سیاسی سنچ ءُ درشان
رمس: 24\08\2021
بساک تربت ھنکین لاء ڈپارٹمنٹ ءِ سنگتاں سَیمی نوشت وانگی سرکلے اڈ کُتگ۔
سرکل ءِ تہا بساک ءِ نوشت،حنیف دلمراد ءِ نبشتانک ءِ سرا گپ ءُ تران بوتگ۔
مرچئیں سرکل زونل ڈپٹی جنرل سیکریٹری ھبیب بلوچ ءِ چیردستی ءَ اڈ دئیگ بوتگ،سرکل ءِ تہا زونل انفارمیشن سیکریٹری سہیلہ بلوچ ھم ساڑی بوتگ۔
سرکل ءِ تہا لاء ڈپارٹمنٹ ءِ سنگت دلاور بلوچ ءَ نوشت ءِ نبشتانک سیاسی سنچ ءُ درشان ءِ سرا گپ ءُ تران کنان ءَ گُشت سیاسی ورکرے ءَ را سیاسی رویہ ءَ گوں سیاسی سِنچ ءُ زانت ءِ دارگ الّمی اِنت،یک سیاسی ورکرے ءَ را سیاسی جیڑہانی سرا تجزیہ کنگی اِنت، وھدے سیاسی سِنچ ءُ زانت ودی بیت گڈاں یک سیاسی ورکرے کدی ھم دلپُروش ءُ گپچلانی بہر نہ بیت آ سیاسی اڑاندانی سرا باوست کنت گوں تہمبُل ءُ اوپار ءَ آھاں سر پد بوھگ ءِ جُہد ءَ کنت۔
دیمتر ءَ سنگت ءَ تران کنان ءَ گُشت سیاسی گَلانی تہا اڑ ءُ جنجال الّم ودی بیت بلے ھمے ودی بوتگیں اڑ ءُ جنجال سیاسی داب ءَ، ءُ گوں جْونیں رنگے ءَ گِیش ءُ گِیوار کنگی اَنت۔
اگاں پارٹی ءِ تہا ودی بوتگیں جیڑہ زُوت گیش ءُ گیوار کنگ نہ بوت اَنت دیمتر ءَ گیشتر جیڑہ رُدوم زور اَنت ءُ گَلانی واستہ تاوان جوڈ بنت۔
ما اگاں گوستانک ءِ سرا چمشانکے بدے ایں بازیں گَل وڈ وڈیں جیڑہانی آماچ بوتگ ءُ تاوانانی دیمپان بوتگ اَنت۔
گوستانک ءِ گوستگیں دہکانی بر صغیر ءِ سیاسی منظرنامہ ءِ تہا چِست بوتگیں اڑاند ھچ پیم ءَ رد کنگ نہ بنت،سیاسی اڑاندانی نہ منّگ ءُ آھانی گیش ءُ گیوار نہ کنگ سیاسی گَلاں دیمتر ءَ گیشتر اڑ ءُ جنجالانی تہا دور دنت۔
ما اگاں بچار ایں ھمے ڈولیں سیاسی اڑاند 1940 ءَ چہ برصغیر ءِ سیاسی منظرنامہ ءَ چست بوت ءُ دیم ءَ اتک اَنت کہ تاں مرچی ھمے جاور گوں اڑانداں ردوم زوران ءَ خلیج ءِ ڈولیں جاورھالے پیداک کن اَنت،کہ آئی ءِ آسر پروشت ءُ پروش ءِ دْروشم ءَ دیم ءَ کیت۔
دومی مستریں درورے بنگلادیش اِنت،بنگال ءِ سَوب ءَ مسلم لیگ 1946 ءِ گچینکاری ءَ گوں جْوانیں وڈے ءَ باج بارت بلے گچینکاری ءَ چہ پد اود ءَ سیاسی اَڑ ءُ کُڑ چست بنت،1954 ءَ بنگال ءِ سیکولر ءُ لبرل ”جگتو فرنٹ” ءَ جوڑ کن اَنت ءُ مسلم لیگ ءَ پروش دینت۔
سرکل ءِ گُڈسر ءَ زونل انفارمیشن سیکریٹری سہیلہ بلوچ ءَ تران کنان ءَ گُشت اے مئے وش بَہتی اِنت کہ ما سیاسی پِڑ ءَ وتی گام ایر کُتگ اَنت،مرچیگیں جاور ھالاں بچار ایں گڈاں بلوچ نودربرانی واستہ سیاست الّمی اِنت۔
ما دْرستیں سنگتان ءَ وتی گَل ءِ کار گوں گُشادی ءَ دیم ءَ برگی اَنت مارا وتی راجی زمہ واری سر پد بوھگی اَنت۔
بساک تربت ھنکین
Baloch Students Action Committee is a Student political organization that aims to work for the betterment of Education in Balochistan and politicizing the youth
