بلوچ اسٹوڈنٹس ایکشن کمیٹی بروری بُنزہ ءِ یونٹ باڈی دیوان
بنزہ ءِ کارمستر فہد بلوچ ءِ پاگ واجھی ءَ برجم دارگ بوت
11 اپریل 2021 ءَ بلوچ اسٹوڈنٹس ایکشن کمیٹی بروری بُنزہ ءِ یونٹ باڈی دیوان بنزہ ءِ کارمستر فہد بلوچ ءِ پاگ واجھی ءَ برجم دارگ بوت، دیوان ءِ ھاسیں مھمان ھنکینی کارگُشاد شلی بلوچ ءُ گچینی (اعزازی) مھمان ھنکینی کارمستر نزر مری اِت اَنت۔
درستاں چہ پیش ھنکینی سرکولر وانگ بوت ءُ دراھیں باسک اے درگت ءَ جوانیں وڑے ءَ سرپدی دئیگ بوت اَنت- ھنکینی سرکلر ءَ رند
بُنزہ ءِ پیسریگیں رپورٹ (یونٹ سابقہ رپورٹ) پیش کنگ بوت۔
چد ءُ دیم دیوان ءَ شرگداری باوست ایر کنگ بوت ءُ دراھیں باسکاں جتاجتائیں جیڑہ، نزوری ءُ ردیانی سر ءَ باوست ءُ شرگداری کت۔
دیمتر ءَ دیوان ءَ گلی کار (تنظیمی امور) ءِ باوست ایر کنگ بوت ءُ گل ءِ کارانی گھتری ءُ جوانتری ءِ واست ءَ دراھیں باسکاں وتی زانشتی ءُ پگری شور ءُ سلاہ دات اَنت۔
دیوان ءَ دیمتر ءَ میان استمانی ءُ دمگی راجکاری ءِ بن گپ ءِ سر ءَ ھنکینی سنگت ءَ جوانیں وڑے ءَ سرپدی دات ءُ گْوشت کہ میان استمانی ءُ دمگی راجکاری ءِ درگت ءَ سرپد بوھگ ءُ وت ءَ گوں نوکیں وھد ءَ ھمگرنچ کنگ ءِ ھاتر ءَ اژدری اِنت کہ بلوچ نودربر گیشاں چہ گیش راجکاری ءِ دراھیں رھبنداں بزان اَنت ءُ آشنا بہ بنت۔ آئی ءَ دیمتر ءَ گْوشت کہ راجکاری مروچیگیں وھد ءِ اوّلی لوٹ بوتگ اگاں مارا دیمروئی کنگی اِنت ءُ دنیا ءِ گاماں گوں ھمگام بوھگی اِنت گڈا مارا، سیاسی، زانشتی، لیکھی ءُ پگری دروشم ءَ مھکم بوھگی اِنت۔
دیوان ءَ جتاجتائیں بن گپانی سر ءَ باوست ءُ تران ءَ پد آؤکیں گام گیج (آئندہ لائحہ عمل) ءِ دِرچ ءَ پیسریگیں آرگنائزنگ باڈی ھلاس کنگ بوت ءُ نوکیں یونٹ ءِ واست ءَ سنگت گچین کنگ بوت اَنت۔
کارمستر: فہد بلوچ
کمک کارمستر: کامران بلوچ
کارگشاد: شہاب رشید
کمک کارگشاد: جاوید بلوچ
شنگکار: جمیل بلوچ
ھنکینی سنگت ءَ بنزہ ءِ نوک گچین بوتگیں اگدہ دار سوگند دات اَنت، نوک گچین بوتگیں بنزہ ءَ گل ءِ کاراں جوانیں ءُ رھبندی دروشم ءَ دیما برگ ءِ کول ءُ مسام کت۔
Baloch Students Action Committee is a Student political organization that aims to work for the betterment of Education in Balochistan and politicizing the youth
