شونگال
ادارہ
انسانی چاگرد ءِ تہا اڑاند (تضاد) یک ابرمی شئے یے ۔ ھمے رنگ ءَ دنیاءِسیاسی گوستانک ءِ تہا ھرچ وھداں ھمے گندگ بیت کہ یک سیاسی پروگرمے مدام وتی سیاست کارانی تہی ءُ ڈنی اڑانداں (تضادات ) چہ گوزاِیت ءُ دیمروئی کنت۔ سیاستءِ تہا اے ھمے سیاسی اڑاند اَنت کہ سیاسی پگراں گیش مھکم کن اَنت ءُ سیاسی پروگراماں دیمروئی دینت۔بلئے سیاست ءِ تہا سیاست کاراں لوٹ اِیت کہ آ وتی تہی ءُ ڈنی اڑاندانی پجارءَ کت بہ کن اَنت ءُ آھاں بہ من انت، اڑاندانی پجار کنگ ءُآھانی منگ المی اِنت ،اگاں ھستیں اڑاندانی پجار کنگ مہ بیت ءُ آ منگ مہ بنت گڑا الم سیاست ءِ تہا سیاست کارانی پروگرام زوالءِ نیمگءَ روت ۔
بلوچ نودربر سیاست ھم مدام وتی ڈنی ءُ تہی اڑانداں چہ گوازن اِنت ءُ دیمروئی کنگ ءَ اِنت ۔ نودربر سیاست ءِ تہا ھمے اڑاندانی بازیں رند ءَ نہ منگ ءُ آھانی پجار نہ کنگ ءِ سوَبءَ ما دیستگ کہ بلوچ نودربر سیاست مزنیں تاوانانی آماچ بوتگ۔مروچی ھم بلوچ نودربر سیاست ، لھتیں انچیں اڑاندانی آماچ اِنت کہ آھانی پجارگ ءُ گیشینگ پہ بلوچ سیاست ءِ باندات ءِ ھاترا ھژدری اَنت۔ بلوچ نودربر سیاست ءِ ھستیں جیڑھانی تہا یک مزنیں جیڑھے ایش اِنت کہ نودربرانی جتاجتائیں ٹولی نظریاتی جہتءَ سیاست کنگ ءِ جاہءَ “ٹرینڈ پالور” جوڑ بوتگ اَنت ۔ھمے “ٹرینڈ پالور” ئِے سیاست ءِ سوَب اِنت کہ ما گند ایں نودربرانی یک مزنیں کچے لیکہی جہتءَ روچ پہ روچ نزور تر بوّان اِنت ءُ بامر دوستی(ہیروازم) ءِ ڈولیں تاوان دھیں شئے آنی آماچ بوگ ءَ اَنت ۔
چونھا لیکہی ھسابءَ سیاست کنگ یک سکیں گرانے کارے ، لیکہی سیاست کنگ ءِ ھاترا انسان ءَ مہکمیں سیاسی لیکہ ءُ کار رھبندےءِ پابند بوگ لوٹ اِیتءُ آئی ءِ ھمبرائی ءَ کربانی دیگ ءِ یک مزنیں ہاٹی یے لوٹ اِیت ۔”ٹرینڈ پالور” سیاستءِ کارانی مستریں نادراھی ایش اِنت کہ آسیاستءِ بنداتی پروسس ءَ چہ گوزگ نہ لوٹ اَنت ، سیاست ءِ سکی ءُ سوریاں اوپار کنگ نہ لوٹ اَنت ، ادارتی کاررھبندءِ پابند بوت نہ کن اَنت بلئے وتی چاگردءِ لس مہلوک ءُ ایدگہ دنیاءِ دیم ءَوت ءَ ھما کَسانی کچ ءَ پیش دارگ لوٹ اَنت کہ آ کس یک سرجمیں سیاسی پروسسے ءَ چہ گوستگ اَنت ، سیاسی جہتءَ ھرچ ڈولیں کربانیانی سپراں چہ گوستگ اَنت ءُ سرپدیں کَس اَنت ۔ ھمے واستہ ما گند ایں کہ ٹرینڈ پالوریے ءِسیاست ءَ یک انچیں تب یے جوڑکُتگ کہ اے رنگ ءِمردم وتسرءَوت ءَ زانتکار ءُ لیڈر ثابت کنگ ءِ واستہ شارٹ ارزانیں کشک شوھاز کن اَنت۔
پہ بلوچ سیاستءِ بانداتءَ اے سکیں نہ وشیں جیڑہے، ما ھمے سرپد بئیں اگاں اے ڈولیں جیڑہ زوت پجارگ ءُ منّگ مہ بنت گڑا ایشانی آسر پہ بلوچ نودربر سیاست ءَ ابیدئے زوالےءَ دگہ ھچ نہ بیت ۔ بلوچ نودربراں مروچیءَ جیڑگ لوٹ اِیت ءُ ھستیں جیڑہءَ را سرپد بوگ لوٹ ایت کہ اے “مئیل ءِ سیاست” نودربراں لیکہی جہت ءَ چنچو نزور کنگءَ اِنت۔ دنیا ءِ سیاسی راہ ءُ رھبند ھمے گوش اَنت کہ چوش بوت کنت کہ نودربر بنداتءَ جزباتی بنت ءُ سیاستءِ نیمگءَ کاینت بلئے ھما سیاسی پلیٹ پارمءِ بھر بوگ ءَ رند آھانءَ اے گپ پھمگ لوٹ اِیت کہ ما چے واستہ سیاست ءِ بھر بوتگ اِیں، آ کجام مکسد اِنت کہ ما آئی ءِ واستہ سیاست کنگ ءَ اِیں ، آکجام پگر اِنت کہ ما آئیءَ گوں بندوک کنیں ، اگاں یک سیاسی نودربرے وتءَ گوں وت ھمے جستاں بہ کنت گڑا بگندئے ھمے جستانی پسّو ءِ شوھازگ ءَ گوں آئیءِ تہا سیاسی پھتگی ودی بوان بہ بیت ءُ آئیءِ تہا شعوری بنیاتءَ سیاست کنگءِ سِنچ پیداک بہ بیت۔ نودربر سیاستءَ گوں بندوکیں بباشعوریں پگری مردم نہ ہیروازم ءِ آماچ بنت ءُ نئیکہ دگہ وتگڑیں زانتکاری ءُ لیڈری ءِ شوکین ۔
بلوچ اسٹوڈنٹس ایکشن کمیٹی بستارءِ یک نودربر گلے چہ وتی جوڑشتءِ سرِی روچاں ھمے جھد ءُ کوشستاں کنگءَ اِنت کہ آ بلوچ نودربرانءَ یک شریں سیاسی ءُ پگری چاگردے بہ دنت بلئے چوشکہ ما اے گپءِ سرا ھم بیسہ دار ایں کہ دنیا ءِ ہچ چیز وتی تہا سرجم ءُ برجم نہ بیت ءُ کسان ءُ مزنیں نزوری ھر جاہءَ الم بنت ۔ ھمے رنگءَ بگندئے مئے جھد ءُ گل ءِ کارانی تہا کسان ءُ مزنیں نزوری بوتگ اَنت یا ھست اَنت ۔ بلئے ما پہ بستارءِ سیاسی ادارہ ھرچ وھد وتی نزوری من اِتگ اَنت ءُ آھانی شر کنگ ءِ ھاتراجھد کُتگ ھمے مئے ادارتی سوبمندی اِنت کہ بلوچ اسٹوڈنٹس ایکشن کمیٹی وتی سیاسی روشتےءِ بروردءَ مروچی بلوچستان ءُ بلوچستان ءَ چہ ڈن ھرچ کسان ءُ مزنیں بلوچ الاکہانی تہا بلوچ نودربرانی توار جوڑ بوتگ ءُ بلوچ نودربرانءَ ادارہءِ سرا یک مزنیں بیسہ ءُ امیتے ھست اِنت۔مروچی کہ اے تاک شمئے دستءَ اِنت اے ھمے سیاسی ءُ پگری کارانی بھر اِنت ءُ ادارہ ءِ جھد ھمیش اِنت کہ ھمے وڑیں سیاسی ءُ پگری چاگردے جوڑ بہ کنت کہ بلوچ نودربر چہ “ٹرینڈ پالور “ءِ ءُ دگہ انچیں در راجکاری(غیر سیاسی)تاوان دھیں شئے آنی بھر بوگءِ جاہءَ پگری جہتءَ سیاست ءِ بھر بہ بنت ءُ سرجمیں بلوچ سیاستءَ پگری جہتءَ دیمروی دات کت بہ کن اَنت ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
