بنجاھی اھوال
ادارہ
انچو گوش اَنت کہ ھر ھما اداراہ وھدے وتی کارانی تھانزور بہ بیت یا کہ وھدءِ لوٹاں پیلوکُرت مہ کنت گُڑا بہ زان کہ آادارہ زوالءِ آماچ اِنت۔ادارہ جاتی کارانی تھا روانی اداراہءِ دیمرویءِ واستہ المی اِنت ءُ پروگرامانی ٹہینگ ءُ پروگرامءَ گوں نودربراں ھمگرنچ کنگ نودربر ادارہانی مستریں زمہ واریاں شہ یک زمہ واری یے زانگ بیت۔ بلوچ سٹوڈنٹس ایکشن کمیٹی وتی جوڑ بوگءَ شہ رند بلوچستانءِ مزنیں ورنا گلءِ دروشمءَ دیما اتکگ ءُ بلوچ ورنا ہانی علمی، فکری ءُ سیاسی تربیت کنگءِ واستہ بلوچستان ءُ بلوچستانءَ شہ ڈن وانگی ادارہانی تھا بلوچ ورنا یکجاہ کُرتگ ءُ جتا جتائیں پروگرام اڑ داتگ۔ بلوچ لس مھلوک ءُ بلوچ چاگردءِ تھا کتابی دود گیش کنگءِ واستہ ھمک ھندءُ دمگاں کتابجاھانی ٹہینگ، کتابجاھانی واستہ کتابانی شوھازگ ءُ چاگردءِ تھا کتاب دوستیءِ ودینگ ھاترا کتابانی اسٹال جنگ ادارہءِ پروگرامءِ مستریں بھر بیتگ اَنت ءُ اے میانءَ ادارہ یک مزنیں کساسےءَ داں چوشیں پروگراماںءَ پہ یک جوانیں آسرےءِ دیگءَ سوبین بیتگ۔
چوشکہ گلءِاولی بنجاھی لس مجلس نومبر 2018 ءَ ماں شالءَ اڑ دیگ بیت ءُ بنجاھی لس مجلس ءَ شہ رندءِ کُلیں کارانی رپورٹ “نوشت”ءِ گوستگیں ءُ اولی تاکءَ مان کنگ بیتگ ات انت ءُاے رپورٹ فروری 2020 ءَ شہ رند ءِگلءِ کارانی اِنت ءُ اے میانءَ گلءِ کار چو اے ڈولءَ بیتگ اَنت۔
چارمی بنجاھی مجلس
9 فروری 2020ءَبلوچ اسٹوڈنٹس ایکشن کمیٹی ءِ چارمی بنجاھی مجلس بنجاھی کماش ڈاکٹر نواب بلوچ ءِ پاگواجہی ءَ ماں شال ءَ برجم دارگ بوت۔ اےدیوان ءِ تھا گوستگیں کارانی سرا چار ءُ بچار کنگ ءُ نودربر سیاست ءُ تعلیمی ادارہانی تھا نودربرانی اڑءُ جنجالانی سرا گپ ءُ تران کنگ بوت ءُ دیوانءِ آؤکیں گامگیج ءِ ایجنڈہءِ تھا گلءِ پروگرام ءُ نودربرانی سیاسی ھیلکاریءِ پروگرام ءَ دیمءَ برگءِ واستہ پیسلہ زورگ بوت ءُ دیوان ءِ تھا بنجاھی اکثریتی سنگتانی رائے ءِ ردا آصف بلوچ ءُ خالد بلوچ بنجاھی لس مجلسءِ باسک گچین کنگ بوت اَنت۔ اے دیوانءَ پہ آؤکیں چار ماہءِ ھاترا سئے ھاسیں پیسلہ زورگ بوت کہ آ چو پیما ات انت۔
۱۔ ماتی زبانانی میان استمانی روچءِ درگتءَ جتا جتائیں شھراں سیمینار اڑ دیگ بیت۔
۲۔ پنجگورءَ یک تعلیمی فیسٹیولے ایر کنگ بیت۔
۳۔ بلوچستان کتاب کاروان دیم برگ واستہ بلوچستانءِ کُنڈُکنڈاں کتابی مراگاہ ایر کنگ بیت۔
ھمے پیسلہانی سرا زرتگیں گامگیج۔
۱۔ ماتی زبانانی میان استمانی روچ
بلوچ اسٹوڈنٹس ایکشن کمیٹی ءُ ایدگہ چاگردی لبزانکی گلاں زبانانی میان استمانی روچ ءِ درگت ءَ شال ءَ یک سیمینارے اڑ دات۔ اے سیمینارءِ تھا بنجاھی وائس چیئر پرسن ڈاکٹر صبیحہ بلوچ ءُ بنجاھی کارگشاد سلمان بلوچءَ بھر زرتگ اَت۔ دیوانءِ تھا لبزانکار ءُ سیاسی نودربراں ماتی زبانانی میاں استمانی روچءِ درگتءَ وتی وتی جتا جتائیں ھیال درشان کت اَنت۔ دیوانءِ ترانکاراں وتی ترانانی تھا ماتی زبانءِ ارزشتءِ باروءَ گشت کہ یک راجے ءِ تھاراجی سنچ ءِ ودی کنگ ءِ ھاترا زبان یک مزنیں ارزشتے دار اِیت، یک زندگیں راجےءِ راجی بقاء گوں آئیءِ زبانءَ بندوک اِنت۔ماتی زبان راجانی تھا راجی سوچ ءُ راجءَ رایکمشت کنگ ءِ ھاترا یک مزنیں بستارے داراِیت، پمیشکہ یک راجےءَ وتی پھازگءِ ھاترا وتی زبان الم پھازگی اَنت۔
سیمینار ءِاولی گشتانکی بھرءَ پد یک شئری دیوانے اڑ دیگ بوت، کہ آئیءِ تھا بلوچ شائراں وتی شئر ونت اَنت ءُ چہ دیوان ءَ داد گپت۔
۲۔ پنجگور تعلیمی فیسٹیول
27فروری 2020 ءَ چہ بلوچ اسٹوڈنٹس ایکشن کمیٹی ءِ نیمگ ءَ پنجگورءَ یک تعلیمی فیسٹیولے برجم دارگ بوت۔اے مراگش ءِ تھا بلوچ نودربراں ھوار چاگردءِ ھر تکءَ چہ سیادی داروکیں مردماں بھر زرتگ اَت۔ بلوچستان کتاب کاروان ءِ نامءَ بک فیئرے ھم ادااڑدیگ بیتگ اَتءُ اے مراگش سرجمءَ شش بھرانی تھا اَنت۔
1-Role of Intellectual in Development of Society ءِ سرا لکچر پروگرامے اڑ دیگ بوت، اے بھر ءِ تھا عزت اکیڈمی ءِ خدا رحم، پوسٹ گریجویٹ کالج ءِ پرنسپل سر حسین بلوچ ءَ ھوار دگہ سیاسی ءُ لبزانکی مردماں گپ ءُ تران کت۔ اے دیوانءِ تران کنوکاں چاگردءِ تھا وانگ ءُ زانگ، سیاست ءُ لبزانک ءِ سرا گپ ءُ تران کت۔ دیوانءِ تران کنوکاں وتی گپ ءُ ترانانی تھا اے گشت کہ پہ چاگردانی دیمروئی ءِ ھاترا چاگردانی کواس ءُ زانتکارانی کرد اں چہ کسے انکار کت نہ کنت۔ مارا ھم اے لوٹ اِیت کہ وتی وس ءُ واکءِ ھسابءَ چاگردءِ تھا وانگ ءُ زانگ یا کہ سیاست ءُ لبزانکءِ پڑءَ وتی کردءَ پیلو بہ کنیں۔ چیءَ اگاں یک چاگردےءِ تھا آئیءِ کواس ءُ زانتکارانی ھم پیمیں کردے مہ بیت تہ آ چاگرد زوالءِ نیمگءَ روت۔ کواس وتی چاگرد ءِ پیچ ءُ تاباں لس مہلوک ءِ دیما کاراِیت ءُ آھانی ھاترا توجیل سازاِیت۔
2۔کیریئر کونسلنگ ءِ سرا پینل ڈسکشن:
دیوانءِدومی بھر ءَ کیریئر کونسلنگ ءِ سرا یک پینل ڈسکشن یے بوت۔ اے ڈسکشن ءِ تھا ڈپٹی کمشنر شفقت شاہوانی، ایجوکیشنل آفیسر امجد شہزاد ءُ بلوچ اسٹوڈنٹس ایکشن کمیٹی ءِ سنگت ڈاکٹر عرفان بلوچ ھوار ات انت۔ موڈریٹر ءِ ڈُبہ زید ارشاد ءِ زمہءَ ات انت۔ دیوان ءِ تھا تران کنانءَ پینلسٹاں گشت کہ ھر یک نودربرے ءِ واستہ اے الم اِنت کہ کجام اوں فیلڈےءِ نیمگءَ پہ وانگءَ روت گڑا آ پیسرءَھما فیلڈءِ بارہءَ وت شر سرپد بہ بیت ءُ بزانت، دانکہ آ نودربردیمترءَ ھچ ڈولیں مشکل ءُ جنجالانی آماچ مہ بیت۔ ھر یک نودربرے وتی دوستیگیں فیلڈءِ نیمگءَ بہ روت اِنت، ھچ فیلڈ ءِ ارزشت کم نہ اِنت،بس نودربر ھما فیلڈ ءِ نیمگءَ بہ روت کہ آئیءِ تب ءُ میل گوں آئیءَ بندوک اَنت۔
3۔ یوتھ ایکٹیوزم ءِ سرا پینل ڈسکشن:
اے بھر ءِ ڈسکشن ءِ تھا بنجاھی کماش ڈاکٹر نواب بلوچ، بی ایس اے سی گوستگیں کماش رشید کریم ءُ اقبال زہیر ھوار ات انت ءُ موڈیریٹر ءِ زمہ واری بالاچ بلوچ ءِ کوپگان اَت۔ اے بھرءِ تھا دیوان ءَ پینلسٹاں گپ ءُ گال کنان ءَ ھاس اے گشت کہ یوتھ گوں وتی بودشتاں چاگرد ءِ تھا مٹی ءُ بدلی ءِ سوب جوڑ بنت۔ پمیشکہ یوتھ ءِ اکٹیویٹی چاگرد ءِ تھا یک مزنیں ارزشتے دار انت۔ ھما چاگرد کہ یوتھ ایکٹیوزم ءِ دیما اڑاند پیداک کن اَنت آ چاگرد زوال ءِ نیمگ ءَ رواَنت۔
4: پروموٹنگ بک کلچر
دیوان ءِ چارمی بھر ءَ پروموٹنگ بک کلچر ءِ بنگپ ءِ سراچاگردءِ جتائیں تکاں چہ سیادی داروکیں کساں گپ ءُ تران کت، کہ آھانی تھا چاگردءِ منگھیں استادءُ علمی ، سیاسی ءُ لبزانکی کس ھوار ات انت۔ کہ اے بھرءِ تھا بھر زرتگیں مردماں کتاب ءِ ارزشت ءُ کتابانی بارہ ءَ سرپدی دیگ ءِ سرا تران کت۔
5 ـشئر ءُ شائری دیوان
دیوانءِپنچمی بھر ءَ عزت اکیڈمی پنجگور ءِ باسک اقبال زہیر ءِ پاگواجہی ءَ یک شئر ءُ شائری ءِ دیوانےاڑ دیگ بوت۔ دیوان ءِ تھا بازیں ورنا ءُ دگہ مزنیں شائراں بھر زرت ءُ وتی شئر ونت اَنت۔
6: میوزک پروگرام:
مراگش ءِ گڈی بھرءَ یک ساز ءُ زیملی دیوانے بوت۔ کہ اے بھرءِ تھا بلوچی زبان ءِ گشندہ آسمی بلوچ ءُ دگہ دمگی گشندھاں دیوان ءِ دیما وتی ازم پیش داشت اَنت۔
۳۔کتاب میلہ
کورونا وائرس نادراھیءِ آھگءُ پدا آئیءِ گیش بوگءَ گوں کُلیں وانگجاہ بند بوت اَنت ءُ ھمے سوبءَ اے چار ماھانی تھا اے پیسلہءِ سرا ھاسیں کارے کنگ نہ بوت۔انچوشکہ کروناءِ وبا ءِ سوبءَ وانگی ادراھانی تہا کلاس دارگ بوت اَنت ءُ ادارہ بند کنگ بیت اَنتءُ نودربراناںموکل دیگ بوتگ۔ پدا ایچ ای سیءَ ھمے پیسلہ زرت کہ وانگجاھانی وانگ آنلائن ءِ ھسابءَ بنت، کہ نودربر وتی کلاساں آنلائن بگر اَنت۔ اے پیسلہ ءَ گوں ھاس بلوچ نودربر باز نگیگیں جاورھالانی آماچ بیت اَنت چیءَکہ بلوچستان ءِ گیشتریں ھند ءُ دمگاں انٹرنیٹ ءِ آسراتی نیست اِنت۔انٹرنیٹ نہ بوگءِ سوبءَ ہزاراں نودربراں آنلائن کلاس گپت نہ کت ، کہ آھانی وانگ ءُ زانگ زوال بوگءَ اَت گڑا اے ردءَ بلوچ سٹوڈنٹس ایکشن کمیٹیءَ گیشءَ چہ گیش اے وھداں ھمے مزنیں جیڑہ چست کت ءُ اے جیڑہءَ راحکومتی ایواناں سر کنگءِ جھد کت۔
آنلائن کلاس آنی جیڑہءِ سرا کارانی اھوال
جون 2020 ءَ یک نیمگے آنلائن کلاس ءُ دومی نیمگءَ بلوچستانءَ انٹرنیٹءِ آسراتی ءِ نہ بوگ، اے جیڑہ ءُجنجالانی سرا بلوچ اسٹوڈنٹس ایکشن کمیٹی ءَ گوں بلوچ کونسل آنی ھواری ءَ انٹر نیٹ آسراتی نہ بوگ ءِ سوب ءَ آنلائن کلاسانی ھوالہ ءَ ایچ ای سی ءِ پیسلہ ءِ ھلاپ ءَ یک الائنسے بلوچ اسٹوڈنٹس الائنس ءِ نام ءَ ٹھینت۔ اے الائنس ءِ تہا بی ایس سی اسلام آباد، بی ای سی کراچی، بی ای سی بھاولپور، بی ایس سی ملتان ءُ بی ایس سی لیاری ھوار ات انت۔ ھمے الائنس ءِ نام ءَ 1 جون ءَ کوئٹہ پریس کلب ءَ یک پریس کانفرنسے کنگ بوت ءُ پدا ماں پریس کلب ءِ دیما زہرشانی درشان کنگ بوت۔چہ ایش ءُ پد ملکءِ جتا جتائیں دمگاں روانک ءُ زھرشانی کنگ بوت۔
ھمے ڈولءَ 9 جون تا 11 جونءَ چہ بلوچ اسٹوڈنس الائنسءِ نیمگءَ آنلائن کلاسانی اے جیڑہءِ سرا کراچی پریس کلبءِ دیمءَ زھرشانیءِ بنجلے جنگ بوت کہ اودءَ بلوچستانءِ تہا انٹر نیٹ ءِ آسراتیءِ لوٹ کنگ بوت۔ ءُ 11 جون ءَ آرٹ کونسل ءَ بگر دانکہ کراچی پریس کلب ءَ یک روانکے کشگ بوتءُ پریس کلب ءِ دیمءَ زھرشانی کنگ بوت۔
15 جون تا 17 جونءَ خضدار پریس کلب ءِ دیمءَ علامتی زھرشانیءِ بنجلے جنگ بوت ءُ ھمے جیڑہءِ ھسابءَ وتی لوٹ ایر کنگ بوت اَنت۔
زھرشانی آنی ھمے درچ برجاہ۔ 17 جون تا 19 جونءَ چہ بلوچ اسٹوڈنس الائنسءِ نیمگءَ ایچ ای سی ءِ کارگسءِ دیمءَ یک سئے روچی علامتی زھرشانیءِ بنجلے جنگ بیتُ ایچ اے سی پیسلہ ءِ ردا انٹر نیٹ آسراتی ءِ لوٹ کنگ بیت۔ ءُ 19 جون ءَ یک زھر شانی یے ھم کنگ بیت۔
یک نیمگے بلوچ نودربرانی کوکار ءُ زھرشانی ءُ دومی نیمگءَ سرکارءِ ھچ پیمیں گامگیج نہ زورگ، اے ردءَ بلوچ اسٹوڈنس الائنس وتی لوٹانی لوٹگءِ ھاترا وتی پروگراماں یکشلءَ گیش برجاہ دار اِیت۔ ھمے ڈول 22 جون ءَ کوئٹہ پریس کلب ءِ دیمءَ یک سئے روچی علامتی زھرشانی ءِ بنجلے جنگ بیتءُ 24 جون ءَ کوئٹہ ءَ یک روانکے کشگ بیت۔ ھمے روانک ءَ پولیس ءَ نودربراں لٹ کٹ کنت ءُ آھاں گپت ءُ پہ زور وتی بندیگجاھانی تھا بند کنت۔ پداھمے وئیل ءِ ھلاپ ءَ 25 جون ءَ کراچی ءَ 26 جون ءَ پنجگور ءُ ڈی جی خان ءَ ءُ 27 جون ءَ خضدار ءَ زھرشانی کنگ بیت۔27 جون ءَ بلوچ اسٹوڈنٹس الائنس ءِ نیمگ ءَ بارکھان ءَایچ ای سی ءِ پیسلہ ءِ ھلاپ ءَ دو روچی علامتی زھرشانیءِ بنجلے جنگ بیت۔
بی ایم سی ءِ جیڑہ
چوشکہ بولان میڈیکل کالج اپ گریڈ بیت ءُ بولان یونیورسٹی آف ہیلتھ اینڈ منیجمنٹ سائنس BUHMS کنگ بیت۔ ادایونیورسٹی ءِ نیمگءَ چہ نودربر ءُ استادانی میانءَجیڑہ بندات بنت ءُ ادارہ ءَ پرویٹریزیشن ءِ نیمگ ءَ برگ ءِ جھد ءُ کوشست کنگ بیت۔ ھمے عملانی ھلاپ ءَ 3ستمبر 2020ءَبلوچ اسٹوڈنٹس ایکشن کمیٹی گوں ایدگہ استیں نودربر گلاں ھوار بی ایم سی ری اسٹوریشن موومنٹءِ نام ءَ بی ایم سی ءَ پراویٹزیشن ءِ نیمگ ءَ برگ ءِ ھلاپ ءَ ءُ بی ایم سی ءِ بحالی واستہ شالءَ یک روانکے در کن اَنت، اے روانک سی ایم ہاؤس ءِ دیما روت ءُ اودءَ زھرشانی ءِ درشان کنگ بیت۔
چہ وانگی واکدارانی نیمگءَ اے جیڑہءِ سرا ھچ پیمیں گامگیج نہ زورگءِ سوبءَ ایدگہ روچ بزانکہ 4 ستمبر ءَ تا دم مرگ شد ھرتالی بنجلے جنگءِ جار پرینگ بیت۔ شد ھرتالی زھرشانیءِ تھا ایدگہ نودربر گلانی نودربر ھم بھر زور اَنت، چہ بلوچ اسٹوڈنٹس ایکشن کمیٹی ءِ نیمگ ءَ بنجاھی مجلسءِ باسک ڈاکٹر جانباز بلوچ ءُ بی ایم سی بنزہ ءِ سنگت سکی فضل، مشتاق بلوچ ءُ وہاب بلوچ نندارینگ بوت اَنت۔ ھمے زھرشانی ءِ میان ءَ 7 ستمبر ءَ چہ سرکارءِ نیمگءَ ترانکاریءِ یک ٹولی یے شد ہرتالی بنجلءَ اتک۔ سرکارءِ ٹولی ءِ گپ ءُ گالاں گوں ایدگہ گلانی نودربراں وتی شد ہرتالی پروگرام آسر کت، بلئے بی ایس ای سی ءِ گیشتریں سنگتانی پیسلہءِ ردا گل ءِ سنگتاں وتی زھرشانی برجاہ داشت۔ھمے ڈول چیزے روچءَ داں اے زھرشانی یکشلءَ برجاہ بوت ءُ پدا 10 ستمبر ءَ سرکارءِ نیمگءَ چہ دگہ یک ٹولی یے پہ ترانکاریءَ اتک، کہ اے ٹولی صوبائی وزیر اسد بلوچ ءُ ہیلتھ سیکرٹری دوستین بلوچ ءِ سروکی ءَ اتکگ اَت، ایشانی گوما بازیں گپ ءُ گالاں پد جیڑہءِ گیشینگءِ مھکمیں بیسہاں گوں تا دم مرگ شد ہرتالی زھرشانی آسر کنگ بوت۔
پنچمی بنجاھی مجلس
5 اکتوبر 2020 ءَ بلوچ اسٹوڈنٹس ایکشن کمیٹیءِ پنچمی بنجاھی مجلس بنجاھی کماش ڈاکٹر نواب ءِ پاگواجہی ءَ شال ءَ برجم دارگ بوت۔ دیوان ءِ تہا گوستگیں زرتگیں پیسلہ ءُ کارانی سرا چمشانک دیگ بوت۔ انوگیں جاورھالانی سرا گپ ءُ تران بوت۔ءُ آؤکیں گامگیج ءِ ایجنڈہءِ تہا نودربر سیاست ءِ بارہءَ ءُ تنظیمی کارانی دیما برگ ءِ ہاترءَ پیسلہ زورگ بوت۔ بلوچستان ءِ تہا نوک جوڑ بوتگیں کتابجاھانی واستہ سنگت فیروز بلوچ ءِ نام ءَ یک بک ڈونیشن کیمپیئن یےجنزینگءِ پیسلہ زورگ بوت۔دیوان ءَ بنجاھی کمک کار گشاد حاجی حیدر ءُ شال ھنکین ءِ باسک اشفاق بلوچ ماٹوکنگءَ چہ پد آھانی کار ءُ کردانی سرا گپ ءُ تران کنگ بوت، گل ءُ گلءِ سنگتانی ھلاپ ءَ وتگڑیں بھتام ءُ پروپیگنڈہ کنگ ءِ سوب ءَ دیوانءَ پیسلہ کت ءُ آ چہ گل ءَ کشگ بوت اَنت۔
بنجاھی مجلسءِ گیشتریں سنگتانی ھیالءَ گوں خالد بلوچ بنجاھی کمک کار گشاد ءُ اظہر بلوچ ءُ عارف بلوچ بنجاھی مجلسءِ باسک گچین کنگ بوت اَنت۔
بک ڈونیشن کمپیئن
چوشکہ پنچمی بنجاھی مجلسءَ یک پیسلہ یے “بک ڈونیشن کمپیئن ” بنام بیگواھیں سنگت فیروز بلوچ زورگ بوتگ اَت۔ اے پیسلہ ءِ مول ءُ مراد بلوچستانءِ جتا جتائیں ھند ءُ دمگانی کتابجاھاں پہ کتابءِ کمک کنگ اَت۔ بزانکہ چہ لس مہلوکءَ کتابءِ زورگ ءُ پد اآھاں بلوچستانءِ کتابجاھانی تہا بھر ءُ بانگ کنگ ۔بنجاھی اے پیسلہ ءِ ردءَ گلءِ کلیں ھنکیناں وتی وتی ھنکیناں،بک ڈونیشن کیمپ جنگ بندات کت۔
چوشکہ 4 نومبر 2020 ءَ بلوچستان یونیورسٹی ءُ 5 نومبرءَ بی ایم سی ءَ بک ڈونیشن کمپیئن ءِ بندات چہ شال ھنکین ءِ نیمگءَکنگ بوت۔
ھمے ڈول12 ءُ 13 دسمبر ءَ کراچی ھنکین ءِ نیمگ ءَ کراچی یونیورسٹی ءُ 15 نومبرءَ فقیر کالونی ھوار یک چار روچی بنجلے بزاں 21 داں 25 نومبر ملیر ءِ بازیں ھنداں جنگ بوت۔لس مہلوکءِ مزنیں کچے اتک ءُ پہ بلوچستانءِ کتابجاھانی ھاترا کتاب دات ۔ ءُ 29 نومبر ءَ اسٹریٹ لائبریری بلوچ چوک لیاری ءَ ھم یک بنجلے جنگ بوت۔
23 24 نومبر ءَ دو روچی بنجلے ماں خضدار ءَ جنگ بوت۔ ھمے درچءِ برجاھیءَ ڈی جی خان ھنکین ءِ نیمگ ءَ 1 دسمبر ڈی جی خان ءَ ءُ 9 دسمبر ءَ راجن پور ءُ 12 فروری ءَ تونسہ شریف ءَ بک ڈونیشن بنجل جنگ بوت کہ اودءَ لس مہلوکءَ بے کچءَ بھر زرتگ اَتءُ جوان جوانیں کتاب سوگات کتگ اَت۔
15 دسمبر ءَ چہ بارکھان ھنکین نیمگءَ بنام فیروز بک ڈونیشن بنجلے جنگ بوت۔دیمترا ھمے مراگشءِ برجاھیءَ 12 ءُ 13 دسمبر ءَ حب ءَ دو روچی بنجلے جنگ بیتءُ گڈسرءَ 19 جنوریءَ ماں پنجگورءَ یک بک ڈونیشن بنجلے جنگ بوت۔
Baloch Students Action Committee is a Student political organization that aims to work for the betterment of Education in Balochistan and politicizing the youth
