بلوچستان کتاب کاروان
ادارہ
بلوچ اسٹوڈنٹس ایکشن کمیٹی نا بنیاتی خواست اندا مسونے کہ خواننگی آ جاہ آتیٹی نودر بر آتا ہڑ و جنجال آتے سر پد مننگ اوفتے حل کننگ نا کوشست مرے۔او نودر بر آتیکن اَسے اندونو پلیٹ فارم اس جوڑ مرے اراڑے نوجوان آتا علمی و زانتی صلاحیت آک مونا اتننگ مریر۔انداہی سوچ و فکر ارفسٹ تینا داپار ایپار نا سیاسی و سماجی پیچیدگی تا خاطر کن نودر بر آتیٹی سوچ و فکر وَدی کننگ کن وڑ وَڑ نا پروگرام اڈ ترسٹ برسٹ ءِ۔اندا پروگرام آتون اوار بساک کتاب کلچر ءِ پروموٹ کننگ کن تعلیمی ادارہ تے تون اوار سماج ٹی اگاہی مہم بندات کرے۔
بلوچ اسٹوڈنٹس ایکشن کمیٹی نا بندات آن خواست اندا مسونے کہ نودربر آتیٹی کتاب دوستی ءِ مونا اتننگ نا جہد مرے۔انتیکہ اَسے راج ئس وختس کہ کتاب تون دوستی،مہر و مابت کیک امو راج ءِ دنیا ٹی ہچو طاقت ئس مونی اِننگ آن توننگ کپک۔دُنکہ بلوچ سماج علمی حوالہ ٹی بنیات آن نزور ءِ۔کتاب آتون بازکم بندغ نا خڑکی اَرے۔اندا خاطرکِن بی ساک نا پروگرام آتیٹی غُٹ آن بھلا پروگرام ”بلوچستان کتاب کاروان“ ء ِ ۔
بلوچ اسٹودنٹس ایکشن کمیٹی ”بلوچستان کتاب کاروان“ نا بندات ہمو وختاکرے کہ ارا وختا بلوچستان ٹی کتاب نا زیہا ایت کننگ مرگ و زِند نا نیام ٹی سلینگ ء ُ ایت کننگ نا وڑ اَس۔دا نا جوڑ اِنگا جاور حال آتیٹی کتاب قیدی امبار قید ٹی بند اَس۔کتاب آتا زیہا پابندی ائس،کتاب آک اوشنگ مسورہ۔کتاب دوست تخوک ء ُ خوانوک آک زندان ٹی بند کننگارہ۔اندا وختٹی اندا جاور حال آتیٹی بلوچ اسٹوڈنٹس ایکشن کمیٹی نا سنگت آک تینا کمٹمنٹ و نظریاتی بنیات اَٹ ”بلوچستان کتاب کاروان“ نا پروگرام نا بندات کریر اَرا اینو اِسکان برجاءِ۔
بلوچستان ٹی اینو ہم کتاب نا خواننگ کِن حالات آک جوان افس۔ولے انداہی حالت آتیٹی کتاب خواننگ کِن ماحو ل جوڑ کننگ،کتاب دوستی ءِ زِندہ تخننگ،بلوچستان نا کُنڈ کُنڈ آ مخلوق نا دوٹی کتاب تننگ،اندا جاور آتیٹی کتاب دوستی نا سوب آن مختلف علاقہ آتیٹی سفر کننگ دا جنجال و فریشانی تے دافتے تنظیم نا سنگت باز جوانی ٹی سر پد مریرہ۔ولے اوڑان باوجود ہم سنگتاک دا چائے سونو کہ ننے دا کاریم کن اخس خواری ء ُ بزگی ضرور مریک۔
بلوچ اسٹوڈنٹس ایکشن کمیٹی تینا دا پروگرام ٹی اَخس کامیاب مسونو،اَخس کمی کوتائی مسونے،دا فیصلہ ءِ بلوچ سماج نا خوانندہ غا نودربر آک کیر۔نن راجی زانت نا خاطر کن دا سفر ءِ برجاء تخینا او جہد کینہ کہ دا کاروان ٹی دے پہ دے جوانی اَتین۔انتیکہ اینو نا وھد ء ُ حالت آتا خواست اندادے کہ اگہ نن چاگرد ٹی کتاب دوستی نا خاطرکن کمک کپن گڑا نن اَسے جوانو شعور یافتہ ء ُ سماج ئس جوڑ کننگا کامیاب مفنہ۔بلوچ تاریخ ٹی دا اولیکو وار کہ بلوچستان ٹی دُنو کتاب میلہ خلننگ مننگے۔او ننے دا ایت آ یقین ءِ کہ بی سیک نا دا کتاب کاروان بلوچ چاگرد اَٹی دے آ نہ دے ئس ضرور بدلی اتیک۔
”بلوچستان کتاب کاروان“ نا بُنیات سال 2017 ٹی گدرینگوکا چیئرمین رشید کریم نا کماشی ٹی مس۔تنظیم نا سنگتاک آک اندا فیصلہ ء ِ کیرہ کہ بلوچستان ٹی کتاب دوستی،کتاب کلچر ءِ مونی دننگ کِن کہ شال تون اوار اوار بلوچستان نا ایلو شہر آتیٹی بک اسٹال خلنگ مریک۔دا کاروان نا اولیکوفیز ءِ فروری 2017 ٹی سریاب مل کوئٹہ ٹی لُمئی بولی نا دے نا ردٹ بک اسٹال خلسٹ بندات مَس۔21مارچ2017 آن مستونگ،قلات،خاران،بیسمہ،نوشکی،چاغی،خضدار ٹی ہم بک فیئر خلنگ مریک۔داڑان ابید انداہی رنگ اَٹ شال نا غٹ خوانوکی آ جاگہ غاتیٹی وخت تون اوار بک فیئر اَڈ تننگ مریک۔ ننکن دا اَسے خوشی نا ایت ئسے کہ پروگرام آتیٹی مختلف علاقہ آتا نودربر آتون اَوار اَمو علاقہ نا ادیب،سیاسی ء ُ کتاب دوست آ بندغ آتا بھلو کچس ساڑی مسورہ او بی سیک نا دا وڑنا عمل آتے بھاز خوش کریرہ ء ُ مونی دننگ کن تجویز تسُرہ۔
تنظیم نا سنگت آک دا بک فیئر آتیٹی زیات آن زیات اندا کوشست کریرہ کہ کم آن کم قیمت آ کتاب آتے تننگ مرے تاکہ ہر نودربر،کتاب دوست آبندغ آسانی ٹی کتاب ارفنگ کے ء ُ خوانے،اندا وجہ غان کتاباتے زیات تر نیم قیمت آ بہا کننگانے۔داڑے اسے پین ایت ئس واضح کروئی ء ِ کہ تنظم نا اِچ دا مقصد متنے کہ او دا بک فیئرآ تن مالی فائدہ ارفے بلکہ باز جاگہ تنظیم تینا پاراغان خرچہ کرینے۔
بلوچ اسٹوڈنٹس ایکشن کمیٹی بھاز آ کمزوری،شیفی،بڑزی تا پد نومبر 2018 ٹی تینا اولیکو کامیاب کونسل سیشن کیک۔کونسل سیشن آن پد اَسے وار ولدا سنگت آک فیصلہ ارفیرہ کہ ”بلوچستان کتاب کاروان“ نا ارٹمیکو فیز ءِ بندات کننگن نا۔اَسے وار وَلدا تنظیم تینا کتاب دوستی،کتاب کلچر پروموٹ کننگا نا مسخت ءِ مونا تخسٹ ارٹمیکو فیز ءِ بندات کیک۔وختس کہ ستمبر 2019 ٹی بے نظیر بھٹو یونیورسٹی ٹی ”لیاری لٹریری فیسٹول“ نا بندات مریک گڑا بلوچ اسٹوڈنٹس ایکشن کمیٹی نا سنگت آک اندا فیسٹول ٹی بک فیئر خلسٹ ”بلوچستان کتاب کاروان“نا ارٹمیکو فیز نا بندات کیرہ او اندن دا کاروان مون مُستی روان مریک۔لیاری ٹی بک اسٹال خلننگ نا تینا جاگہ غا اہمیت ئسے اونا سوب دادے کہ لیاری بلوچ سیاست،لبزانک،تاریخ نا گڑھ پاننگ مریک۔
اندا کتاب کاروان نا سفر ءِ برجاہ تخسِٹ کتاب دوستی و کتاب کلچر ءِ سما ج نا بشخ ئس جوڑ کننگ نا خاطرکِن 6,7 نومبر 2019 آ خضدار ٹی اِرا دئی ء ُ بک اسٹال اس خلنگا۔اولیکو دے خضدار انجئیرنگ یونیورسٹی ٹی،ارٹمیکو دے جھالاوان میڈیکل کالج ٹی دا بک اسٹال اَڈ اَلک۔دا تعلیمی ادارہ غاتیٹی بک اسٹال خلنگ نودربر آتیکن ادبی،سیاسی ء ُ سماجی لحاظ اٹ بھاز اہمیت تخک انتیکہ اول و کوشست اندا مسونے کہ بلوچستان نا کُنڈ کُنڈ آ دا ماحول جوڑ کننگ مریک ایلو خضدار نا وڑنگا جاگہ غاتیٹی کتاب کلچر دننگ ام تینٹ اہمیت تخک انتیکہ خضدار ٹی بھاز وختان اَسے خوف نا ماحو ل ئس مسونے۔اندا ماحو ل نا وجہ غان کتاب خواننگ تینا جاگہ آ کتاب دوٹی کننگ ہم جرم ئس مسونے۔بلوچ اسٹوڈنٹس ایکشن کمیٹی نا دا بک فیئر آک خضدار نا ماھول بدل کریر داسا ہر نودربر تون ضرور کتاب ئس ارے۔
دا کتاب کاروان نا سفر اسے نہ کُٹوک ء ُ سفر ئسے۔سنگتات مُدام اندا کوشست ٹی ء ُ کہ بلوچستان نا ہر دمہ غا وخت وخت نا زیہا دا کاروان نا ہمراء مرسٹ بک اسٹال خلین۔انداہی سوچ و فکر ءِ ارفسٹ 10,11 نومبر 2019 آ پوسٹ گریجویٹ کالج سریاب روڈ کوئٹہ ٹی اِرا دیئی ء ُ بک فیئر اس خلنگا۔دا بک فیئر ٹی سریاب نا مخلوق آن تون اوار اوار کالج نا استاداک ء ُ نودربر آک اُست نا حُب اٹ شریک مَسُر او کتاب السٹ بھاز خوشی نشان تسر یقینا دا تنظیم نا سنگت آتے کن اَسے جوانو گامگیج اَسے او اُست بَڈی اس امراَرے۔
عشاق نا دا قافلہ مونی روان مرسٹ مون تربت کن کرے۔11,12,13 نومبر 2019 عطاء ڈگری کالج تربت آ سر مس۔اَسے وار والدا دا ثابت کرے کہ دا قافلہ ہر حالت ٹی تینا قول و فعل نا پاسداری کیک بلوچستان نا کُنڈ کُنڈ آ سر مریک۔مُسے دے اموڑے مرسٹ اوکان پد تربت یونیورسٹی ٹی کتاب کاوان نا قافلہ تینا کتاب آتے سر کرے۔
انداہی فیصلہ ءِ (بلوچستان کتاب کاروان نا ارٹمیکو فیز) برجاء تخسٹ اَسے وار وَلدا تنظیم مون صحبت پور کن تَس او سر الک۔18,19 دسمبر 2019 آ صحبت پور کلچر فیسٹول آ تینے سر کرسٹ بک فیئر خلک۔اوکان پدا 30 دسمبر 2019 راجن پور نا علاقہ روجھان مزاری ٹی ”بلوچستان کتاب کاروان “نا رند آک سر مسر۔اند اڑتون اوار” بلوچستان کتاب کاروان“ نا ارٹمیکو فیز اَسے جوانو اُمید سیتو ن آسر مَس۔
بلوچ اسٹوڈنٹس ایکشن کمیٹی نا پاراغان دا کتاب کاروان نا مسخت تنیا کتاب آتے سر کننگ نا اَف بلکہ سنگتاتا بھلا مسخت دادے کہ نن بلوچ سماج ءِ اَسے سیاسی ء ُ لبزانکی ء ُ سماج ئس جوڑ کننگ نا کوشست کین۔او نودربر آک اندافتن اثر السٹ کتاب تون خُڑکی کیر۔ہراکہ دنیا ٹی ہر ترقی یافتہ قوم نا مسخت اندا مریک کہ اونا نودربراک،ورناک کتاب تون دوستی کیر۔انداہی امید تون بلوچ اسٹوڈنٹس ایکشن کمیٹی تینا دا کاروان ءِ مون مُستی دننگ نا کوشست کیک۔
دلگوش: دا نوشتانک بلوچ اسٹوڈنٹس ایکشن کمیٹی نا تاک “نوشت” ٹی چھاپ مسونے۔
Baloch Students Action Committee is a Student political organization that aims to work for the betterment of Education in Balochistan and politicizing the youth
