بلوچ اسٹوڈنٹس ایکشن کمیٹی تربت ھنکین، یونیورسٹی آف تربت بنزہ ءِ بنزھی دیوان برجم دارگ بوت
بلوچ اسٹوڈنٹس ایکشن کمیٹی تربت ھنکین ءِ یو او ٹی بنزہ ءِ بنزھی دیوان، بنزھی کارمستر سنگت آئشہ بلوچ ءِ سروکی ءَ برجم دارگ بوت دیوان ءِ مھمان ءِ ھاس ھنکینی کُمک کار مستر سگیر بلوچ ءُ اعزازی مھمان ھنکینی کارگُشاد مھمد بلوچ ءُ ھنکینی کُمک کارگشاد حبیب بلوچ اِت اَنت۔ دیوان ءَ گْوستگیں کارانی اھوال، تنقیدی نشست ءُ تنظیمی اُموار ءِ سرا تْران ءَ پد آھوکیں گامگیج ءِ کْوھنیں کابینہ ھلاس کنگ ءُ نوکیں بنزھی کابینہ ءِ سنگت گچین کنگ بوت کہ آھانی تَہ ءَ آئشہ بلوچ پہ بنزہ ءِ کارمستر ءُ کریم بخش بلوچ پہ بنزہ ءِ کارگُشادی ءَ گچین کنگ بوت اَنت۔
بنزھی دیوان ءَ تْران کنان ءَ ھنکینی کُمک کارمستر سگیر بلوچ ءَ دَرائینت ءُ گُشت کہ مئے اھد ءِ ورنا مزنیں کچّے ءَ نشہ ءُ اے دگہ چاگردی سل کاریانی آماچ اَنت ءُ چہ وانگ ءُ زانگ ءِ پڑ ءَ گِستا بوان اَنت۔ مرچگیں وھد ءِ لوٹ ایش نہ انت کہ اھد ءِ ورنا وتی بے بھائیں وھد ءَ پہ بے نپیں کاراں بہ گوازین اَنت ءُ زوال ءِ نیمگ ءَ برو اَنت، بِگندے مرچگیں ورنا بلوچ راج ءَ یک جِتا ءُ بے مٹّیں بانداتے ءِ واھند کُرت کن انت ءُ چوش پہ وانگ ءُ زانگ ءُ شعور ءَ بیت کنت، بلے مرچی ھمے راج ءِ ورنا وتی راجی پرز ءَ پورا مکن انت ءُ راجی جیڑھاں گیشّ ءُ گیوار کنگ ءِ زمہ ءَ وتی کوپگاں مہ زور اَنت گڑا ایش پہ بلوچ ءَ مزنیں تاوانے بیت۔
دیمترا سنگتاں تْران کنان ءَ گُشت کہ دُگنیا ءِ کُنڈ کُنڈ ءَ بگر داں وتی ھَند ءِ جاورانی تپاسگ ءَ پد مارا جِتا جِتائیں سیاسی جاورانی دُروشُم گندگ کاینت ءُ دُگنیا ءِ ھرچ وڈیں زوراک چہ سیاسی جاوراں نپ چست کن انت ءُ پہ رِپک راجانی سرا واجھی کن اَنت۔ مرچی بلوچ راج ھم ھمے جاوراں گوں دوچار اِنت ءُ جاورانی جتگیں مردمانی ھاترا گونڈیں بدلیی یے ھم تاھیر بکشیں ساھے کشّگ ءِ موکل بیت ءُ بزّگیں راج مُدام پہ ھمیشی ءَ زِند گوازینگ ءَ اِنت۔ مردماں مدام ھمے رنگ ءَ مژدہ دیگ بیت کہ دیمروی چہ مرچی ءَ بِندات اِنت ءُ مردم پہ بُنکّی ھکّانی ھاترا ریپینگ بوگ ءَ اَنت۔ ھمے ھاترا ھرچ سیاسی سنگتے ءِ ھاتر ءَ اے الّم اِنت کہ آ تھی ءُ ڈنی اڑانداں بہ پھمیت ءُ چرایشاں بہ گْوزیت ءُ دیمروی بہ کنت۔ ھمے رنگ ءَ بلوچ نودربر سیاست ھم مدام وتی ڈنی ءُ تھی اڑانداں گْوزیت ءُ دیمروی کنت، ھمے اڈاندانی پجارگ ءُ گیشینگ پہ بلوچ سیاست ءِ باندات ءِ ھاترا ھژدری اِنت۔
آؤکیں گامگیج ءَ بنزہ ءِ گْوستگیں کابینہ ھلاس کنگ بوت ءُ نوکیں کابینہ اڈ دیگ بوت۔ بنزہ ءِ اگدہ داراں چہ کار مستر سنگت آئیشہ بلوچ، کُمک کار مَستر یاسر بلوچ، کارگُشاد کریم بخش بلوچ، کُمک کارگُشاد عبدلرحمٰن بلوچ ءُ ھالرسانی کار گُشاد حکیم بلوچ گِچین کنگ بوت اَنت.
ھنکینی سنگت ءَ نوک گِچین بوتگیں کابینہ سوگِند دات اَنت ءُ سنگتاں وتی زمہ واریانی پورا کنگ ءِ کول کُت.
Baloch Students Action Committee is a Student political organization that aims to work for the betterment of Education in Balochistan and politicizing the youth
