شونگال
ادارہ
انسانی چاگردءِ تہءَ آئیءِ گْوست پہ آئیءَ یک مزنیں اسرے داراِیت۔ ابیدءِ گْوستءَ انسانی چاگردءِ مرچی ءُ باندات سرجم نہ اَنت ۔ انسانی چاگرد ءِ گْوست مرچی آئیءِ سرجمیں گْوستانک (تاریخ)اِنت ۔ انسانی چاگرد ءِ تب ءُ مئیل ھمے وڑ جوڑ بوتگ کہ کہول ، تمن ءُ راج چہ وتی گْوستانک ءَ درکپت نہ کن اَنت ، بگندئے گْوستانکءِ کمکءَ آ وتی بانداتءِ گہتریءِ کشکاں شوہاز اَنت، گْوستانک آہانی مرچی ءُ بانداتءَ گوں پیوند اِنت۔ ھمے ھاترءَ ما گنداِیں کہ دنیا ءِ تہ ءَ زندگیں راجانی زندگ بوگءِ مستریں مانزمان وتی راجدپتر(قومی تاریخ)ءِ رکینگ ءُ آئیءِ سرءَ پہر بندگ اِنت۔ اے راجدپتراِنت کہ یک راجےءَ چہ دومی راجاں گستا کنت ، آئی ءِ وتی جتائیں ڈیھ ءُ ڈیھءِسیمسرانی شون ءَ دنت ، جتائیں دود ءُ ربیدگانی واہند کنت ، آئی ءِ راجی بامرد اں زندگ دارایت ۔ دنیاءِ تہءَھما زندگیں راج کہ آوتی راجدپترءِ رکینگ ءَ سوبمند بوتگ اَنت ،آراج مرچی نہ تہنا وتی زمین ، دود ءُ ربیدگ ، زبان ءُ راجی بامردانی سرءَ پہر بند اَنت بگندئے مرچی آہانی سرجمیں راجی مارشت ءُ جوزہ گوں وتی گْوستءِ ھر شئےءَ بندوک اِنت ،ھمے ھاترءَ گْوش اَنت کہ پہ یک راجےءِ زندگ بوّگءَ الم اِنت کہ آ وتی راجدپترءَ زندگ بہ دار ایت۔
بلوچ یک راجےءِ بستارءَ ہزاراں سال پیشءِیک گْوستانکے ءِواہُند اِنت ۔ بلوچ ڈیھ دنیا ءِ دْرستاں چہ کْوہن تریں دود مان (تہذیب) ءِ واہُند اِنت ، اے ڈیھ ءَ ہزاراں سال پیش بلوچ ءِ حکومتی بوتگ، پہ اے ڈیھ ءِ رکّینگ ءَ بلوچاں دنیا ءِ مستریں زورگِر ءُ زورآوراں گوں جنگ کُتگ ءُ بلوچ راجی بامردانی گْوستانک ھم سداں سال کْوہن اِنت ، اے دراہیں شئے بلوچ راجدپترءِ بہر اَنت ۔ ایش ھمے بلوچ راجدپترءِ برورد اِنت کہ مرچی یک راجےءِ بستارءَ بلوچ زندگ اِنت ءُ زندگیں راجانی لڑ ءَ بلوچ ءِ نام ھوار اِنت ءُ اے ھمے بلوچ راجدپترءِ سوَب اِنت کہ ہزاراں سالاں پیشءِ بلوچ دود ءُ ربیدگ داں مرچی زندگ انت ، اے ھمے راجدپترءِ برورد اِنت کہ ھمک زوراکانی ھلاپءَ راجی گہگیری بلوچ ءِ راجی تب ءِ بہر جوڑ بوتگ ۔ چوشکہ بلوچ زمین باز پراہ ءُ شاہیگان اِنت ، بلوچ راج ءِ زبان ھم باز اَنت ،جتاجتائیں زورگر اں جتائیں وہداں بلوچ ڈیھ پہ زور گپتگ ، آبہر ءُ بانگ ھم کُتگ بلئے ایشاں ابید ھم ما گنداِیں کہ کوہ سلیمان ءَ بگر داں کراچی ءَ، شال ءَ بگر تا کرمانءَ، ھرکجا بلوچ ءِ راجی مارشت زندگ انت ءُ اے سرجمیں دمگءَ مردمانی پجار تہنا “بلوچ ” اِنت ءُ آبلوچ بوّگ ءِ سرءَ پہر بند اَنت ۔ اے سرجمیں گپانی مول ءُمراد ایش اِنت کہ پہ یک راجےءِ زندگ دارگ ءَ آئیءِراجدپترءِ زندگ دارگ آئی ءِ بُنکی لوٹاں چہ یکے، ابیدءِ راجدپترءَ راج زندگ بوت نہ کنت۔
پمیشکہ بلوچ اسٹوڈنٹس ایکشن کمیٹی ءِ سئے ماہی تاک” نوشت” ءِ سئیمی تاک سرجم ءَ بلوچ راجدپترءِ سرءَ اِنت ،چوشکہ بیساک ءِ سیاسی لیکہ بلوچ نیشنل اِزم اِنت ، نیشنل اِزم ءِ لیکہ ءِ چیدگ وتی ڈیھ ، راجدپتر ، زبان ءُ دود ءُ ربیدگ اَنت، ھمے ھاترءَ راجدوستی ءِ جنز ءِ تہ ءَ وتی راجدپترءِ وانگ ءُ سرپد بوّگ پہ یک راجےءِ مہلوکےءَ الم انت ۔ مئے ادارہءِ جہد ایش اِنت کہ بلوچ ورنا ءُ نودربر درستاں چہ پیسر بلوچ راجدپتر ءَ بہ وان اَنت ءُ آئیءَسرجم ءَ سرپد بہ بنت ءُ ” نوشت ” ءِ اے تاک ھمے جہد ءِ یک بہرے بوت کنت اے تاک ءِ تہءَ چے کساسءِ کمی ءُ گیشی بہ بیت بلئے اے گپ ءَ ما پہ ستک گْوش اِیں کہ اے تاک بلوچ راجدپترءِ سرءَ بلوچ نودربر انی نیام ءُ بلوچ نودربر سیاست ءِ تہ ءَ یک علمی ءُ منطقی گپ ءُ ترانے بندات کت کنت ءُ بیساک ءِ لیٹریچر ءِ مول ءُ مراد ھم ھمیش اِنت کہ بلوچ نودربر سیاست ءِ تہ ءَ نوکیں علمی ءُ منطقی گپ ءُ تران بندات بہ بیت ۔ مئے جہد ءِ بنزہ بلوچ نیشنل اِزم اِنت ءُ بلوچ نیشنل اِزم بنزہ بلوچ راجدپتر اِنت ۔
Baloch Students Action Committee is a Student political organization that aims to work for the betterment of Education in Balochistan and politicizing the youth
