بلوچ اسٹوڈنٹس ایکشن کمیٹی تربت ھنکینءَ نوشت اسٹڈی سرکل برجم داشتگ
مروچی 28/06/2021 ءَ بلوچ اسٹونٹس ایکشن کمیٹی (تربت ہنکین) ءِ سنگتاں زونل جنرل سیکریٹری محمد بلوچ ءِ چیر دستی ءَ پبلک پارک ءَ اولی ھنکینی اسٹڈی سرکل برجم داشت۔ دیوان ءِ تہا ھنکینی کُمک کارمستر سغیر بلوچ ءَ یاسرجی ایم ءِ نبشتانک ”سیاست ءُ سیاسی ورکرے ءِ زمہ واری” ءِ سرا تران کُت۔ درْستان چہ پیش آئی ءَ سیاست سرا تران کنان ءَ گُشت کہ سیاست چاگرد ءِ تہے جیڑھانی سرا گپ کنگ ءُ پدا ھمے جیڈھانی گیِش ءُ گیوار کنگ ءِ ھاتر ءَ جہد کنگ ءَ گُشنت۔ یک چاگردے ءِ تہا زانتکاریں مردمے ودی بیت۔ آ گندیت کہ مئے چاگرد ھرابیانی آماچ اِنت۔ آ مردماں گوں نندیت، باوست کنت آھاں چاگردی ھرابی چاگرد ارزشتداریں جیڑہانی بابت ءَ سرپدی دنت۔ نا تہنا مسلہانی بابت ءَ سرپدی دنت، بلکنہ آ جیڑہانی گیش ءُ گیواری ءِ راہ ءَ ھم گیشین کنت۔ سیاسی ھوالہ ءَ پوہ ءُ سرپد بوھگ ءَ رند آ زمین ءِ سرا عملی کار ءَ بندات کنت ءُ وھد ءِ ھمرائی ءَ کار ءِ رپک ءُ ھُنر ءَ سرپد بیت۔
سرھال ءِ سرا تران کنان ءَ دیمتر ءَ سنگتاں سیاسی ادارہانی جوڈ بوھگ ءِ طریقہ کار گیشّینت کہ وھدے یکیں پکر ءِ منّوکیں مردم یکجاہ بنت گڑا آ وتی کاراں دیما برگ ءِ ھاتر ءَ ادارہ ٹہین اَنت۔ سایسی ادارہانی تہا فرد ناں بلکیں مُچّی ءُ مُچّی ءِ جیڑہ ارزشت دارنت۔ سیاسیی مردماں ھچ گپ وتی زات ءِ یا انا ءِ مسلہ سرپد بوھگی نہ اِنت، بلکیں زات ءُ زاتی جیڑہانی بدلہ چاگردی یا کہ راجی جیڑہ گیشّینگی اَنت۔ سیاسی ادارہانی تہا مردم ءِ ازم ءُ آئی ءِ کُتگ ئیں کار ءِ سرا تنقید بیت۔ مردم ءِ زات ءِ سرا تنقید نہ بیت۔ سیاسی ورکرے واستہ عہدہ بائدیں مسلہ مہ کنت۔ آئی ءِ ھاتر ءَ بس وتی جہدکَنگی اِنت۔ سنگتاں سرھال ءِ سرا ءَ گیشیں گپ کنان ءَ گُشت کہ سیاسی سنگتاں گوں یکے دومی ءَ مُھکمیں سیادی ءِ بوگی اِنت۔ سنگت بزان یکے دومی ءِ ھم پکر ءُ ھمراداری کنوک بہ بنت۔ سیاسی ءُ آشوبی ادارھانی سنگتی ءِ رشتہ دنیا ءِ شوکتریں ءُ ارزشتداریں سیادی اِنت۔ پمیشکہ سنگتانی وت ما وت تپاک بوھگ ھم الّمی اِنت۔
سرجمیں سنگتانی سرھال ءِ سرا ھیال درشان کنگ ءَ پد دیوان ءِ ھلاسی ءِ جار جنگ بوت۔
Baloch Students Action Committee is a Student political organization that aims to work for the betterment of Education in Balochistan and politicizing the youth
