شونگال
ادارہ
نودربر سیاست پرچیءَ اَلّمی اِنت۔؟ بگندئے اے جستءِ پسّو جتاجتائیں ھیال ء ُ لیکہ آں گوں دیگ بیت بلے بلوچ چاگرد ءِ تہءَ نودربر سیاست ءِ ارزشت ء ُ لوٹ چی اَنت۔؟اے جست مدام یک نودربر گلے ءِ مستریں گپ ء ُ گال (مکالمہ) ءِ بھر بہ بیت۔ یک سیاسی نودربر گلے ءِ ھیسیتءَ ما ھمے سرپد بَہ اِیں کہ سیاست سائنس اِنت، سیاست راجی سنچ (شعور) ءِ دیمروئی دیگءِ مستریں وسیلہ اِنت۔ سیاست ایردست ء ُ زوراک ءِ نیامءِ پجار ءِ گشّینوک اِنت، سیاست راجی بزگی ءِ ھلاپ ء ُ راجی دیمروئی ءِ ھاترا چاگردءِ مھلوک ءِ یکجاہ کنگءِ وسیلہ اِنت۔
نودربر سیاست پہ اے ھاترا الّم اِنت کہ ورنا راجانی باندات اَنت۔مروچگیں زرداریں میااستمانی ربود(نظام) ءِ تہءَ دگنیاءِ اِستانء ُ راج وتی استانی ء ُ راجی دیمروئی ء ُ میااستمانی ربود ءِ تہءَ وتی وت واجھی ءِ برجم دارگ ءِ ھاترا مزنیں تاگت ء ُ وسائل ایردستیں راج ء ُ مھلوکانی سرا بے کساس کارمرز کنگ ءَ اَنت۔دگنیاءِ اے ربود ءِ تہءَ یک ایردست ء ُ لگتمالیں راجے ءِ رکینگ ءِ ھاترا راج ءِ ورناآں گوں زانت ء ُ سرپدی ءَ یک مزنیں جھدےءِ پکار اِنت۔ بلوچ راج بگندئے مروچی وتی دپتر ءِ نازُرکیں دور ءِ تہءَ گوزگءَ اِنت، اے جاورانی تہءَ بلوچ لس مھلوک ھاس بلوچ ورنا آنی زمہ واری گیش بنت۔ اگاں مروچی بلوچ ورنا اے گپ ءَ ماراَنت ء ُ نودربر سیاست ءِ باکائدہ بھر جوڑ بنت گڑا بگندئے کہ بلوچ ءِ آؤکیں پدریچ اے جنجالانی دیمپان نہ بیت کہ مروچی اِنت۔ نودربر سیاست ءِ تہءَ ورنا الم چہ بازیں ردّیاں چہ گوزاَنت، بازیں جنجال ء ُ جیڑھانی آماچ بنت،ھمے کُلیں کُرتناں چہ گوزگ ءَ رند ورنا سیاست ءِ تہءَ گیش باسَما بنت ء ُ راجی رھشونیءِ ڈُبّہ آں زرت کن اَنت۔
اِدا اے گپ ءِ گیشّینگ ھم الّم اِنت کہ سیاست ء ُھاس نودربر سیاست ء ُ لیٹریچر یک دومی ءِ ھاترا پہ الّم اَنت۔ ابیدئے سیاسی لیٹریچر ءَ سیاست کنگ ممکن اِیں چیزے نئے۔ مروچی بلوچ ورناآں اے گپ پھمگ لوٹ اِیت کہ لیٹریچر راجی دیمروئی ءِ تہءَ مستریں تاکت اِنت۔ ھمے ھاترا بلوچ سیاسی نودربر اں گیشاں چہ گیش گوں لیٹریچر ءَ سیادی کنگ لوٹ اِیت۔ لیٹریچر سیاسی نودربرانی تہءَ نگدی سنچ (تنقیدی شعور) ودیگ کنت۔ سیاسی نودربر اں پہ نگدی سنچ اَلّمی اِنت۔ چاگرد ءِ تہءَ نگدی سنچ ساچشت ء ُ دیمروئی ءِ بنیات اِنت۔ اے وھد ءِ لوٹ اِنت کہ بلوچ نودربر بلوچ چاگرد، بلوچ دپتر ء ُ بلوچ سیاست ءِ نگدی جائزہ بہ زور اَنتء ُ نوکیں ھیال ء ُ لیکہ آں دیما بیار اَنت۔ اے کرتن ھما وھد ءَ سرجم بیت کہ وھدے بلوچ نودربرگیشاں چہ گیش لیٹریچر ءَ گوں نزیکی کن اَنت۔
بلوچ اسٹوڈنٹس ایکشن کمیٹی یک نودربر گلے ءِ بستار ءَ ھمے سرپدبیت کہ بلوچ ورنا اے جاورھالانی تہءَ گیشاں چہ گیش سیاسی کرتن (عمل)ءِ تہءَ گوں سنچ ء ُ زانت ءَ بھر بہ زور اَنت۔ بلوچ اسٹوڈنٹس ایکشن کمیٹی گوستگیں دہ سالاں چہ ھمے جھدءَ کنگ ءَ اِنت کہ آبلوچ نودربرانءَ وانگی اکادمی آنی تہءَ یک مھکمیں سیاسی ادارھے بہ دنت۔ما ھمے سرپد بہ اِیں کہ بساک وتی اے جھد ءِ بندات کنگءَ سوبمند بوتگ بلے اے انگت بازیں پندے بُرگی اِنت۔یک بزگیں ء ُ لگمتالیں راجے ءِ سرجمیں نودربر تبکہ ءَ راسیاسی جوڑ کنگ ء ُ آھاں یک مھکمیں سیاسی ادارھے ءِ بھر جوڑ کنگ ءِ ھاترا سکیں مزنیں ء ُ باسَمائیں جھدےءِ پکار اِنت۔
بلوچ اسٹوڈنٹ ایکشن کمیٹی ءِ سئے ماھی تاک ”نوشت“ھمے جھد انی بھر اِنت۔ بساک گوستگیں دہ سا لاں چہ جتاجتائیں دروشماں بلوچ نودربرانی نیام ءَ سیاسی ماھولے جوڑ کنگ ءِ جھد ءَ کنگ ءَ اِنت۔ اے جھد ءِ تہءَ بساک ءِ سنگتاں بلوچستانءِ مزن ء ُ کسانیں دمَگاں زانشتی سرکل، مراگش ء ُ سیمینار ءِ دروشم ءَ جتا جتائیں سیاسی بنگپانی سرا مراگش اَڑ داتگ ء ُ اے سپر انگت برجاہ اِنت۔
اے تاک کہ شمئے دستءَ اِنت اے بلوچ اسٹوڈنٹس ایکشن کمیٹیءِ جار کشّ بہ زان اِت کہ ترجمان اِنت۔
بساک لیٹریچر کمیٹی ءِ سنگتاں وتی سرجمیں وس ء ُ واک ءَ گوں ھمے جھد کتگ کہ اے تاک بہ زان کہ ”نوشت“ یک معیاری اِیں سیاسی تاکے بہ بیت ء ُ بلوچ نودربرانی سیاسی تربیت ءَ بہ کنت بلے انچوش کہ ماسرپداِیں کہ دگنیا ءِ تہءَ ھچ چیز وتی تہءَ سرجم بوت نہ کنت ھمے رنگ ءَ اے تاک ءِ تہءَ ھم کسان ء ُ مزنیں نزوری بوت کنت ء ُ ما ھمے اُمیت کن اِیں کہ شما اے تاک ءَ گوں نگدی چمّاں وان اِت ء ُ اے تاک ءِ بارو ءَ وتی شور ء ُ سلاھاں مارا سر کن اِت۔
( اے نبشتانک بلوچ اسٹوڈنٹس ایکشن کمیٹی ءِ تاک “ نوشت “ ءِ شونگال اِنت )
Baloch Students Action Committee is a Student political organization that aims to work for the betterment of Education in Balochistan and politicizing the youth
