج ءِ پدّریچ بے زانتی ء ُ بے منزلی ءِ آماچ بیت ء ُ بد بھتی ءَ مروچی بلوچ راج ءِ گورا پارلیمانی رھشون بے وانندگ ء ُ بے زانت اَنت۔ منی نزا اے روتاک اوں نہ وان اَنت۔
بلوچانی ھما بے بھائیں رھشون، کہ آ وانندگ ء ُ زانتکار اتنت آ نواب ھیربکش مریءَ گوں ھلاس بوت انت، نواب ھیر بکش مری ءِ بیرانی یک اھدےءِ بیرانی انت۔ یک اَھدےءِ ھلاسی انت کہ چہ آئیءَ پد بد بکتیءَ چہ پما رھشونانی یک انچیں لڑے اتکگ کہ آ دراہ جٹ، بے زانت ء ُ جاھل اَنت۔
چو کہ بلوچ راجءَ یک جیڑھےءَ چہ دراھگءِ ھاترا نواب ھیربکش مری ءِ ڈولیں وانندگیں رھشونانی پکار اِنت ءُ الم اِنت کہ شما اے چیزانی سرا بہ جیڑ ات، من ھمے گپءَ گوں وتی گپاں گونڑ دار آں کہ وھدے نہرو وتی کتابءِ پٹ ء ُ پولءِ تہءَ نبشتہ کنت کہ ھندوستان چونیءَ گلام دارگ بوت۔؟
آ اشیءِ سئے سوب بیان کنت ء ُ آ سئے ایں سوبانی زمہ واریاں آ اکبر ءِ ڈولیں روداریں ھاکمانی سرا لڑ ایت۔
آ گش ایت کہ اکبرءِ زمانگءَ وھدے کہ گھڑی جوڑ کنگ بوتگ ات گڑا اکبر ءِ گور ءَ پہ وھد چارگءِ ھاترا زمانگی ایں ربود جنزگءَ ات۔ بہ زان کہ نوکیں جھانی المءَ چہ پائیدگ چست کنگ نہ بوت۔
دومی ایش کہ چاردھمی کرنءَ وھدے کہ چاپکاری ءِ سپر بنگیج کنگ بوتگ ات گڑا اکبر وتی زمانگءَ اے چاپکاریءِ سپرءَ چہ ھم وتءَ دور داشت ء ُ چہ اشیءَ ھم پائیدگ چست کنگ نہ بوت۔ ء ُ سئیمی سوب اش ات کہ آ دنیاءِ سیاسی سپرءَ چہ آگاہ نہ ات، ھمے سوبءَ ھندوستان گلام دارگ بوت ء ُ ھندوستان ءِ گلامیءِ ھواریءَ ما ھم گلام بوتاں۔
ء ُ یکجاھے گل ھان نسیر وتی سر دانکےءِ تہءَ نبشتہ کنت کہ سمد ھان اچکزئی ءَ اے گپ گشتگ کہ من لوٹ آں برو آں ء ُ اھمد شاہ ابدالیءِ مانشءَ را پٹ بدے آں کہ آ ھندوستانءَ پہ جنگ کنگءَ روت بلے آئیءَ گوادر پرچیءَ مئیمءَ نئیت۔
چے ما یکبرے پدا اکبر ءِ ردی آنءَ دو وار نوک کنگءِ نیمگءَ روگءَ نہ آں۔۔۔؟
دلگوش: اے نبشتانک بلوچ اسٹوڈنٹس ایکشن کمیٹی ءِ تاک “ نوشت “ ءِ تہا چھاپ بوتگ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
