میشل فوکو:تاکتءُزانت
رمس 27/8/2021
بساک تربت ھنکین لاء ڈپارٹمنٹ ءِ سنگتاں وانگی سرکلے اڈ کُتگ۔
سرکل ءِ تہا بساک ءِ نوشت،دوستین بلوچ ءِ نبشتانک ءِ سرا گپ ءُ تران بوتگ۔
مرچئیں سرکل زونل ڈپٹی جنرل سیکریٹری ھبیب بلوچ ءِ چیردستی ءَ اڈ دئیگ بوتگ،سرکل ءِ تہا زونل انفارمیشن سیکریٹری سہیلہ بلوچ ھم ساڑی بوتگ۔
سرکل ءِ تہا لاء ڈپارٹمنٹ ءِ سنگت عبداللہ بلوچ ءَ نوشت ءِ نبشتانک میشل فوکو ءِ نبشتانک ءِ سرا گپ ءُ تران کنان ءَ گُشت کہ میشل فوکو(۱۹۲۶۔۱۹۸۴) فِرنچءِ یک زانتکارے، دپترزانتے، چاگردیءُلبزانکی نگد کارے بوتگ۔ فوکوءَ تب زانتیءُایدگہ زانتءُزانشءِسرا یک جوانیں دز رسے بوتگ۔ دنیا ءِ گوستانکءِپگرءُھیالانی ردءَ فوکو ءَ یک نگدی راہءُرھبندے جوڑ کتگ، آھمے رھبندءَسرپد کنائین ایت ک تاکتءُزانتءِ میان ءَ گالءُگپتار چون زانگءُپھمگ بہ بنت۔ تاکت مئے بزان مردمانی رنگءَ دنیاءِ تھا شنگءُتالان اِنت، شنگءُتالانیں تاکت، جتائیں کارستانی وسیلہءَ چاگرداں جوڑ کنت۔ فوکوءِ گشگ انت کہ چاگردءِ تھا تاکت چروکیں ماھور دابیں ادارگانی دروشمءَ اِنت۔ مردم ھمے چروکیں ادارگانی تھا جاہ کن انت،ھمے جاہ کتگیں مردمانی دابانی اندرءَ، ایشانی گپتارانیءُواھشانی تھا چے رنگءَ تاکت وتءَ درشان کنتءُدیم ءَ کار ایت او پدا تاکت ھست دارگءِواستہ، راستیءِ رھبندءَ وت جوڑ کنتءُدیمءَ کار ایت۔
تاکت کہ وتی وت سازیں راستیءِ رھبندے جوڑ کنت گڑا اے وت سازیں راستیءِ رھبند زور جنتءُ وڑالی کنت چوشکہ گوستانک(تاریخ) زانت اِنت۔ چیءَ کہ گوستانک زانتءِبوگ، ھستیں تاکتءِ نزوری ءِ نیمون اِنت۔ تاکت وتی روتگاں کش اِتگءُولگوج کتگ۔ ولگوج کنگءَ پد زانت دگہ جاھے یا دگہ دورےءِ تھا چیر تراتگ۔ گوستءَگوں بندوکیں زانتءَ زور گار کنگ، چیر دیگءُبار دیگءَ رند، اَنگت زانتءِ لھتیں بھر پدر بہ بیت۔ گڑا تاکت وت سازیں رھبندانی تھا ھمے پدر بوتگیں زانتانی بھرءَ وت دیمءَ کار ایت، بلے اے زانتانی بھرانی رنگءُ دروشمءَ مٹءُبدل کنت۔ اے مٹءُبدل بوتگیں زانتءِ دروشم رد کتگیں زانتءِ دروشمءَ بیت۔ زانت ایر جنگ بیت چیاکہ گوستانکءِزانت جھدانی روانیءَ گوں بندوک انتءُگوستءِاے سھتانی تھا کست، کینگءُ جنجال ھست انت۔
بساک تربت ھنکین
Baloch Students Action Committee is a Student political organization that aims to work for the betterment of Education in Balochistan and politicizing the youth
