کتابجاہ کیمپئن
ادارہ
اے یک راستی یے کہ چیزے وھداں چہ پیش بلوچستان ءِ تہءَ وانگ ءِ ماھول بے کساسیں نزوری آنی آماچ بوتگ کہ اودءِ ورنا ء ُ لس مھلوکءَ ھچبر وانگی جیڑھانی سرا چار ء ُ بچار نہ کتگ۔ اے تکءَ نئیکہ کسےءَ سرپدی داشتگ ء ُ نہ کسےءَ گامگیجے زورگءِ جھد کتگ۔ اگاں کسے ءَ سرپدی داشتگ گڈا آئی وانگی چستء ُایرانی سرا باکائدگیءَ گوں ھچبر یک مھکمیں رنگےءَ کار کنگءِ جھد نہ کتگ،بہ زان کہ اکادمی دابءَ (ادراہ جاتی)ھچ کارے نہ بوتگ۔ نہ بلوچستان گورنمنٹءَ وتی زمہ واری سرجم کت کتگ اَنت ء ُ نئیکہ دگہ ھاسیں اکادمی یے دیمءَ اتکگ کہ اے تکءَ کار بہ کنت۔
سال 2017 ءَ بلوچ اسٹوڈنٹس ایکشن کمیٹیءِ لیڈرشپءَ ھمے کمی مار اتگ اَت کہ بلوچستانءِ تہءَ بازیں وانوکیں نودربر است اِنت بلے وانگی ماھول نہ بوئگءِ سوبءَ آ گیش جنجالانی آماچ بوئگءَ اَنت ء ُ چہ وانگی ماھولءَ سدگءَ اَنت۔ھمے کمی ءِ پشدرءَ بلوچ اسٹوڈنٹس ایکشن کمیٹیءَ یک مھکمیں شکلےءَ گوں کتابجاہ کیمپین بندات کت، کہ ایشیءِ بنیاتی لوٹ ھمیش اَت کہ بلوچ ورنا وانگی ماھولءَ گوں گیش نزیک کنگ بہ بیت ء ُ آھانءَ وانگء ُ زانگ ء ُ یک کتاب ءِے ماھولے دیگ بہ بیت۔ پہ ھمے کیمپینءِ ھاترا بلوچ اسٹوڈنٹس ایکشن کیمٹیءِ لیڈرشپ جتاجتائیں تبکہ ءِ مھلوکءَ گوں نندء ُ نیاد کنت ء ُ چہ اش ء ُ پدکتابجاہ ءِ ارزشتءِ سرا کسان کسانیں تامر جوڑ کنت۔
کتابجاہ کیمپینءِ بارو ءَ بی این پی ءِ رھشون ثنا بلوچ،کلچرسیکٹری ظفر بلیدئی،ڈاکٹرشاہ مھمد مری،منظوربلوچ،عابدمیر،بلوچستان یونیورسٹیءِ وائس چانسلر جاوید اقبال، آغاگل، سنگت رپیک ء ُ گورنمنٹ جھگیر ء ُ سوبائی مزن وزیرجام کمال ء ُ وزیر ھزانگ ظہور بلیدئیءَ گوں نندء ُنیاد کنگ بوتگ۔
بلوچ اسٹوڈنٹس ایکشن کمیٹیءِ 8 دسمبر 2017ءَ بندات بوتگ اِیں اے کیپمئنءَ بلوچ اسٹوڈنٹس ایکشن کمیٹیءِ باسکاں اَچ وتی کمکءَ وت شالءِ دمَگ سریاب ڈگری کالج ھاسٹل ءِ شھیدصبا ء دشتیاری کتابجاہ،ھُزدار مزن شھدربرجاہءِ عبداللہ جان جمالدینی کتابجاہ،اوتھل ھاسٹل ءِ یوسف عزیزمگسی کتابجاہء ُ مھمد حسین عنقاء کتابجاہ جوڑ کتگ اَنت۔ کتابجاھی کیمپئنءِ بنیاتی لوٹاں چہ یکے اش اَت کہ سرجمیں سریابءَ کتابجاہ دیگ بہ بیت،چو شکہ سریابءِ نودربر پہ وانگ ء ُزانگءِ ھاترا سریابءَ چہ دور شال ءِ شھرءِ دگہ کتابجاھانی روگءَ پہ بازیں جنجالانی دیمپان اِتنت۔
بلوچ اسٹوڈنٹس ایکشن کمیٹی ءِ ھمے کیپمئنءِ بنیاتءَ سریاب ڈگری کالج کوئٹہ ءَ ڈیجیٹل اوپن لائبریری دیگ بوت کہ آ ھمے اَستیں سال بہ زان کہ 2020ءَ سرجم بیت۔انچوش کہ بلوچ اسٹوڈنٹس ایکشن کمیٹیءَ وتی ھمے کیمپئنءِ ھاترا وانندگیں تبکہءَ گوں نندء ُ نیادءَ ھوار آھانی کسانیں تامر جوڑ کتگ ء ُ اشیءَ ھوار رسانکدرءِ تہءَ #tag Libraries for balochistan ھم کارمرز کتگ تاکہ جتا جتائیں شھر ء ُ دمگانی تہءِ نندوکیں مھلوک کتابجاھانی ارزشتءَ سرپد بہ بنت۔ء ُ ھمے کیپمئنءَ دور دوراں سر کنگءِ ھاترا بلوچ چاگر دءِ اعلم دوستیں مھلوکءِ گومءَ نندء ُ نیاد ھم کنگ بوتگ کہ آ اے دابیں کرتن ء ُ کارانی تہءَ مئے کمک ء ُ رھشونیءَ بکن اَنت۔ھمے درگتءَ آغاگل،شاہ مھمد مری،منظور بلوچ،سنگت رپیک، بی ایس اوءِ گوستگیں کماش آصف بلوچ،ثناء بلوچ ء ُایندگہ اِلم دوستانی تامر ھم جوڑ کنگ بوتگ اَنت ء ُ رسانکدرءَ شنگ ء ُ تالان کنگ بوتگ اَنت۔
مروچی بلوچستانءِ کجام ھم دمَگءَ کہ کتابجاہ جوڑ کنگ بوئگءَ اَنت، اے کتابجاہ پہ بلوچ زھگ ء ُ زالبولانی وانگی ماھولءِ ھاترابے مٹیں آسراتی اَنت کہ چہ اشانی آسرا آ وتی وانگءِ سپرءَ گیش مھکم کت کن اَنت۔انچوش کہ شالءَ سریاب ءِ نودربراں پہ وانگ ء ُ زانگءِ ھاترا زی اِیں وھدءَ دور درواں پند بُراِتگ آمیدگس دگءَ کائدآزم کتابجاہءَ یا کہ دگہ نیمگاں شتگ اَنت۔ پہ ھمے نودربرانی ھاترا سریاب ءِ ڈگری کالجءِ کتابجاہ اڑ دیگ بوت کہ ادا نودربر گیش وتی وانگءَ وھد دات کن اَنت کہ آھاں دوریں سپر کنگ ھم نہ لوٹ اِیت۔ھمے ڈولءَ سریاب ڈگری کالج ء ِھاسٹل ءِ ِشہید صباء دشتیاری کتابجاہ، خضدار مزن شھدربرجاہءِ، عبدااللہ جان جمالدینی کتابجاہ یا کہ آ دگہ کتابجاہ کہ اڑ دیگ بوتگ اَنت، مروچی اے درستاں پہ نودربرانی وانگءِ ھاترا گیشاں چہ گیش ارزانی پیداک کتگ۔
اے یک راستی یے کہ مروچی بلوچستانءِ بازیں ھندء ُ دمَگاں کہ کتابجاہ جوڑ بوتگ یا کہ بوئگءَ اَنت،ایش بلوچ اسٹوڈنٹس ایکشن کمیٹیءِ جتا ئیں کیمپئن آنی برکت اِنت کہ بلوچ ورنا ء ُ مھلوک کتابجاھانی ارزشتءَ سرپد بوئگءَ اَنت۔مروچی ھمے کیپمئن آں چہ پد ناصرآبادءَ بگر بلیدہ، گوادر، پنجگور، اوتھل،خضدارءَ ھوار شال ء ُ دگہ بازیں ھند ء ُ دمَگاں کتابجاہ جوڑ کنگ بوئگءَ اِنت کہ چہ ایش ء ُ پیش اے پیمیں چیز مارا گندگءَ نہ اتکگ۔
دلگوش: اے نبشتانک بلوچ اسٹوڈنٹس ایکشن کمیٹی ءِ تاک “ نوشت “ ءِ تہا چھاپ بوتگ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
