ماتی زبان
نبشتہ کار: پناس میئرنی : رجانک: کندیل بلوچ
اے نبشتانک چہ انگریزی ءَ بلوچی ءَ رجانک کتگ ءُ اے تخلیق یوکرائن نبشتہ کار پناس ئیگ انت۔
پناس میئرنی سینزدہ مئی ھژدہ سد چل ءُ نو ءَ ما یوکرائن ءَ ودی بوتگ۔ پناس یوکرائنین زبان ءِ نامی ایں ردانک ءُ کسمانک نگارے بوتگ۔ آ بیست ءُ ھشت جنوری, نوزدہ سد ءُ بیست ءَ بیران بوتگ
ھمک انسان ءِ براھندگ ءُ دوست ایں چیز آئی ماتی زبان انت, بنی آدم ءَ زندگ داروک ایں ھزانگ انت, مردمانی گوست ءِ امبار انت۔ آیانی لوٹ, دربرگ, سرگوست ( اکسپیریئنس ) ءُ سار بزاں بود ءِ اکس کاری ءَ کنت۔
گوں لبزانی یک جاھ کنگ ءَ ما کسانی ءَ چہ گپ کنگ ھیل کن ایں, ما پھم ایں لبزانی بزانت چی اَنت–لھتین سامانانی نام ءُ چیزانی بارگ ءَ ھیال– ما گشت کن ایں کہ گوں لبزانی یک جاھی ءَ ھوش ءُ اکل ءَ کار گیت کن ایں, دومی ءِ ھیلاں منت کن ایں, ما جیڑت کن ایں ءُ ھمئے ھیلاں ما وتی ماتی زبان ءَ درشانگ ءَ ھیل کت کن ایں۔ مئے آؤکیں پدریچ وتی تب ءُ میل ءَ وتی وھد ءَ زبان ءَ نوکیں درشمے ءَ دیما کارانت, لبزانی جاگہ جوڑ کن انت ءُ آیاں سرگوستانی سرا جیڑگ ھم پرمائیت۔ اے گپ راست انت کہ انسان ءِ زبان ءِ دیمروی, رودگ ءُ وَدگ گوں ھمک آؤکیں پدریچ ءَ بندوک انت۔
ءُ وھدے بنی آدم ءَ کاگد ءِ سرا نبشتہ کنگ ءِ رھبند زانت ءُ بندات کت گڑا اشی چہ زبان ءَ را ودگ ءِ کمک رست۔ ھمایاں کہ اے کار ءِ واست ءَ وتی زند ندر کتگ گوں وتی نبشتگیں شائری ءِ براہ ءُ درشانگ ءَ بگر داں گہترین آزمانکاں زبان ءَ را ابدی گالبنداں گوں گنج بکشاتگ۔ سوگو ءُ کواساں ڈگار ءِ سر ءِ ھستی آنی بابت ءَ سرپدی داتگ ءُ ھمئے وڑا بنی آدم ءِ الم ءُ ودتگ۔
ھمئے سرشاریں نبشتہ کاراں ھمک انسان ءَ را پہ ماتی زبان ءِ دیمروی ءَ کمک کتگ ءُ پمشکا آئی ءِ کد مردمانی تہا مزن بیتگ پرچا کہ ھمئے گشگ بیت زبان لبزانکی کار ءَ چہ دیمروی کنت۔ اگاں ما وتی زبان ءَ اے رنگ ءَ بچار ایں گڑا ما گشت کن ایں کہ مزنیں کساس یے ءَ ندکاراں گوں وتی بے بہایں کاراں مئے زبان ازگار بزاں انرچ کتگ۔ مئے زبان انگت آ کچ ءُ کساس ءَ سر نا انت کہ دگے مردم ھزانگ کٹ بکن انت۔
اے ابکہ بوھگ ءِ گپے نا انت پرچا کہ مئے ندکاراں ایواکا سد سال ءَ چہ وتی ھنر ءُ سازتگیں کاراں مئے ماتی زبان ءَ تخلیق کنگا انت, چش کہ دگرانی لبزانکی میراس یا مڈی ھزاراں سال کھون انت۔ اے گپ ءِ پدر کنگ المی انت, اَول سرا مئے زبان ءِ دیمروی ایواکا فردی کارانی دروشما بوتگ پرچا ھما وانندگ کہ وانگ جاھاں بوتگ انت, آودا اے زبان بزگر ءُ اناڑی آنی زبان گشگ بوتگ۔ وانگ جاھاں اے زبان ءَ گپ کنگ ءِ موکل ھم نہ بوتگ بس ڈیھ ءِ تہی کمو زلورت ءِ واست ءَ کارمرز بیت بلے سائنسی ءُ تعلیمی بسات ءِ کد نہ بوتگے۔ ءُ انگت مئے لھتین وت گلا پگر ایں ندکار وتی پشتپد ءُ بنزہ بے ھال کنگا انت, وتی ماتی زبان ءَ مکن کنت ءُ اشی کسانیں زند ءِ پیشن گوئی کننت۔ چش کہ لس مھلوک چہ وانگ ءَ روژن پگر جوڑ بنت ماتی زبان ءَ بے کار گشنت ءُ ڈالچار کن انت۔
اے وڑیں ھبر ما سک دیر انت ھشکنگا ایں, ھما مردم کہ وتی ماتی زبان ءِ واست ءَ پگر مند انت گڑا ماتی زبان ءِ مہر کنگا چہ دارگ نہ بنت, آیانی ایمان لگتمال کنگ نا بیت, تخلیقی سونچ ءَ ھساس این سوت, اپک شائری, گیدی کسہ ءُ بتل ءِ شریں درور پیلو کتگ۔ ھمئے تخلیقی زور انت انسان ءَ را وتی ماتی زبان ءِ سرا پھر بندگ پرماتگ, اشان ءَ وتی تہا پہ کار کنگ ءَ متاثر ءُ ازمکاری ءَ پیلو کنگے کمک کتگ۔
وھد ءُ پاس روان بوت, ندکارانی کساس باز بوان بوت چہ مئے وتی ءُ ڈنی وت گلا ایں زنتکارانی ( وائز ایکرز) زور دیگ ءُ پیشن گوئی ودان بوت انت۔ بلے مئے ندکارانی کاراں وتی پجار شری ءَ کت ءُ نوں ما گند ایں دگے مردم مئے سوگو ایں ندکارانی ازمکاری ءَ گوں ھُب ءُ واھگ دراگ بندات کتگ, آیانی کتگیں ازمکاری ءَ وتی زباناں رجانک کنگا انت دانکہ تخلیقی ھاٹیگ ءُ اسل ءَ بزان انت, ءُ ھمئے کردگار انت ابرمی ھستی ءِ تہا بنی آدم ءِ دربرگ ءَ ربیدگ گشگ بیت۔
اے پدری گپے کہ ما چہ دیری ایں واب ءَ جھ جتگ ءُ ما وتی کر ءُ کشا چارگ بندات کتگ, دنیا ءَ را گشگا ایں کہ ما ھم دگرانی وڑا زندگ بوھگ لوٹ ایں دانکہ ابرمی ھستی ءِ تہا ما وتی ربیدگ ءِ بھرشت ءَ ایر بکن ایں۔ اے وت گلا ایں زنتکارانی پیشن گوئی مارا ھچ داشت کت نا کن انت پرچا کہ تخلیقی زور ءَ پدا جھ جتگ ءُ مئے زبان پدا زندگ کتگ۔
ءُ دانکے مئے وت گلا بزان انت کہ ماتی زبان چی یے, ما الم ادا کواس ایں ندکار ترجینو ءِ ماتی زبان ءِ سرا کسان کیل (میئژر) ءُ جھل مانا ایں رجانکے دیے ایں۔
شک ءِ روچاں, منی ماتیں گل زمین ءِ کسمت ءِ دردیگیں روچاں, تو ایوکا عظیم ایں زوراور, راست گو ءُ روسی آزات ایں زبان منی کمک کنوک ءُ ھاٹیگ یے۔ اگاں اے تئ واست ءَ مہ بوتین انت, بے شک من سجا آنی دیما بے ھاٹی ءَ گوں کمک کت نہ کتگ ات چش کہ لوگا آس جمبور انت بلے کسے بیسا کت نہ کنت کہ یک زندگیں راجے را ابید دگہ کسے را چش ایں زندگین زبانے دیئگ بوتگ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
