بلوچ اسٹوڈنٹس ایکشن کمیٹی شال ہنکین ءَسنگت الیاس بنزہ پچ کنئگ بیتئگ۔
کنّر رفیق بنزہ کارمسترءُ نبیل نود بنزہ کارگشاد گچین کنئگ بیتئگ انت۔
بلوچ اسٹوڈنٹس ایکشن کمیٹی سنگت الیاس بنزہ ءِ بنزہی دیوان ہنکینی سنگت واحد بخش بلوچ ءِ پاگواجہیءَ برجم دارئگ بیت۔
بن گپ
◦ پجاری باوست
◦ ہنکینی سرکیولر
◦ تنظیمی امور
◦ ہندی ءُ میان استمانی سیاسی جاورہال
◦ آؤکیں گامگیج
دیوان ءِ بندات چہ پجاری باوستءَ گوں بیت۔ دومی بن گپءَ ہنکینی سنگتءَ ہنکینی سرکیولر ونت ءُ ہنکین نیمگءَ چہ زرتگیں فیصلہ گُشت انت۔
تنظیمی امور تہا سنگتاں گپ کنانءَ گُشت کہ کسے کہ گلءَ اوار بیت گڈا بزاں کہ آہیءَ وتا پہ گلءَ ندر کُت ءُ وتی کُربانی ءُ مخلصیءَ گوں ادارہ ءَ دیمءَ برئگءِ ڈُبہ زُرت۔ مئے گل ءِ کار بلوچ راجدوستی اِنت کہ بلوچ راجءَ جمہوری بنیاتءَ یک مُشت ءُ تپاک کنئگ اِنت۔ بلوچ ءَ را بلوچ بئیگ ءِ سکین دیئگ اِنت۔ اے مئے درستانی زمہ واری اِنت کہ ہر کجام پڈءَ ءُ جاھءَ مارابیساکءِ لیکہ دیمءَ برئگی اِنت۔ ما کہ گوں وتی گلءَ سنجیدہ بیں تاں وتی راج ءَ سنجیدہ بیں۔ مارا گل سینگارئگی اِنت ءُ گل ءِ شِگلءَ راج سینگارئگ بیت۔ مارا وتی ادارہاں بِگر داں وتی ھلک ءُ دمگاں وتی لیکہ سر کنئگی اِنت۔ وتی ایردستیں راجءُ آہی ءِ نودربر بڈءَ بندئگی انت ءُ آہاں سیاستءِ سکین دیئگی اِنت چیا کہ سیاست بیت گڈا راج سینگارئگ بیت راج پوہ بیت ءُ وتی ارزشتءَ زانت۔ بگیر سیاست کنئگءَ پہ ما ہچ نہ بچیت۔
بیساکءِ ہر سنگتءَ کتاباں گوں مہر کنئگی اِنت ءُ کتاب دود ودی کنئگی اِنت۔ ہر سنگتءَ را وتی کشءُ گْوراں سیاسی چاگردی ودی کنئگی اِنت۔ وانگ ءُ زانشت ءِ راہ یلہ دیئگی نہ ایں گُڈا ما سوبمندی ءِ نیمگءَ جُنزان بیت کنیں۔
ہندی ءُ میان استمانی سیاسی جاورہالءِ سرا سنگتاں گپ کُت کہ دنیاءِ سیاست مُدام تاگتور ءِ لنکُکءِ سرا اِنت ہما کہ تاگتور اِنت آ دنیاءَ ہُگمرانی کنت۔ دنیا ءِ تہا ہر وہدءَ چندے تاگتاں وتی بُرزی دارئگ ءِ واستہ دگہ راجانی سرا قبضہ کُتئگ ءُ آہیءِ زمین، دود، زبان، معاشی ءُ معاشرتی نظام تباہ کُتئگ۔ دنیاءِ چاگردانی تہا گیشتر تباہی ہما وھدءَ کئیت کہ صنعتی دور دیمءَ کئیت۔ صنعتی دور ءِ تہا انسان چہ اشتراکی سوچءَ درتک ءُ فردی سوچ ءِ تہا محدود بیت۔ دنیاءِ تہا مدام جنگاں بدلی آورتئگ لہتے ءَ پہ چاگرد ءِ شرّی ءَجنگ کُتئگ ءُ لہتے ءَ وتی تاگت ودّینئگءِ واستہ کسانیں راج ایردست کُتئگ انت۔ مرچی دنیاءِ تہا معاشی جنگ اِنت کہ تاگتور دیمروئی ءِ نام سرا وتی کاروبار ءَچلائین ایت۔ مرچی دیمروئیءِ نام سرا تاگتوراں این جی او دروشمءَ راجانی سرا وتی تاگت برجم داشتئگ۔ کسانیں راج انچو ایر جتئگ انت ءُ مرچی ھیراتی جوڈ کُتئگ انت۔ انسانی ھکانی ادارہ کہ جوڈ بیتئگ انت بلے ہمئے ادارہ تاگتور ءِ کاردار جوڈ بیتئگ انت۔
مئے بلوچ راج ءِ جاور مرچی انچوش انت کہ بلوچ وتی جندءَ چہ درتکئگ ءُ دنی چیزانی رندءَ کپتئگ۔ ما مرچی وتی جند ءِ راجی تاگت ءِ ارزشتءَ نہ زانئگیں ءُ کسان کسانیں ٹولیاں بہر بیتگیں۔ مئے جیڑہ امینچو باز کنئگ بیتئگ انت کہ ما یک جیڑہے گریں دومی جیڑہ سرءَ چست کنت۔ ما انچو کسان کسانیں جیڑہاں گیروشئگیں کہ مئے جیڑئگ ہم کسان بیتئگ۔ مارا لوٹیت کہ وتی راجءُ وتی راجءَ گوں بندوکیں ہر ہما چیز ءَ بہ زیریں کہ مارا یک راج ئے جوڈ بئیگءَ درکار انت۔ وتی راجءَ گوں سنجیدگی بیئگی اِنت کہ لوٹ ءِ زلورت اِنت۔ اگاں ما مرچی نہ جیڑیں ءُ عملی پڈءَ اوار نہ بیں گڈا پہ ما ہچ نہ بچیت۔
دیوانءِ گُڈی بہرءَ بنزہ ءِ کابینہ سنگت گچین کنئگ بیت انت۔ بنزہ کابینہ ءِ تہا بنزہ کارمستر : کنّر بلوچ، کمک کارمستر: قدیر بلوچ، کارگشاد: نبیل نود بلوچ، کمک کار گشاد: داؤد بلوچ، شنگکار: سلام بلوچ گچین کنئگ بیت انت۔ گُڈسرءَ نوکیں گچین بیتگیں سنگت گل ءِ آئین ءِ ھسابءَ سوگند دیئگ بیت انت۔
Baloch Students Action Committee is a Student political organization that aims to work for the betterment of Education in Balochistan and politicizing the youth
