لمئی بولی تا جہانی دے آ “زبان راجی پجار ءِ ” نا پن اٹ تیوہ ہنکین آتے ٹی مجلس اڈ تننگ مرو۔
بلوچ اسٹوڈنٹس ایکشن کمیٹی
بلوچ اسٹوڈنٹس ایکشن کمیٹی نا بنجاہی ترجمان 21 فروری نا دے اکن لمئی بولی تا جہانی دے انا رد اٹ پڑو ترسا پارے کہ لمئی بولی تا جہانی دے آ “زبان راجی پجار ءِ ” نا پن اٹ تیوہ ہنکین آتے ٹی مجلس اڈ تننگ مرو و بلوچستان نا جتا جتا غا ہند آتے ٹی پروگرام اڈ تننگ نا کوشست کننگو۔
بنجاہی ترجمان گیشتر ہیت کرسا پارے کہ بلوچ اسٹوڈنٹس ایکشن کمیٹی اسہ خوانندہ تنظیم اسے نا رد اٹ مدام بلوچ نا لمئی بولی تا رکھ اکن جہد اٹی ءِ و ہندا سوب تنظیم جتا جتا ءُ سیاسی و ادبی تاک شینک و چاپ کننگ ءِ ۔ تنظیم نا آفیشل زبان تے بلوچی و براہوئی کننگانے، ہندا خاتران ادب، پروگرام ، ہنکینی و بینٹی دیوان آتون اوار چنکو و بھلو پروگرام غٹ لمئی بولی تیٹ کننگ مریرہ۔ تنظیم نا ہنکین آک بلوچی و براہوئی کلاس اڈ تننگ نا ہم کوشست کرسا ءُ و تنظیم نا کوشست ءِ کہ بلوچ مخلوق پیشن یا ڈن آن بروک زبان اتا وامداری آن پیشتمسہ تینا زبان آتے تینٹ مونا دے و جہانی پڑ آ سر کے۔
بنجاہی ترجمان ودیک تران کرسا پارے کہ پیشن نا بروکا زبانک بلوچ راج انا زبان تے گم کننگ ءُ و بلوچ نا دود آتون اوار اونا تب ہم مٹ مننگ ءِ ۔ بلوچ راجی پجار نا خاتران لمئی بولی تا کڑد بلوچ کن ہستی و نیستی نا وڑ ءِ ۔ ہندا خاتران دا حالیت آتے ٹی ہندن کہ بلوچ نا زبان تے گم کننگ کن ڈھکوک ءُ چم مننگ ءِ و بلوچ آتے زبان تا زی آ جتا کننگ و جنگ ترفنگ نا کوشست مننگ ءِ ۔ گڑا دا رد اٹ بلوچ مخلوق نا کوپہ آتا زی آ بھلو زمہ واری اس تینا زبان تے رکھنگ و اوفتا دیمروی مریک۔ پاننگک کہ زبان ءِ رکھوک آ راج زندہ ءُ راج اس چائنگ مریک۔
بنجاہی ترجمان گڈ سر اٹ پارے کہ تدوکا سال انا وڑ لمئی بولی تا جہانی دے آ تیوہ ہنکین آتے ٹی پروگرام اڈ تننگو و بلوچستان نا جتا جتا غا ہند آتے ٹی چنکو بھلو مجلس اڈ تننگ نا کوشست مرو۔
Baloch Students Action Committee is a Student political organization that aims to work for the betterment of Education in Balochistan and politicizing the youth
