تنظیم کاری ٹی سائنسی وڑٹ کاریم نا گرج
نوشتہ: نادر بلوچ | مٹ و بدل۔ آفتاب بلوچ
سائنس نا طاغتور مننگ ٹی ہَراڑے بندغاتا زند آتیٹی آسانی وَدی مننگ ئے ، ہَموہُن وخت اَتون اَوار ہر وڑھ ئنا پُوسکُنو ایجاد ہم مننگ ئے۔ سائنس اسے ترتیب ئسے، اسے منظم ءُ فارمولا ئسے ہُراڑان بھازا گِڑاک جوڑ مریرہ۔ مالیکیول آن ہلیس زمین، تُوبے، اِستار غُٹ اسے فارمولا نا تحت جوڑ مریرہ۔ بندغ نا سوچ و فکر ہَرا وخت سوج کَننگ شروع کرے گُڑا غور وفکر آن اونا علم گِیشتِر مریسہ کرے ہَرانا دُوں آن اینو ایجاداتاک مونا بسونو۔ سائنس نا دُوں آن اینو انسان اسے جاگہ آن ایلو جاگہ اِسکان ہزارا ٹن کُبین ءَ سامان تے دَننگ ہَتِنگ ٹی سرسوب مسونے۔ سمُندر ٹی ہزارا ٹن آہِن آن جوڑ مروکا کُبین ءَ جِہازاک، آسمان ئٹ ہِنوکا جہازاک بال کَننگ کریر۔
سیاست ءُ نفسیات نا علم ، اِنسان نا حوالہ ئٹ علم ءُ ایلو راجی آں غُٹ علم سائنسی علم آن پیشتَموک او۔ سائنسی علم ئے سرپد مَننگ ءُ ہر حوالہ ئٹ اونا بائٹ علم تِخِنگ تنظیم نا کارم تیٹی جوانی او آسانی ودی کَننگ کیک۔ قیادت ئے تنظیم نا ہر کارم ئے سائنس نا بنیاد ءَ ہُرِنگ اودے تینا ہر جُوانی ءُ خرابی نا زیہا کنٹرول تِننگ کیک۔
گل (تنظیم) انا کاریمک ہمو وخت اثر تخرہ ہرا وخت کہ اوفتے جوان وڑّٹ چاننگان گڈ سرپد مننگک۔ ہیچو کاریم اس چُنّک یا بھلون افک مگر او کاریم اے ملی (مغز) ٹی تخسہ اونا زیا سوچ او بچار کننگ المی اے۔ اسے سیاسی او باسک اس کاریم نا زیا اگر سوج اس کیک تو ہندا سوج آتا حل اکن کاریم نا اہمیت اے سائنسی وڑٹ ہُرینگ نا وڑ او ڈول اس پٹیک۔
گل انت اسے؟ گل نا مسخت انت اے؟ گل انا بنجائ دروشم امر مروئ اے ہرا کہ مسخت اے دوئ مننگ کن مدد ترو؟ مسخت اسکان سر مننگ کن امرو مڈی ضرورت مرو؟ باسک امر جوڑ کروئ مرو؟ گل اے مسخت اسکان سر مننگ کن پین اودان شیف اخس ادارہ مروئ اے ہرا کہ کارم تے برجاء تخر؟ دا ادارہ غاتے ان کاریم کشنگ کن امرو سائنسی وڑ و ڈول اس دوئ کروئ تمو؟ ہندا وڑنا بھاز سوج ودی کروئ تمو تاکہ اسے سرجم او سائنسی نظام اس جوڑ کروئ مرے۔ ہرا مسخت اسکان سر مننگ کن آسانی ودّی کے۔ اسے کاریم سے نا بناء غان مست اوڑ کن وخت نا تعین المی اے کہ او کاریم اے ارا وخت کروئ اے۔ داڑان کاریم اے اسے جوانو دروشم اس تننگ تون اوار دا کاریم نا ایسر کننگ آسان مریک۔شیف نا ادارہ غاک اگر بوشُت (مظبوط) مسور تو گل (تنظیم) ہم بوشت مریکک۔ گل مدام تینا باسک آتے بھاز وڑٹ ہُرسیہ اوفتے آن کاریم ہلسہ کیک۔ اسے سیاسی او گل اس تینا تہہ او پیشن نا پالیسی تے ٹی مدام فرق تخک۔ گل نا باسک آتا صلاحیت آتا مطابق اوفتے کارم ترسہ اوفتے اسے گچینو کڑد اسے نا مالک جوڑ کیک۔
اسے گل اسے نا مسخت اگر راجی اوسے گڑااوڑے گل نا راہشون آتون اوار ہر اسے باسک نا زمہ واری مریک کہ اوفک تینا صلاحیت آتے مونا ہتِسا کیر تاکہ گل تینا مسخت ٹی سرسوب مرے۔ اسے باسک آن ہلیس کہ تیوئ گل اے سائنسی وڑٹ ہُرسیہ کیر۔ گل نا کاریم تے سرپند مننگ کن المی اے کہ تیوئ کاریم تا سائنسی مطالعہ کیر۔ مثلاً گل نا باسک آک اخسّو۔ گل نا کاریمک ارا وڑٹ مونا ہننگو۔ گل نا کاریم کننگ نا طریقہ امرے۔ اس محدود او وخت اسے ٹی پین اخس یونٹ جوڑ کروئ مرو؟ یونٹ اٹی کاریم کروکا باسک آک اخسّور؟ ہرا باسک آک کاریم کننگ افس دا نا سوب انتے؟ یونٹ ٹی زہن سازی امر کیرہ؟ باسک آک انت مطالعہ کیرہ؟ سنگتاتا صلاحیت آتے پو مننگ نا طریقہ انت اے؟ سرکل آک گل کن بھلو اہمیت تخرہ اگر اوفتا بناء سائنسی وڑّٹ مرے۔
سیاسی گپ و تران آتے لس مخلوق اسکان سر کننگ کن تنظیم کاری، کردار سازی، ورک شاپس، سیمینار، ڈیجیٹل کانفرنس، پمفلٹ، سرکل، میڈیا، عوامی رابطہ، برانز، سوشل میڈیا دا کھل مسخت اسکان سرمننگ کن مدد ایترہ۔ دا ذرائع تا زیا سیر اٹ گپ و تران کننگ نا گنجائش ارے۔ ہر اسے کاریم اے ایسر کننگان گڈ اونا اثر نا پیمانہ اے چاننگان اسے پوسکنو موقع اس ودی مریک۔ ہرا نا سوب آن گل نا زیا اسے مثبت او اثر اس تمِک۔ گل نا پالیسی سازی تون اوار ادارہ غاتا کاریم تے ہمو باسک آتا دو ٹی ایتر ہرافتے ٹی تخلیقی صلاحیت ارے۔ اینو نا کوڑی(دنیا) ٹی مقابلہ نا رجحان ارے گپ او نوشت نا وڑ او ڈول آتا استعمال آن تحریک اے منفنگ مریک۔ اسے سوچ و خیال اسے سرپد مننگ کن مسلسل گپ و تران نا رواج اے لس کروئ اے۔ تاکہ سیاسی باسک آتا صلاحیت آتے اسے گچینو رخ اس تننگ مرے او راجی تحریک اے سرسوبی نا کنڈا پند خلینگ ٹی آسان مرے۔
سیاسی گل مرے یا سماجی کھل نا کاریمک اسے باسک آن مرسہ مونا کارہ۔ ہندا و وجہ غائی گل نا باسک آتا زمہ واری او کڑد اے سرپد مننگ تون اوڈان کاریم ہلینگ المی اے۔ انفرادی کڑد اے مونا دننگ کن اسے باسک اسے تینا سیاسی صلاحیت آتے مونا ہتوئ مریک۔ ہیرا اسے خل اسے لیکن تراشنگان پد نایاب جوڑ مریک۔ ہندا وڑٹ اسے کڑد اسے تراشنگان پد اود خاص مریک۔ بروکا وخت ٹی ہندا ورناک راہشون جوڑ مریرہ۔ داڑکن المی اے کہ اسے سیاسی باسک اس تینا جند نا زات اے جوڑ کننگ کن کوشست کے تاکہ اود سائنسی اصول آتے مونا تخِسا کارم کننگ تون اوار اسے بھلو تبدیلی اس ہتنگ ٹی سرسوب مرے۔
Baloch Students Action Committee is a Student political organization that aims to work for the betterment of Education in Balochistan and politicizing the youth
