شرگِداری
نبشتہ کار۔خاکی جویو | رجانکار۔ امدادبلوچ
آشوبکاریں راجی ادارہ چہ شرگداریءَ نہ تُرس اَنت،ما چوشکہ آشوبی اِیں ءُ راستیءَ گوں ھمگرنچ اِیں پمیشکہ راجی تاکت بہ زان کہ لَس مھلوک مئے ھمبراہ اِنت۔ یک آشوبی یےءِ نہ تھنا پکر بگندئے آئیءِ بالاد ھم مُھکم بیت۔ آئیءَ اے سِتک ءُ باور بیت کہ آئیءِ سنگت وتی زمہ واریاں گوں ھمّت ءُ دلیریءَ پیلو کن اَنت ءُ ھر نگیگیں ساھتاں گوں وشدلیءَ اَمباز اَنت۔ آشوبی چہ بے سوبیءَ دلپروش نہ بنت ءُ وتی دل ءَ دَور نہ دینت۔ آ نہ چہ شرگداریءَ ترس اَنت ءُ نئیکہ شور ءُ سلاھاں چہ تچ اَنت۔ ھما کَس کہ ھزاراں جنجالاں چہ نہ تُرس اِیت، آ بادشاہءَ چہ اَسپءَ اوں ایر کت کنت۔ اے ھمے جزبہ اِنت کہ ایشیءِ سوَب ءَ آشوبی جد ءُ جُھد دیمروی کن اَنت۔
آشوبی پارٹی شرگداری ءُ وت شرگداریءِ سائنسی سِلاھاں گوں لیس بنت ءُ ھمے سلاھانی کارمرزیءَ گوں ادارہ (پارٹی) وتی تھا چہ گند ءُ گسڑیں کاراں در کنت ءُ شرّیں کارانی نیمگءَ روت اِنت۔ بے ریا ءُ روئیں (دیانتداریں) شرگداری یک انچیں کارے کہ آ آشوبی پارٹیءَ را چہ دومی دگہ پارٹیاں بُرزتر ءُ شرتر کنت۔ پمیشکہ چہ کُلّاں پیش مارا وتی ھیال ءُ کردار پلگارگ کپ اَنت۔ اگاں ما چوش مہ کن اِیں تہ مئے تھا بے کچءَ ھرابی جاہ کن اَنت۔ پہ ھمے ھاترا مارا وتی دل پابندیءَ گوں شودگ کپ اَنت، اگاں نہ ما آئیءَ مہ شوداں تا مئے آشوبی ایں دلءِ نگاہ گندءَ چہ بار گِپت ءُ آئیءِ تھا بدیں بوہ ءُ بیزاریءِ رنگ ودیگ بیت۔ پارٹی ءُ آئیءِ باسکانی کار ءُ کارپدانی تھا اے گند جاہ زرت ءُ مُچ بوت کن اَنت، کہ ایشیءِ پلگارگ ھم بے ھد المی اِنت۔ ”تچوکیں آپ ھچبر ھراب نہ بیت۔“ اے راستیءِ منوگریں ءُیک ھسابءَ جد جھد کنوکیں پارٹیءِ تہا پرشت ءُ پروش ءُ دلپروشیءِ جراثیم پیداک نہ بنت ءُ آھانی کار گند ءُ گسڑ ءِ بوہءَ نہ کن انت۔
وتی کارانی سر ءَ وھد وھد ءِ سر ءَ چمشانک دیگ، جمہوری کاراں گیشءَ چہ گیش ودّینگ، چہ شرگداریءَ نہ تُرسگ، وتی دربُرتگیناں دومیءَ سرپد کنگ، وتی گُشتن ءُ کاراں چہ یکے دومیءِ اڑانداں رکّینگ، سوج دیوکءَ بُہتام جنگءِ جاہءَ آئیءِ گپاں شرّیں وڑے ءَ گوش دارگ، اگاں شرّیں ھبر بنت تہ آھانی سر ءَ عمل کنگ ءُ اگاں گپانی تھا ردی یے بیت تاں آئیءِ گیش ءُ گیوارکنگ; اے زورمندیں آشوبی ءُ سائنسی راہ ءُرھبند انت کہ ایشانی کارمرزی ءِ سوبءَ چہ باسکانی سوچ ءُ پگر ءُ پارٹی ءِ بالاد چہ ھر پیمیں ھرابی ءُ گند ءُ گسڑاں پاک ءُ پلگار بیت ءُ چہ ھرابیءَ رکّینگ بیت۔
پارٹیءِ تھا مدام جتائیں پگر ءُ ھیال دیم پہ دیم بنت کہ آھاں چہ گَل ءُ چاگردءِ نوک ءُ کوھنیں لوٹءُ اڑاندانی جارکشی(ترجمانی) کنگ بیت۔ اگاں یک پارٹی ءِ تھا ھردیں جتا جتائیں پکر مئیت تہ آ پارٹی اوشتءِ آماچ بیت، ھمے سوب اِنت کہ تچکیں آشوبی مردم مدام پارٹیءِ تھا جتائیں پکرانی آھگءِ عمل ءَ ساڑا اَنت۔ اے ترزِ کار آشوبی پارٹی ءُ جد ءُ جھدءِ تھا یکمشتیءَ را مھکم ءُ پُکتہ کنگءِ رھبند اِنت۔ ھمک آشوبی باسک ءُ رھشونءَ را اے ترزِ کار ءِ سرا روگی اِنت ءُ وتی عمل آنی تھا آئیءَ را کارمرز کنگی اِنت بلئے اے ھیال ھم دارگی اِنت کہ آ زاتی اینکدر بے لگام مہ بیت کہ پارٹیءِ رھبند ءُ ڈسپلنءَ سرگوز بہ بنت۔ کہ آئیءِ سوبءَ چہ پارٹیءِ تھا مزنیں زوال ءُ سرسری ایں نزوری آنی رجحان سراں چست بہ کن اَنت ءُ ایشیءَ چہ باسک دلپروشیءِ آماچ بہ بنت۔
پارٹیءِ تھا من پسندی ءُ گروہ پسندی ءِ ھلاپ ءَ جُھد کنگ ءِ ھاترءَ دو گپ ءِ ھیال دارگی اِنت۔
آؤکیں وھد ءَ چہ ردیاں رکّگ ءِ ھاتر ءَ گوستگیں ردیاں چہ دربرگ۔
نادراہ ءَ رکّینگ ءِ ھاتر ءَ نادراھیءِ اِلاج چہ روتگاں کنگ کپ اِیت، ابیدءِ دِل جنگءَ گوستءِ ردی آنی نشاندھی کنگ۔
گوستءَ بوتگیں ردیانی چار ءُ بچارءَ سائنسی بنیاتءَ بکن ءُ آھانی سرا نگدکاری بکن، تا کہ آؤکیں وھد ءَ گھتریں پالیسی جوڑ کنگ بہ بیت ءُ آھانی سرءَ کار کنگ بہ بیت۔
چہ گیشیں ردیاں رکَّگءِ ھاترا گوستءِ ردی آں چہ سبک بہ زور، ردیانی نشاندھیءَ بہ کن ءُ آھانی سرا شرگداری کنگ ءِ مول ءُ مُراد چو داکترےءَ کہ آ یک نادراھےءِ زندءَ رکین اِیت۔
ھما کَس یا باسک کہ آ ردی آں چیر نہ دنت ءُ تا کہ دراہ بوگءَ ردیانی سر ءَ نہ اوشت اِیت بگندئے ایمانداری ءَ گوں آ ردیانی ھلاس کنگ ءُ آھانی گیشینگءِ واھشتءَ دار اِیت، گڑا آئیءِ اے پیمیں کارانی ستا کنگ بہ بیت تا کہ آ یک مسامی آشوبی یے جوڑ بہ بیت۔ اگاں نا ما اے پیمیں کسےءِ ردی آنی سرا واجھی بہ کن اِیں ءُ آئیءَ چہ وتءَ یک کش بہ کن اِیں تا آئیءِ اِسلاہ ھچ رنگءَ بوت نہ کنت۔
کُجام باسکے ءِ لیکہ ئِے ءُ سیاسی نادراھی ءِ دراہءِ ھاتر ءَ مارا اشتاپ کنگی نہ اِنت، بلئے آئیءَ رکینگءِ ھاترا دُراہ(علاج)ءِ جوان ءُ گھتریں رویہ دارگ کپ اَنت۔ پارٹیءِ تھا شرگداریءِ باروءَ اے ھبر ءِ زھنءَ دارگ المی اِنت کہ ”لھتیں باسک شرگداری ءِ وھداں پُرارزشت ءُ ٹوھیں جیڑھاں یلہ کَن اَنت ءُ بے پائیدگیں، بے ارزشتیں ءُ سرسری اِیں جیڑھانی سرا باوست ءُ شرگداری کن اَنت“ ھالانکہ شرگداری ءِ راستیں مول ءُ مُراد سیاسی ءُ ادارھی ردیانی پٹّ ءُ پول کنگ ءُ آھانی نشاندھی کنگ اِنت۔ ھردیں کسے کہ تنظیمی ءُ سیاسی جیڑھاں یلہ کنت ءُ زاتی جیڑھاں شرگداری ءِ کیلو ءَ کار اِیت تہ اے رنگیں شرگداری ءِ دیم دارگی اِنت پرچہ کہ ایشیءِ سَوَب ءَ چہ باسک دلپروش بنت ءُ اے گپ ءَ گیشّینت نہ کن اَنت کہ آھانءَ کنگی اِنت چے ءُ اگاں اے داب ءَ شرگداری برجاہ بہ مان ایت، تہ اے تُرس ھست اِنت کہ پارٹی ءِ تھا ایوک ءَ بے پائیدگیں، گیر زلوری اِیں ءُ سر سری جیڑھانی سر ءَ دلگوش دیگ بیت۔ایشیءِ آسر ءَ باسک ترسءِ آماچ بنت ءُ ھدءَ چہ گیش محتاط جوڑ بنت، پمیشکہ پارٹی راستیں سیاسی ءُ آشوبی پرزانی پیلو کنگءَ بے سوب بیت۔
پارٹیءِ تہا سرسری ءُ دوستی ءُ نادوستی ءِ بنیات ءَ شرگداری ءَ چہ باسکاں وتا رکّینگی اِنت۔ ھر پیمیں گُشتن ءُ شرگداری ءَ راستی ءِ گواچِن بوگی اِنت۔ شرگداری گیش ءَ چہ گیش سیاسی جیڑھانی سرا کنگ بہ بیت چیءَ کہ آ پارٹی ءِ میان ءَ سیاسی تنظیم کاریءَ ودینگ ءُ مُھکم تر کنت۔ شرگداری وھدے زاتی جیڑھانی بُنیات ءَ کنگ بہ بیت ایشیءَ چہ نا تھنا ھما کسءَ بگندئے پارٹی ءُ آئیءِ تنظیم کاریءَ ھم تاوان رس اِیت۔ شرگداریءِ اے انداز پیٹی بورجوا انفرادیت ءِ درشان اِنت۔
تھنا شرگداری ءِ ھاتر ءَ شرگداری ءِ دیم پہ دیم گھتری ءِ ھاتر ءَ شرگداری کنگ بہ بیت۔ ھما شرگداری کہ گھتری ءِ ھاتر ءَ کنگ بیت، باسکاں نا تھنا شرگداری ءِ راستی اِیں مانا آں سرپد کنت بگندئے ھما چاگرد ءِ میانءَ سوبین بوگ ءِ ھاتر ءَ پارٹی ءِ تھاساچشتی بود ھم ودی کنت۔
اگاں آشوبی باسکانی تھا نزوری ھست تہ آھانی گھتری ءِ ھاتر ءَ شرگداری ءَ چہ پُشت کنزگی نہ اِنت۔ یک آشوبی باسکے لس مردماں پہ سنگتے بیت پمیشکہ ھرکسءَ اے اجازت ھست کہ آئیءِ نزوریانی شرگداری ءَ بہ کنت۔ ھردے کہ یک آشوبیءِ سرا نگد شرگداریءِ بنیاتءَ کنگ بوت، تہ آ آشوبی سنگت ءَ وتی نزوریانی (سرا چار ءُ بچار ءُآھانی )گِر ءُ دار کنگی اِنت ءُ اگاں نگدکارءِ سوج پارٹی ءِ ھکّ ءَ بیت اَنت تہ پارٹی ءِ زمہ واری بیت کہ آھانی سر ءَ کار بہ کنت۔ یک آشوبی باسکے ءَ وتی مکسد ءِ سر ءَ ایمان بہ بیت ءُ آ وتی ھمُک کار ءَ گوں لس مردم ءِ پائیدگ ءَ بندوک کنت، پمیشکہ آ ھر پیمیں کربانی دیگ ءَ ساڑی بنت۔ یک آشوبی یے کدی ھم اے رنگیں ھیال، نظریہ ءُ کشک ءَ یل نہ دنت کہ آ لس مھلوک ءِ ھک ءَ بہ بیت نئیکہ چوشیں بے پائیدگی ءِ اجازت ءَ دنت کہ آئی سَوَب ءَ آشوبی پارٹی، آئی رھشون، باسک ءُ زرمبشتءِ سر ءَ لنکُک چِست بہ بیت۔ آ اے رنگیں گند ءُ گسڑ ءَ جاہ کنگ نئیل اَنت کہ یک سلامتیں ءُ جاندراھیں بالادے ءَ نادراہ بہ کن اَنت۔
بے ھسابیں آشوبی ھست اَنت کہ آوتی سراں نمیران کن اَنت بلئے چہ زرمبشت ءَ جتا نہ بنت۔ اے ھما سر اَنت کہ ایشانءَ زندگیں باسک یات کن اَنت ءُ وتا نا امیتی ءَ چہ رکّین اَنت۔ ھچ چوشیں زاتی پائیدگے نیست کہ لس مھلوک ءِ ھاترا یک آشوبی یے کُربان مہ کنت اِش ءُ ھچ چوشیں نزوری یے نیست کہ لس مردم ءِ ھاتر ءَ گیشّینگ مہ بیت۔ آشوبی سنگتاں ھچ پیمیں سوبمندی ءِ پُشت ءَ وتا مزن لیکگی نہ اِنت بگندئے وتا اَچ وش پھمی آں در کنگی اِنت۔ ھمک وھد ءَ وتی کمّی ءُ گیشی، سُستی ءُ نزوریانی سر ءَ شرگداری کنگی اِنت دانکہ نزوری ھلاس کنگ بہ بنت۔ انچوش کہ ھمُک روچ ما وتی دست ءُ دیم ءَ شود اِیں ءُ وتا ساپ ءُ پلگار کن اِیں، ھمے رنگ ءَ پارٹی ءُ آئیءِ باسک ھم چہ شرگداری ءُ وت شرگداری ءِ پراسسءَ گوازینگی اَنت دانکہ پارٹیءِ نزوری کم بہ بنت ءُ آ گیش ءَ چہ گیش ساپ ءُ پلگار بہ بیت۔ شرگداری وھد ءِ سر ءَ کنگی اِنت۔ تاوان یا چہ وئیل یے ءِ بوگءَ پد شرگداری ءِ رجحان رد بیت، ھردیں ایشی ءِ مُراد ردیاں چہ سَبک زورگ مہ بیت۔ ردی ءُ بے سوبی ءَ پد ھیال گور کنگی اِنت ءُ کار گھتریں رنگے ءَ دیم ءَ برگی اَنت۔ یک پارٹی یے یا کہ آئی باسکے ءِ چہ ردیاں پاک بوگ نہ بوتگیں گپّ ئے، بلئے پد ءَ ھم کوشست ھمے بہ بیت کہ وتا چہ ردیاں گیش ءَ چہ گیش پھریزگی اِنت۔ یک وارے اگاں ردی یے بیت گڑا نہ تھنا آ شر کنگی اِنت بگندئے آئی داتگیں تاوان ھم پُر کنگی بیت۔
Baloch Students Action Committee is a Student political organization that aims to work for the betterment of Education in Balochistan and politicizing the youth
