نوشت تاک ءِ ارزشت ءِ سرا چمشانکے ۔
اعجازبابا (بساک ءِ بنجاھی کمیٹی باسک)
بلوچ اسٹوڈنٹس ایکشن کمیٹی بلوچستان ءِ یک پُرکار ءُ راجی نودربر گلے کہ ناں ایوک ءَ بلوچستان ءَ بلکیں پنجاب ءُ سندھ ءِ جتاجتائیں بلوچ ھلکانی ءُ وانگجاھانی تہ ءَ یک نودربر گلے ءِ بستار ءَ وتی لیکہ ءَ سرکنگ ءِ ھواری ءَ بلوچ ورناھاں راجکاری، زانشتی ءُ پگری سنچ بکشگ ءَ اِنت۔ بساک ءِ اولی ءُ مستریں مکسد بلوچ نودربراں راجکاری ءُ پِگری ھساب ءَ زانتکار کنگ، آھاناں جوانیں وڈے ءَ لیکہ ءِ کِشک ءَ پِرّینگ ءُ بلوچ چاگرد ءِ تہ ءَ آھاناں باسما ءُ راجی راھشونے ءِ دروشم ءَ دیم ءَ آرگ اِنت دانکہ آ بلوچ راجی جیڑہ ءِ ھساب ءَ وتی راج ءِ شرّیں رنگے ءَ جھگیری ءَ کُت بہ کن انت۔
گل ءِ ایماندار ءُ لیکھی سنگتانی جھداں چہ گل ءَ پاکستان ءِ جتاجتائیں وانگجاھانی تہ ءَ بلوچ نودربرانی راجکاری، زانشتی ءُ پگری سنچ ءِ زلورتانی سما کنان ءَ ءُ ھاسکار بلوچ چاگرد ءِ تہ ءَ ھمک پھم ءِ مردماں چہ سیادی داروکیں مردمانی اِلمی ءُ پِگری لوٹانی سرجم کنگ ءِ ھاتر ءَ گل ءَ “نوشت” تاک ءِ نام ءَ راجکاری لبزانک ءِ چاپ کنگ بِنا کت، نوشت تاک اولی رند ءَ 2020 ءَ گوں سوبمندی چاپ کنگ بُوت۔
گل ءِ زمہ واریں سنگتاں وتی جھد برجاہ داران ءَ نوشت ءِ دومی، سئیمی ءُ نُوں چارمی تاک شِنگ کُتگ کہ اِے چہ گل ءِ نیمگ ءَ جوانیں ءُ سوبمندیں گامگیجے۔
نوشت تاک راجکاری لبزانک ءِ ارزشت ءُ لوٹ ءَ سرپد کنائینگ ءُ ھاسکار بلوچ ورناھانی راجکاری ءُ پگری زانت ءِ ھیلکاری ءَ جوانیں گامگیجے۔ گل ءِ تہ ءَ راجکاری لبزانک، راجکاری ادارھانی ھاتر ءَ ٹوھیں ارزشتے دار اِیت- دراھیں مھکمیں ادارھانی بنکی جھد ھمے بیت کہ آوتی باسکاں راجکاری زانت بہ دنت۔ پرچا کہ راجکاری زانت ءُ سرپدی ءَ چہ باسک پُختہ لیکھے ءِ واھند بنت ءُ گل ءِ کاراں گوں جوانیں رنگے ءَ دیم ءَ برگ ءِ جھد کنت۔
گل ءِ نیمگ ءَ چہ چھاپ بوؤکیں سئے ماھی نوشت ءِ ارزشت ءِ سرا اگاں ما چماں شانک بہ دے اِیں تَہ من پھم آں کہ وتی ماتی زبان بلوچی ءُ براھوئی ءِ تہ ءَ راجکاری لبزانک ءِ چاپ کنگ کجام ھم گلے ءِ چہ درستاں مستریں سوبمندی اِنت کہ اِے سوبمندی بساک ءَ باز کم وھد ءِ تہ ءَ وتی نام ءَ کتگ۔ نوشت تاک گل ءِ راھبند، لیکہ ءُ گل ءِ لوٹ ءُ گرزانی درچ ءَ بلوچ راجدوستی لیکہ ءِ سر ءَ جوانیں تاکء۔
منی کم اِلمی ءِ ھساب ءَ نوشت اِے نوکیں دؤر ءِ تہ ءَ پہ بلوچ راج ءِ راجکاری لوٹانی پیلو کنگ ءَ یک سوبمندیں تاکے کہ بلوچ ماتی زبانانی تہ ءَ وھد ءِ سرا شنگ بوان اِنت۔ وتی ماتی زبانانی تہ ءَ اِے پیمیں راجکاری لبزانک ءِ شِنگ کنگ سوبمندیں کاراں چہ یکّے۔ اِے پیمیں بازیں مردم ءُ ادارہ است انت کہ وت ءَ راجدوست گُش انت بلے بساک ءِ وڈ ءَ وتی ماتی زباناں راجکاری لبزانک تاک ءِ شنگ کنگ ءَ آ سوبمند نہ بوتگ اَنت۔ اگاں ما بچار اِیں دگہ زبانانی تہ ءَ بلوچ راجکاری راجدپتر ءُ بلوچ راجدوستی ءِ درگت ءَ انچیں نبشتانک ھم نویسگ بوتگ کہ آ چہ راستی ءَ گِستا انت بلے نوشت تاک ءِ تہ ءَ پٹ ءُ پولی نبشتانک گوں دلیلاں پیش کنگ بوتگ انت کہ اِشانی وانگ ءَ گوں پھمگ بیت کہ اِشانی سرا چونیں جوانیں رنگے ءَ کار کنگ بوتگ۔ نوشت ءِ مستریں شرّی اِش انت کہ اِشی ءِ تہ ءَ وتگڑیں ءُ بے بُنیں نبشتانک نیست بلکیں چارگ ءُ تپاسگ ءَ پد جوانیں ءُ سیت مندیں نبشتانک جاگہ دیگ بوتگ اَنت۔ نوشت ءِ ارزشت چہ اِے گپ ءَ پدّر بیت کہ مروچی بلوچستان ءَ ھوار سرجمیں پاکستان ءِ تہ ءَ بلوچ ورناہ، شائر، نبشتہ کار، راجدوست ءُ چہ زِند ءِ اِے دگہ پڈاں سیادی داروکیں مردم نوشت ءَ یکشلا وانگ ءَ انت ءُ سرپدی زورگ اَنت۔
پرچا کہ نوشت تاک بلوچ راج ءِ راستیں راجدپتر، بلوچ راجکاری ءِ راجدپتر ءُ بلوچ راجدوستی ءِ ارزشت ءُ آئی ءِ راجدپتری پھناتانی سرا گپ کنت۔ اِشی ءَ ھوار نوشت تاک ءِ تہ ءَ راجی جھد ءُ دگنیا ءِ اِے دگہ ایردستیں راجانی لبزانک، پِگری ءُ راجکاری جھد ءُ جتاجتائیں راجکاری لیکھانی سرا جوانیں نبشتانک ھوار انت۔ بلوچ راجدوستی ءُ آئی ءِ راجکاری راجدپتر ءِ سرا نوشت ءِ تہ ءَ بے دروریں نبشتانک دست کپ اِیت۔
بساک گل یک انچیں ادارھے جوڈ بوتگ کہ نہ ایوک ءَ پہ وانگ ءُ زانگی ھکّاں جھد کنگ ءَ اِنت بلکیں وتی راجی زبان ءُ اِے دگہ راجی ذمہ واریاں ھم سرجم کنگ ءِ ھاترا گل ءِ سنگت گام جنان ءَ گندگ بنت۔ گل ءَ اِے وھد ءَ بلوچستان ءِ تہ ءِ درستاں چہ ھژدری تریں ذمہ واری کوپگاں زرتگ انت کہ آھاں گوں سوبمندی ءَ دیم ءَ بران انت۔
نوشت نہ ایوک ءَ بلوچ نودربراں راجکاری زانت دیگ ءِ جھد ءَ اِنت بلکیں بلوچ ءِ راجکاری چاگرد ھم آئی ءَ مٹ کُتگ۔ انوگیں استیں دؤر ءَ بلوچ نو آبادیاتی دؤر ءَ چہ گْوزگ ءَ اِنت کہ اے وھد ءَ بلوچ ورناھانی وتی زبان ءَ چہ زبھر بوگ وتی پجار، دود ءُ ربیدگ ءُ راجدپتر ءَ چہ زبھر بوگ اِنت۔ ھمے وڈ ءَ یک راجے ءِ ماتی زبان ءِ ارزشت ءِ سرا دانا ءُ زانتکارانی گوشگ اِنت کہ “دگنیا ءِ تہ ءَ انسان ءِ جوڈ کتگیں دراھیں کاراں چہ مستریں کار آئی ءِ زبان اِنت” پرچا کہ زبان ایوک ءَ پہ یکّے دومی ءَ گوں ھبر ءُ ھال کنگ، یا کہ وانگ ءُ نبشتہ کنگ ءِ ھاتر ءَ کارمرز نہ بیت بلکیں زبان راجے ءِ پجّار ءُ درستاں چہ مستریں میراس زانگ بیت۔ ھمے زبان ءَ گوں یک راجے ءِ ھیال، لبز ءُ گال، کسہ ءُ داستان، لبزانک ءُ راجدپتر ءُ راجی بامردانی جنگی کسہ ءُ آھانی زند ءُ جاورھال، دود ءُ ربیدگ، دودمان ءُ دراھیناں چہ گیشتر ھما راج ءِ سرڈگار ءُ آئی ءِ سرا جھمنندیں راج ءِ مھر ءُ راجی جذبگ گندگ بنت۔
اِے گپاں چہ زانگ بیت کہ اگاں یک راجے ءَ گار ءُ ھلاس کنگ لوٹ ئے گڑا دراھیناں چہ پیش آئی ءِ زبان ءَ ھلاس بکن ءُ آئی ءِ جاگہ ءَ وتی زبان ءَ دیم ءَ بیار گڑا راج ءِ زبان ءِ ھمرائی ءَ راج ءِ جند ھم گار ءُ بیگواہ بیت۔
ھمے اھد ءَ بلوچ اسٹوڈنٹس ایکشن کمیٹی ءَ وتی راجی ھستی، گل ءِ راھبند ءُ مکسد ءِ ھساب ءَ بلوچ ماتی زبان ءِ ارزشت پھم اتگ ءُ وتی راجکاری لبزانک ءَ را دگہ زبانانی تہ ءَ شنگ کنگ ءِ دود پروشتگ ءُ وتی ماتی زبان ءَ شِنگ کتگ، وتی راجکاری تاک ءَ ماتی زبان ءَ شنگ کنگ یک نوکیں گامگیجے کہ اِیشی ءِ آسر سکّ جوان انت۔ نوشت ءِ چارمی تاک ءِ گوں سوبمندی ءَ چاپ ءُ شِنگ بوگ اِے گپّ ءَ پدّر کنت کہ بلوچ نودربر نوشت تاک ءَ گوں ھُب ءُ دلگوش، وتی راجی زمہ واری ءُ درستاں چہ گیش آھاں ماتی زبان ءِ ارزشت پھمان ءَ گوں ایمانداری ءَ آئی ءَ وانگ ءَ اَنت ءُ ایشی ءِ ھواری ءَ ایشی ءِ سر ءَ گپ ءُ باوست، راجکاری، ھال ءُ اھوالی زبان ءُ وتی ھیلکاری مراگشاں ھم وتی ماتی زبان ءِ تہ ءَ کنگ ءَ انت-
21 پروری ءَ سرجمیں دگنیا ءَ ماتی زبانانی میان استمانی روچ شرّیں رنگے ءَ برجم دارگ بُوت، ھمے روچ ءِ درگت ءَ بساک ءِ نیمگ ءَ چہ سرجمیں بلوچستان ءُ سندھ ءِ جتائیں دمگاں ماتی زبان ءُ بلوچ راج ءِ ماتی زبان بلوچی ءُ براھوئی زبانانی ارزشت ءِ سرا مراگش اڈ دیگ بوتگ ءُ جتا جتائیں جاگھاں ھیلکاری پنتاک ھم بھر کنگ بوتگ۔ پرچا کہ بساک ایوک ءَ ھُشکیں دپی راجکاری ءِ سرا اوست نہ کنت بلکیں گوں اَملی دروشم ءَ پہ بلوچ راج ءِ ھاتر ءَ جھد کنگ ءَ اِنت ءُ بساک گوں تیزی ءَ پہ وتی مکسد ءِ نیمگ ءَ جنزان اِنت ۔
بِگندئے من یک کسانیں باسکے ءِ ھساب ءَ نوشت تاک ءِ ارزشت ءَ جوانیں رنگے ءَ درشان کنگ ءَ سوبمند نہ بوتگ آں، بلے ھمے رنگ ءَ کہ نوشت بلوچ چاگرد ءُ ھاسکار بلوچ ورناھانی تہ ءَ شرّیں آسر آران اِنت گڑا ھمے امیت کنگ بیت کہ نوشت آؤکیں وھد ءَ بلوچ راجکاری چاگرد ءَ را زانشتی، پِگری ءُ اَملی دروشم ءَ کار کنگ ءِ کِشک ءَ الّم پیش دار اِیت پرچا کہ اگاں ما دگنیا ءِ اِے دگہ ایردستیں راجانی راجدپتر ءَ بہ وان اِیں کہ آھاں استانی زبان ءِ جاہ ءَ وتی ماتی زبان ارزشت داتگ کہ آئی ءِ درستاں چہ مستریں درور 21 فروری 1952 ءَ پاکستان ءَ بنگلہ دیش ءِ ماتی زبان بنگلہ ءَ را ھلاس کنگ ءِ ھاترا سرکاری شونداتانی دِرچ ءَ پندل ساز اِت بلئے آھاں وتی جان ندر کُت انت ءُ گُڈسر ءَ وتی زبان ءَ را سرکاری زبان جوڈ کنگ ءَ سوبین بوت اَنت۔ اِیشی ءَ ابید سندھی راج ءَ ھم وتی ماتی زبان ھچبر پُشت ءَ دؤر نہ داتگ ھمے سوب ءَ مروچی آھاں وتی راجدپتر، لبزانک ءُ دود ءُ ربیدگ داں یک کچّے ءَ رکّینتگ اَنت۔
گڈسر ءَ من بلوچستان ءِ نودربر، راجکار ءُ لبزانکی، زانشتی ءُ پِگری سنگتاں گوں دستبندی کن آں کہ آ نوشت تاک ءَ شّری ءِ سرا بہ وان اَنت، بہ پھم اَنت، نبشتہ بہ کن اَنت ءُ درستاں چہ گیش نوشت ءِ تہ ءَ ردی ءُ نزوریاں بہ کش اَنت ءُ گل ءَ را الّم سرپد بہ کن اَنت دانکہ گل وتی لبزانک ءَ گیش مھکم ءُ جوانتر کت بہ کنت۔ پرچا کہ نوشت ھما یکّیں راجکاری لبزانک اِنت کہ بلوچ نودربراں زانشتی، راجکاری ءُ لیکھی ھساب ءَ ایماندار کنگ ءَ جوانیں کِردے پیلو کت کنت۔
Baloch Students Action Committee is a Student political organization that aims to work for the betterment of Education in Balochistan and politicizing the youth
