مڑھداریں نودربراں!
چوشکہ بلوچ اسٹوڈنٹس ایکشن کمیٹی (بساک) راج دوستی ءِ لیکہ ءِ منوگر انت ءُ راجدوستی ءِ لیکہ ءِ گوما بندوکیں ھمک بُنبَھر ءِ سرءَ روچے ھزاراں چِست ءُ ایر مئے دیمءَ کیت ءُ بازیں جیڑہ ،اڑ ءُ جنجال مئے وسءَ چہ ڈن انت بزانکہ لبزانت ءُ زانتکارانی دستاں رو انت ءُ شریں پیم ءَ گیش ءُ گیوار کنگ بنت بلے ایش ھم جیڑگی ھبرے کہ ما بلوچ نودربرءِ بستار ءَ بساک ءِ باسک ماں راجدوستی ءِ مزنیں بنبھر بزاں کہ بندپتر،دودمان، ربیدگ، یاکہ زبانءِ سرءَ چنچو وتی وسءَ کار کُت کنیں؟
گلیں وانندگاں!
مروچی بیستءُ یک فروری میان استمانی ماتی زبانانی روچءِ درگتءَ زانگ بیت کہ ایش روچءِ جندءِ ارزشت مارا شمارا اوّل سرءَ زانگی انت چیا کہ ایش روچ یک راجے ءِ رتکگیں ھوناں گوں بندوک انت کہ ایشانی توکءَ مزنیں کساسے ءَ نودربر ھم ھوار انت ۔ایش روچ 1952 ءِ یک راجے ءِ کُربانیانی بستارءَ زانگ بیت کہ اوّلی رندءَ یک راجے وتی راجی زبان ءِ دیمءَ آرگ ءُ منارینگ ءِ لوٹ ءَ کنت ءُ دنیا ءِ دومی راجاں ماتی زبان ءِ ارزشت ءِ سکین ءَ دنت ءُ پہ دنیا ءِ دومی گلامیں راجانی درورے جوڑ بیت ۔ایش بنگالی نودربر بنت کہ وتی ماتی زبان ءِ ارزشت ءَ زان انت ءُ وتی جان ءَ ببا دینت ءُ ایش ھما کُربانیانی برورد انت کہ مروچی بنگالی راج ءَ نہ تہنا وتی پجار رکینتگ بلکیں دنیا ءَ وتی وتواجہیں استانے ھم است انت ءُ دومی راجان ءَ سکین داتگ کہ تہنا زورگر ءِ زبان زبانے نہ ات بلے دنیا ءِ توکءَ ھمک کُنڈ ،ھمُک ھند ءُ ھمک استان ءِ راجانی ماتی زبانانی یک ارزشتے است انت بلے ایش ارزشت دنیا ءِ دیمءَ آرگی انت ءُ ایش کار ابیدء چہ کُربانیاں بوت نہ کنت۔
بلوچ راج!
بنگالی راج ءَ اے گپ پہم اتگ کہ راجءِ پجار گوں زبان ءَ بندوک انت زبان کہ گارءُ بیگواہ کنگ بیت گڑا راج ھم گار ءُ بیگواہ بیت مروچی بنگالی زبان کہ زندگ انت گڑا دنیا ءِ نکّشہ ءِ توکءَ بنگالی راج ءُ بنگالادیش نامیں استانے گندگ ءَ کیت انت گڑا مئے بلوچ نودربرانی ھم اوّلی کار ھمیش انت کہ مارا شمارا ھم راجءِ ماتی زبانانںی ارزشت پہمگی انت کہ وتی ماتی زباناں گپ کنگی انت ءُ دری زباناں وتی راجءِ زبانانی سرءَ زور آور کنگی نہ انت بہ گندئے تہنا گپ کنگ مزنیں سیتے مہ دنت بلے کسانیں کساسے ءَ بندپتر ءَ مئے شُمے ھمے گپ کنگ راجءِ ماتی زبانانی رکینگ ءَ کسانیں کردے پیلو کُت کنت۔ بلوچ نودربر کجا ھم پڑےءَ کہ وانگ انت تہ آ تہنا بلوچ بہ بنت ءُ وان انت ءُ وتی زبانءِ دیمروئیءَ دیگءَ پیشگام بہ دنت دانکہ باندا روچ آوکیں پدریچ مارا پہ وشیں ناماں یات بہ کنت۔
بلوچ براھمدگاں !
ما باز وھد ءَ بازیں اڑ ءُ جنجالاں گوں مان گیش ایں ءُ بہ گندے اے اڑ ءُ جنجال مئے ودی کتگین نہ انت بلے یک ھدےءَ داں ما ایشانی دیمءَ داشت کنیں،بلوچ راج اوّلی راج نہ انت کہ آئیءِ زبان یک ءَ چہ گیش انت بزان ھمّک ھند ءِ بلوچءِ زبان ءِ تہءَ مزنیں یا کہ کسانیں رد ءُ بدلی است انت ءُ باز وھدءَ ھمیش ردءُ بدل یک مزنیں پرک ،تپاوت یا کہ جنجالے ودی کنت ءُ ما شُما ھم ھمیش جنجالانی آماچ بئیں کہ ایشیءِ سوباں ما دری راجءِ زباناں گپ کنگ بندات کنیں یا وتی دلءَ ھمے گپ ءَ جاہ دئیں کہ دومی منی ماتی زبان ءَ گپ نہ کنت گڑا ما چیا گپ بہ کنیں یا کارمرز بہ کنیں ،ھو اے گپ ھم رد کنگ نہ بیت کہ ھمُک بلوچ ءِ ماتی زبان ءِ یک ارزشتے است انت ءُ ھمّک بلوچے ءِ ھاترءَ اژدری انت کہ وتی ماتی زبان ءَ گپ بہ کنت، نبشتہ بہ کنت ءُ بہ وان ایت چیا کہ ھمّک بلوچءِ سرءَ پرز انت کہ وتی ماتی زباناں بہ رکین انت چیا کہ اے روچ بلوچ راج ءَ ھم اے سِکین دنت کہ بلوچ راجءِ ھمُک ماتی زبان ءِ ارزشت است انت ءُ بلوچ راجءِ ماتی زبان زندگ دارگی انت بلے شرت ایش انت کہ آ زبان بلوچءِ وتی زبان بہ بنت چیا کہ چوشیں مزنیں کساسے ءَ ما بلوچ گند ایں کہ دری راج ءِ زُرتگیں زباناں گپ کن انت بلے اے ھم گندگ ءَ کیت انت کہ مروچی ھما بلوچ وتءَ را بلوچ منارینگ ءِ ھاترءَ واہ ءُزار کنگ ءَ انت بلے ایشانی درور ھم ھمے پیم انت کہ زبان کہ تئی وتی نہ بوت تئی پجار گار ءُ بیگواہ بیت۔
بلوچ نودربراں چوشیں ھیال یا کہ تپاوت وتی توکءَ رُدوم دیگی نہ انت بلے وتی جندءِ زباناں توری براھوی بہ بیت یا کہ بلوچی وتی ماتی زبان کارمرز کنگی انت ءُ دیمءَ جنزگی انت دوئیں زبانانی ھوار بلوچ ءِ ھمّک ماتی زبان مئے وتی شہدیں زبان انت کہ ایشانی رکینگ مئے زمہ واری انت ،مئے راجدوستی ءِ بلائیں بھرے مئے کسانیں بھرِشتے (contribution )ءِ بلائیں کردے پیلو کُت کنت۔ اگاں مئے شمے توکءَ لہتیں نودربر براھوی ءَ گپ کنت یا کہ نبشتہ کنت براھوئی زبان زندگ بیت ءُ براھوئی ءَ گپ کنوکیں بلوچ وتءَ را زندگ دار ایت وتی بندپتر ءُ وتی بلوچ بوگ ءَ زندگ دار ایت ءُ اگاں ما شما کسّے کہ بلوچی ءَ گپ کن انت یا نبشتہ کن انت گڑا بلوچی ھبر کنوکیں بلوچ وتءَ را ءُ وتی بندپتر ءَ زندگ داشت کنیں ءُ مئے شمے بندپتر بلوچی ءُ براھوئی ءَ ھوار بلوچ راج ءِ ھمک ماتی زبان ءِ بندپتر ءَ گوں بندوک انت گوں بلوچ راج ءَ بندوک انت ءُ بلوچستان ءِ گوما بندوک انت۔ اگاں اے ھیال مئے شمے توکءَ گیش ردوم زور ایت گڑا مارا تہنا یک یا دو ماتی زبان دربرگی نہ بیت بلے دُرست ماتی زباناں ھوار دربرگ ءُ جنزینگی بنت کہ یک نودربر گل ءِ وس ءَ چہ ڈن یا بہ گندئے یک راجی استانےءِ وس ءَ چہ ڈن ءِ کارے بہ بیت گڑا الّم انت کہ وتی وس ءُ بود ءِ کچ ءَ ماتی زبان بزانکہ براھوئی بلوچی یا کہ بلوچ راج ءِ دومی ماتی زبان وتی لبزانکی تاکانی بھر کنگی انت کہ ماتی زبان گیش ردوم دیگ بہ بنت ۔ ھو یک چِست ءُ ایرے پدا راھبند ءِ سرءَ کیت انت کہ کجام راھبند کارمرز کنگی انت ءُ کجام نہ ایشیءَ ما نودربر انوگیں وھدءَ ہ گندئے گیش ءُ گیوار کُت مہ کنیں بلے کجام کہ راھبند انوگیں وھدءَ است انت ھما کارمرز کنگ بہ بیت یا باز وھدءَ اے ھبر ھم چِست ءُ ایر بیت کہ بلوچی زبان آفیشل زبان ءِ جہت دیگ بہ بیت پدا اے ھبر ھما لبزانک ءُ بلوچ اُستادانی ڈبہّ ءَ کپ ایت کہ بلوچی یا کہ براھوئی زبان ءِ دیمروئی ءَ یک توار بنت۔ بلے مروچیگیں روچ اے گپءِ سکین ءَ دنت کہ بلوچ شوانگ ءَ بگر دانکہ بلوچ نودربر ءُ زانتکار ھمّک مردم ءِ وتی بھرے لوٹ ایت کہ بلوچ راج وتی ماتی زباناں زندگ داشت بہ کنت۔
بلوچ راجءِ ماتی زبان زندگ بات انت ءُ بلوچ راج زندگ بات۔۔۔۔۔!
Baloch Students Action Committee is a Student political organization that aims to work for the betterment of Education in Balochistan and politicizing the youth
